Read Western Panjabi مُکاشفہ 15 Bible Online

مُکاشفہ 15 - Western Panjabi bible

مُکاشفہ 15

¹فیر مَیں اسمان اُتّے اِک ہور وَڈا تے اچرج نِشان ویکھیا یعنی ستّاں فرِشتیاں پِچّھلیاں سَتّ آفتاں لئیاں ہویاں سن کیوں جو ایہناں آفتاں وِچ خُدا دا قَہر مُک گیا اے۔

²فیر مَیں شیشے دا اِک سمُندر جیہا ویکھیا جِہدے وِچ اَگ مِلی ہوئی سی تے جِنہاں اوس پشُو تے اوہدے بُت تے اوہدے ناں دی گنتری نُوں جِت لیا سی اوہناں نُوں اوس شیشے دے سمُندر کول خُدا دِیاں بربطاں لے کے کھلوتیاں ڈِٹّھا۔

³تے اوہ خُدا دے بندے مُوسیٰ دا گِیت تے لیلے دا گِیت گا گا کے آکھدے سن پئی اَے خُداوند خُدا قادرِ مُطلق! تیرے کمّ وڈّے تے اچرج نیں اَے ہمیشہ دے بادشاہ! تیریاں راہاں راست تے ٹھیک نیں۔

⁴اے خُداوند! کون تَیتھوں نا ڈرے گا؟ تے کون تیرے جلال دا ناں ظاہر نا کرے گا؟ کیوں جو نِرا توں ای قُدُّوس ایں تے سارِیاں قوماں آ کے تینُوں سجدہ کرن گِیاں کیوں جو تیرے انصاف دے کمّ ظاہر ہو گئے نیں۔

⁵ایہناں گلّاں دے پِچّھوں مَیں ویکھیا پئی شہادت دے خیمے دی ہیکل اسمان وِچ کھولی گئی۔

⁶تے اوہ سَتّے فرِشتے جِنہاں کول سَتّے آفتاں سن تیز تے چمکدار جواہراں دے نال سَجّے ہوئے تے سینے اُتّے سونے دی پیٹی بَنّھ کے خُدا دی ہیکل وِچوں نِکلے۔

⁷تے اوہناں چَوہاں جانداراں وِچوں اِک نے سَتّ سونے دے پیالے ہمیشہ تِیکر زِندہ رہن والے خُدا دے قَہر نال بھرے ہوئے اوہناں ستّاں فرِشتیاں نُوں دِتّے۔

⁸تے خُدا دے جلال تے اوہدی قُدرت دے سببّوں ہیکل دُھوں نال بھر گئی تے جد تِیکر اوہناں ستّاں فرِشتیاں دِیاں سَتّے آفتاں مُک نا گِئیاں کوئی اوس ہیکل وِچ وڑ نا سکیا۔