Read Western Panjabi مُکاشفہ 3 Bible Online

مُکاشفہ 3 - Western Panjabi bible

مُکاشفہ 3

¹تے سردِیس دی کلِیسیا دے فرِشتے نُوں ایہہ لِکھ۔ پئی جِہدے کول خُدا دِیاں سَتّ رُوحاں تے سَتّ تارے نیں اوہ ایہہ آکھدا اے پئی مَیں تیرے کمّاں نُوں جاننا آں پئی تُوں زِندہ اکھواؤندا ایں۔ پر ہیں مُردہ۔

²جاگدا رہو تے اوہناں شیواں نُوں جیہڑیاں باقی نیں تے جیہڑیاں مِٹن والِیاں سن مضبُوط کر۔ کیوں جو مَیں تیرے کِسے کمّ نُوں اپنے خُدا دے اگّے پُورا نئیں ویکھیا

³تَد یاد کر پئی تُوں کِیویں دی تعلِیم سِکھی تے سُنی سی۔ تے اوہدے اُتّے قیم رہو تے تَوبہ کر۔ جے تُوں جاگدا نا رہیں گا۔ تے مَیں چور وانگر آ جاواں گا تے تینُوں کدی پتا نا ہوئے گا۔ پئی مَیں کیہڑے ویلے تیرے اُتّے آپَواں گا

⁴بے شک سردِیس وِچ تیری تھاں تھوڑے اجیہے بندے نیں۔ جِنہاں اپنے کپڑے پلِیت نئیں کِیتے۔ اوہ چِٹّی پوشاک پا کے میرے نال سَیر کرن گے۔ کیوں جو اوہ ایسے لائق نیں۔

⁵جیہڑا جِتّے اوہنوں ایسے طرح چِٹّے کپڑے پوائے جان گے تے مَیں اوہدا ناں زِندگی دی کتاب وِچوں کدی نا کٹّاں گا۔ سگوں اپنے باپ تے اوہدے فرِشتیاں اگّے اوہدے ناں دا اِقرار کراں گا۔

⁶جِہدے کنّ ہَین سُنے پئی رُوح کلِیسیاواں نُوں کِیہ آکھدا اے۔

⁷تے فِلَدِلفیہ دی کلِیسیا دے فرِشتے نُوں ایہہ لِکھ پئی۔ جیہڑا قُدُّوس تے سَچّا اے تے داؤد دی کُنجی اوہدے کول اے جِہدے کھولے ہوئے نُوں کوئی بند نئیں کر دا تے بند کِیتے ہوئے نُوں کوئی کھولدا نئیں۔ اوہ ایہہ آکھدا اے۔

⁸پئی مَیں تیرے کمّاں نُوں جاننا آں (ویکھ مَیں تیرے سامھنے اِک بُوہا کھولیا ہویا اے۔ کوئی اوہنوں بند نئیں کر سکدا) کیوں جو تیرے وِچ تھوڑا جِہیا زور اے۔ تے تُوں میرے کلام اُتّے عمل کِیتا اے۔ تے میرے ناں دا اِنکار نئیں کِیتا۔

⁹ویکھ مَیں شیطان دی جماعت دے اوہناں لوکاں نُوں تیرے قابُو وِچ کر دیاں گا۔ جیہڑے اپنے آپ نُوں یہُودی آکھدے نیں تے ہَین نئیں۔ سگوں جُھوٹھ بول دے نیں۔ ویکھ مَیں ایہہ کراں گا پئی اوہ آ کے تیرے پیراں وِچ سجدہ کرن گے تے جانن گے پئی مَیں تینُوں پیار کرنا آں۔

¹⁰ایس کر کے پئی تُوں میرے صبر دے کلام اُتّے عمل کِیتا ایس لئی مَیں وی ازمایش دے اوس ویلے تیری حفاظت کراں گا۔ جیہڑا زمین دے رہن والیاں دے ازمان لئی ساری دُنیا اُتّے آؤن والا ہے۔

¹¹مَیں چھیتی آؤن والا آں جو کُجھ تیرے کول اے اوہنوں گُھٹ کے پَھڑی رکھ پئی کوئی تیرا تاج نا کھوہ لَوے۔

¹²جیہڑا جِتّے مَیں اوہنوں اپنے خُدا دی ہیکل وِچ اِک تھم بناواں گا اوہ فیر کدی باہر نا نِکلے گا تے مَیں اپنے خُدا دا ناں تے اپنے خُدا دے شہر یعنی اوس نَوِیں یرُوشلِیم دا ناں جیہڑا میرے خُدا کولوں اسمان توں آؤن والا اے تے اپنا نواں ناں اوہدے اُتّے لِکھاں گا۔

¹³جِہدے کنّ ہَین اوہ سُنے پئی رُوح کلِیسیاواں نُوں کِیہ آکھدا اے۔

¹⁴تے لَودِیکیہ دی کلِیسیا دے فرِشتے نُوں ایہہ لِکھ پئی جیہڑا آمِین تے سَچّا تے برحق گواہ تے خُدا دی خلقت دا مُڈھ اے اوہ ایہہ آکھدا اے پئی۔

¹⁵مَیں تیرے کمّاں نُوں جاننا آں۔ پئی نا تے تُوں ٹھنڈا ایں تے نا گرم۔ چَنگا ہوندا جے تُوں ٹھنڈا ہوندوں یا گرم۔

¹⁶اِنجے ای ایس واسطے پئی نا تُوں گرم ایں نا ٹھنڈا۔ سگوں کوسا ایں ایس لئی مَیں تینُوں اپنے مُنھ توں اُباک چھڈاں گا۔

¹⁷تے ایس واسطے پئی توں آکھنا ایں پئی مَیں دَولت مند آں تے مالدار بن گیا آں تے تینُوں کِسے شے دی لوڑ نئیں۔ تے ایہہ نئیں جان دا پئی تُوں بد نصیب تے خوار تے غرِیب تے اَنھا تے ننگا ایں۔

¹⁸مَیں تینُوں صلاح دینا آں۔ پئی مَیتھوں اَگ وِچ تایا ہویا سونا مُل لے لے۔ پئی تُوں دَھنی ہو جائیں۔ تے چِٹّے کپڑے پا لے پئی اوہناں نُوں پا کے تُوں ننگے پن دی بے لہنگی توں بچیں۔ تے اَکھّیاں وِچ پان لئی سُرمہ لے پئی فیر سُجاکھا ہو جاویں۔

¹⁹مَیں جِنہاں نُوں پیار کرنا آں اوہناں نُوں جِھڑکدا تے سزا وی دینا آں۔ ایس لئی سرگرم ہو تے تَوبہ کر۔

²⁰ویکھ مَیں بُوہے اُتّے کھلوتا ہویا کھڑکانا آں۔ جے کوئی میری اواز سُن کے بُوہا کھولے گا تے مَیں اوہدے کول اندر جا کے اوہدے نال کھانا کھاں گا تے اوہ میرے نال کھائے گا۔

²¹جیہڑا جِتّے مَیں اوہنوں اپنے نال تخت اُتّے بہاواں گا۔ جیویں مَیں وی جِت کے اپنے باپ نال اوہدے تخت اُتّے بَہہ گیا۔

²²جِہدے کنّ ہَین سُنے پئی رُوح کلِیسیاواں نُوں کِیہ آکھدا اے۔