Read Western Panjabi مُکاشفہ 8 Bible Online

مُکاشفہ 8 - Western Panjabi bible

مُکاشفہ 8

¹تے جد اوس ستوِیں مُہر توڑی تے ادھے گھنٹے تِیکر اسمان وِچ چُپ لگّی رہی۔

²تے مَیں اوہناں ستّاں فرِشتیاں نُوں ویکھیا۔ جیہڑے خُدا دے سامھنے کھلوتے رہندے نیں۔ تے اوہناں نُوں سَتّ تُرہیاں دِتّیاں گِئیاں۔

³فیر اِک ہور فرِشتہ سونے دا دُھوف دان لے کے آیا۔ تے قُربان گاہ دے اُتّے کھلو گیا تے اوہنوں بُہت ساری دُھوف دِتّی گئی پئی سارے پاک لوکاں دی دُعاواں دے نال اوس سونے دی قُربان گاہ اُتّے چاہڑے جیہڑی تخت دے سامھنے اے۔

⁴تے اوس دُھوف دا دُھوں فرِشتے دے ہتھّوں پاک لوکاں دی دُعاواں دے نال خُدا دے اگّے اَپڑ گیا۔

⁵تے فرِشتے دُھوف دان نُوں لے کے اوہدے وِچ قُربان گاہ دی اَگ بھری تے زمین اُتّے لُد دِتّی تے بدّل گجّن تے چمکن لگّے تے اَوازاں تے بھنچال آئے۔

⁶تے اوہ سَتّے فرِشتے جِنہاں دے کول اوہ سَتّ تُرہیاں سن پُھوکن نُوں تیار ہو گئے۔

⁷تے جد پہلی تُرہی وَجّی تے گڑے تے اَگ جِنہاں وِچ لہو رلیا ہویا سی جمّے تے زمین اُتّے سُٹّے گئے۔ تے زمین دا ترِیجا حِصّہ سڑ گیا تے ترِیجا حِصّہ بُوٹے تے سارا ہرا گھاہ سڑ گیا۔

⁸تے جد دُوجے فرِشتے تُرہی نُوں پُھوک ماری تے اَگ نال بلدا ہویا اِک وَڈا پہاڑ سمُندر وِچ سُٹّیا گیا تے سمُندر دا ترِیجا حِصّہ لہو ہو گیا۔

⁹تے سمُندر دی جیوندی خلقت دا ترِیجا حِصّہ مر گیا۔ تے بیڑیاں دا ترِیجا حِصّہ برباد ہوگیا۔

¹⁰تے جد ترِیجے فرِشتے تُرہی نُوں پُھوک ماری تے اِک وَڈا سارا تارہ مشال وانگر بلدا ہویا اسمانوں ٹُٹ پیا تے ترِیجے حِصّے دریاواں تے پانی دے چشمیاں اُتّے آ پیا۔

¹¹اوس تارے دا ناں ناگ دُونا اکھواؤندا اے تے پانی دا ترِیجا حِصّہ ناگ دونے وانگر کَوڑا ہوگیا تے پانی دے کَوڑے ہو جان توں بتھیرے بندے مر گئے۔

¹²تے جد چوتھے فرِشتے تُرہی نُوں پُھوک ماری تے سُورج دا ترِیجا حِصّہ تے چَنّ دا ترِیجا حِصّہ تے تاریاں دا ترِیجا حِصّہ ماریا گیا۔ ایتھوں تِیکر پئی اوہناں دا ترِیجا حِصّہ ہنیرا ہوگیا تے دِن دے ترِیجے حِصّے وِچ دُھپ نا رہی تے ایسے طرح رات دے ترِیجے حِصّے وِچ وی۔

¹³تے جد مَیں فیر دھیان کِیتا تے اسمان دے وِچ اِک عُقاب نُوں اُڈدیاں ہویاں تے اُچّی اُچّی ایہہ آکھدیاں سُنیاں پئی اوہناں تریہوں فرِشتیاں دِیاں تُرہیاں دِیاں اَوازاں دے سبّب جیہڑیاں اجے پُھوکن والیاں نیں زمین دے رہن والِیاں اُتّے افسوس افسوس افسوس۔