Read Western Panjabi مُکاشفہ 9 Bible Online

مُکاشفہ 9 - Western Panjabi bible

مُکاشفہ 9

¹جد پن جیویں فرِشتے تُرہی نُوں پُھوک ماری تے مَیں اسمانوں زمین اُتّے اِک تارا ڈِگّا ہویا ویکھیا تے اوہنوں اتھاہ کھڈے دی کُنجی دِتّی گئی۔

²تے اوس اتھاہ کھڈا کھولیا۔ تے کھڈے وِچوں اِک وڈّی بھٹّی جِہیا دُھوں نِکلیا تے کُھوہ دے دُھوں دا سببّوں سُورج تے وَا ہنیرے ہوگئے۔

³تے اوس دُھوں وِچوں زمین اُتّے ٹڈّیاں نِکلیاں تے اوہناں نُوں زمین دے ٹھوہنیاں وانگر طاقت دِتّی گئی۔

⁴تے اوہناں نُوں آکھیا گیا پئی اوہناں بندیاں دے بِناں جِنہاں دے مَتّھے اُتّے خُدا دی مُہر نئیں زمین دے گھاہ یا کِسے سبزی یا کِسے بُوٹے نُوں نُقصان نا پُچاؤ۔

⁵تے اوہناں نُوں جانوں مارن دا نئیں سگوں پنجاں مہِینیاں تِیکر لوکاں نُوں تڑپان دا اختیار دِتّا گیا تے اوہناں دی پِیڑ اجیہی سی جیویں ٹُھوہاں دے ڈنگ مارن توں بندے نُوں ہوندی اے۔

⁶اوہناں دِناں وِچ لوک مَوت لَبّھن گے پرکدی نا مِلے گی۔ تے مرن دی چاہ کرن گے تے مَوت اوہناں توں نسّے گی۔

⁷تے ٹڈّیاں دی صُورت اوہناں گھوڑیاں وانگر سی جیہڑے لڑائی دی لئی تیار کِیتے گئے ہون تے اوہناں دیاں سِراں اُتّے سونے دے تاج جیہے سن تے اوہناں دِیاں شکلاں بندیاں وانگر سن۔

⁸تے اوہناں دے وال زنانِیاں وانگر سن تے دَند شیر ببّر وانگر سن۔

⁹تے اوہناں دے کول لوہے وانگر بکتر سن تے اوہناں دے پَراں دی اواز اینج سی جیویں رَتھاں تے کِنے سارے گھوڑیاں دی جیہڑے لڑائی وِچ بھَجدے ہون۔

¹⁰تے اوہناں دے بُونڈے ٹھوہنیاں وانگر سن تے اوہناں دے وِچ ڈنگ وی ہے سن تے اوہناں دیاں بُونڈیاں وِچ پنج مہینے تِیکر بندیاں نُوں نُقصان پَہُچان دی طاقت سی۔

¹¹اتھاہ کھڈے دا فرِشتہ اوہناں اُتّے بادشاہ سی اوہدا ناں عِبرانی وِچ ابدّون تے یُونانی وِچ اپُلّیون اے۔

¹²پہلا افسوس تے مُک گیا ویکھو ایہدے پِچّھوں دو افسوس ہور آؤن والے نیں۔

¹³جد چھیویں فرِشتے تُرہی نُوں پُھوک ماری۔ تے مَیں اوس سونے دی قُربان گا دے سِنگاں وِچوں جیہڑی خُدا دے سامھنے اے اجیہی اواز سُنی۔

¹⁴پئی اوس چھیویں فرِشتے نُوں جِہدے کول تُرہی سی۔ کوئی پیا آکھدا اے۔ پئی وڈّے دریا فرات دے کول جیہڑے چار فرِشتے بَدّھے ہوئے نیں اوہناں نُوں کھول چھڈ۔

¹⁵تے اوہ چارے فرِشتے کُھل گئے جیہڑے مُقرّر کِیتی گئی گھڑی تے دِن تے مہینے تے ورھے دے لئی بندیاں دا ترِیجا حِصّہ مارن نُوں تیار کِیتے گئے سن۔

¹⁶تے گھوڑ چڑھیاندیاں فَوجاں گنتری وِچ وِیہہ کروڑ سن مَیں اوہناں دی گنتری سُنی۔

¹⁷تے مَینُوں ایس رویا وِچ گھوڑے تے اوہناں دے اجیہے سوار وکھالی دِتّے جِنہاں دے بکتر اَگ تے سُنبل تے گندھک وانگر سن تے اوہناں گھوڑیاں دے سِر شیر ببّر وانگر سن تے اوہناں دے مُنھاں وِچوں اَگ تے دُھوں تے گندھک نِکلدی سی۔

¹⁸اوہناں تِنّاں آفتاں یعنی اوس اَگ تے دُھوں تے گندھک نال جیہڑی اوہناں دے مُنھوں نِکلدی سی ترِیجا حِصّہ بندے مر گئے۔

¹⁹کیوں جو اوہناں گھوڑیاں دی طاقت اوہناں دِیاں پُوشلاں وِچ سی۔ ایسے واسطے پئی اوہناں دِیاں پُوشلاں سپّاں وانگر سن۔ تے پُوشلاں وِچ سِر وی سن۔ اوہناں نال ای اوہ نُقصان کر دے سن۔

²⁰تے باقی بندیاں جیہڑے ایہناں آفتاں نال نئیں سن موئے اپنیاں ہتّھاں دے کمّاں توں تَوبہ نا کِیتی۔ پئی شیطان تے سونے چاندی تے پِتّل تے پتّھر تے لکڑ دِیاں مُورتاں دی بندگی توں مُڑ جاندے جیہڑیاں نا ویکھ سکدِیاں نیں نا سُن سکدِیاں نا چَل سکدِیاں نیں۔

²¹تے خُون تے جادُو تے حرامکاریاں تے چوریاں جیہڑیاں اوہناں کِیتیاں سن اوہناں توں تَوبہ نا کِیتی۔