Read Western Penan YOHANES 10 Bible Online

YOHANES 10 - Western Penan bible

YOHANES 10

¹Ha' Yésus kepeh, Akeu' bara' mu'un ngan keh, kelunan éh masek lem pagin domba mukat jin jalan tengéé éh bé' jin usit tapé, Iah kulunan nekau ngan kelunan éh ngesakit usah réh ke' néh omok alaa' livah réh.

²Bang kelunan éh masek jin usit pagin, inah éh tepun domba nah.

³Kelunan éh mavaa' usit pagin iah mukap usit pagin ngan tepun domba nah. Kekat domba jam menéng ha' tepun néh ngan iah tebai réh palaa' ngaran réh ke' néh mihin réh musit.

⁴La'o néh mihin réh musit, lakau éh saa' tenah réh ngan kekat domba néh kivu éh uban réh jam menéng ha' néh.

⁵Bang kelunan éh jah, bé' réh keloo' kivu éh, kelap awah réh, uban bé' réh jam menéng ha' kelunan éh jah.

⁶Kenat ha' tapan éh benara' Yésus ngan réh, bang bé' réh nesen tong ha' Néh kenat.

⁷Ka' ha' Yésus kepéh, Akeu' bara' mu'un ngan keh, Akeu' iteu' usit pagin jalan kekat domba omok masek lem pagin.

⁸Kekat irah éh tuai jin tenah Ké', irah barei' kelunan nekau, barei' kelunan éh ngesakit usah réh ke' néh omok alaa' livah réh, ngan kekat domba bé' éh jam kivu ha' réh.

⁹Akeu' iteu' éh usit tapé tong pagin domba. Séé'-séé' éh masek jin Akeu', omok éh alaa' urip, adang néh pu'un masek ngan musit kepéh ngan alaa' penguman néh.

¹⁰Kelunan nekau tuai ke' néh nekau domba ngan mematai ngan nasa' réh awah, bang Akeu' tuai dokoo' kelunan omok alaa' urip, avéé' réh murung mu'un-mu'un, ha' Néh.

¹¹Ka' ha' Yésus kepéh, Akeu' éh tepun domba mu'un. Akeu' éh tepun domba mu'un nah mena' urip Néh ngeliwah kekat domba Néh.

¹²Kelunan sohoo' éh bé' tepun domba mu'un ngan éh bé' mihau réh mu'un, hun néh na'at bekuleu' tuai, kelap éh, nebet néh awah domba nah, boh bekuleu' inah navap domba nah ngan pepurat réh.

¹³Kelunan sohoo' pu'un éh kelap awah, uban néh kelunan sohoo' awah, ngan bé' éh pika domba nah.

¹⁴Akeu' éh Tepun domba mu'un, ngan Akeu' jam kekat domba Ké', ngan domba Ké' péh jam Akeu'.

¹⁵ Akeu' jam irah ngan irah jam Akeu', pekua' Tamen Ké' jam Akeu', ngan Akeu' jam Tamen Ké', la'ah Akeu' juk mena' urip Ké' ngeliwah kekat domba Ké'.

¹⁶Pu'un domba Ké' kepéh éh bé' jak masek lem pagin iteu', kekat irah péh Akeu' juk alaa' réh lem pagin iteu'. Irah péh omok menéng ha' Ké' boh réh omok jah awah vun ngan jah awah tepun, ha' Néh.

¹⁷Ka' ha' Yésus kepéh, Tamen Ké' murung Akeu' uban Ké' keloo' mena' urip Ké' jalan Ké' omok alaa' éh kepéh.

¹⁸Bé' pu'un séé'-séé' éh ngebéé urip Ké' iteu', bang neu' pengeloo' Ké' tengéé' Akeu' mena' éh. Akeu' pu'un penyukat omok mena' urip Ké' kenat, ngan pu'un penyukat Ké' alaa' éh kepéh. Inah éh sohoo' Tamen Ké' ngan Ké', ha' Yésus ngan réh.

¹⁹Naneu' ha' Yésus kenat, inah irah Yahudi petengéé' kenin kepéh.

²⁰Ka' ha' jelua' réh, kelunan inah nasek balei' ngan tuleu'. Uban ineu' keh keloo' menéng ha' Néh, ha' réh.

²¹Ka' ha' jelua' kepéh, Kelunan éh nasek balei', bé' éh jam pané kenat, kenat kepéh, bé' balei' omok peka'o kelunan peseu' ha' réh.

²²La'ah sioo' inah pu'un irah Yahudi maneu' jah Dau Ja'au kepéh tong leboo' Yérusalem, Dau Ja'au éh petesen réh tong jalan réh lepah suai umaa' Allah éh maréng ngan mena' éh ngan Tuhan.

²³Sioo' réh maneu' Dau Ja'au inah, sioo' genin. Lakau Yésus tong lamin Salomo éh tong umaa' Allah nah.

²⁴Tuai irah Yahudi nekedéng tutuh Yésus, ka' ha' réh, Mai Ke' petusah kenin améé', jian Ke' pané petek ke' ngan améé', kineu' Ke', Ka'au éh Kristus. Kineu' Ke', bé' éh, ha' réh.

²⁵Ka' ha' Yésus mipa réh, Pu'un Akeu' lepah bara' éh ngan keh, bang bé' keh keloo' ngelan tong ha' Ké' nah. Kekat penganeu' Ké' éh neu' Ké' kivu sohoo' Tamen Ké', kekat inah bara' tong Akeu'.

²⁶Bang bé' keh ngelan uban keh bé' domba Ké'.

²⁷Kekat domba Ké' jam réh menéng ha' Ké', ngan Akeu' péh jam irah ngan irah pu'un kivu Akeu'.

²⁸Pu'un Akeu' mena' urip pelinguh ngan réh, bé' réh omok matai, ngan bé' pu'un séé'-séé' éh omok ngelebu réh jin kamit Ké'.

²⁹Tamen Ké' éh mena' réh ngan Ké', Iah pu'un pelapah ja'au ngaran jin kekat réh béé ngan bé' pu'un séé'-séé' éh omok ngelebu réh jin Tamen Ké'.

³⁰Tamen Ké' ngan Akeu' péh jah awah kenin, ha' Néh ngan réh.

³¹Irah Yahudi alaa' bateu' ke' réh juk memateu' Éh.

³²Ka' ha' Yésus ngan réh, Pinaa' kereja' Ké' éh jian, éh neu' Ké' tong ta'an keh, kereja' éh sohoo' Tamen Ké' ngan Ké'. Jin belah iteu' éh mah éh sala' dokoo' keh juk memateu' Ku', ha' Néh.

³³ Ka' ha' irah Yahudi mipa Éh, Bé' améé' juk memateu' Ke' naneu' kereja' Ko' éh jian, bang uban Ko' kelunan awah, ngan pu'un Ke' juk maneu' usah Ko' pekua' ngan Allah, inah Ke' ngesa'at Allah, uban Ko' kenat nah ke' mé' juk memateu' Ke', ha' réh.

³⁴ Ka' ha' Yésus mipa réh, Pu'un senurat lem surat Allah, tong ha' Allah éh bara', Ngaran ka'ah allah, ha' lem surat nah.

³⁵Kejam lu' kekat ha' lem surat Allah pu'un petem pelinguh, hun néh kenat hun Allah pu'un bara' ngan kelunan éh menéng ha' tebaraa' Néh sahau, nateng Néh allah, hun néh kenat ha' ngan irah éh kelunan awah,

³⁶uban ineu' keh bara' Akeu' ngesa'at Allah hun Ké' bara' Akeu' éh Anak Allah mu'un. Bang pu'un Allah ngevéléé' Akeu' ngan nyohoo' Akeu' tuai tong tana' iteu'.

³⁷Hun Ké' bé' pu'un maneu' kekat kereja' éh sohoo' Tamen Ké', mai keh ngelan tong Akeu',

³⁸bang hun néh pu'un, na' péh ka'ah bé' keloo' ngelan tong ha' Ké', jian keh ngelan éh ta'an keh tong kereja' Ké', dokoo' keh omok jam adang Tamen Ké' pu'un dalem Akeu' ngan Akeu' péh pu'un dalem Tamen Ké', ha' Néh.

³⁹La'o inah irah pitah jalan ke' réh juk ngamit Éh bang bé' réh omok, pelepu Éh.

⁴⁰ Moléé' Yésus kepéh tai saa' dipa baa' Yordan tong jalan Yohanes ngebatis kelunan rai, sinah éh mokoo'.

⁴¹Pinaa' kelunan tuai tavin Yésus, ka' ha' réh, Bé' Yohanes pu'un maneu' telana' ineu'-ineu' éh ja'au, bang kekat ha' éh benara' néh tong Yésus nah, pu'un éh teneng mu'un, ha' réh.

⁴²Jin belah kelunan inah, pinaa' éh ngelan tong Yésus.