Read Western Penan YOHANES 13 Bible Online

YOHANES 13 - Western Penan bible

YOHANES 13

¹La'ah dau teka irah Yahudi maneu' Dau Ja'au Paska lepah avéé'. La'ah kejam Yésus sukup jaka' Néh ke' Néh piso jin tana' iteu' moléé' ngan Tamen Néh kepéh. Jin bu'un Néh tuai pu'un Éh murung irah éh anah Néh tong tana' iteu', ngan pu'un Éh murung réh pah avéé' ga' néh.

²La'ah mokoo' Yésus ngan irah bakéh Néh kuman. Pu'un Sitan tupat kenin Yudas éh anak Simon Iskariot, ke' néh memalo Yésus.

³La'ah kejam Yésus Tamen Néh pu'un mena' kekat penyukat Néh ngan Néh. Kejam Néh kepéh Iah pu'un tuai jin Allah ngan juk moléé' ngan Allah kepéh.

⁴Tovoo' réh kuman, Yésus betéé' ke' Néh mega' seput Néh éh kebit ngan ke' Néh alaa' jah satek livah ke' Néh ngejeret éh tong é'eng Néh.

⁵Boh Éh mujek baa' lem bisin ke' Néh pohéé' gem irah bakéh Néh ngan mitit éh palaa' livah nah.

⁶Avéé' Éh tong Simon Péterus, ka' ha' Péterus ngan Néh, Tuhan, kineu' Ke' pohéé' gem ké', ha' néh.

⁷Ka' ha' Yésus mipa éh, Bé' ke' jam éh neu' Ké' hun iteu', bang temurei' kepéh da', boh ke' jam éh, ha' Néh.

⁸Ka' ha' Péterus kepéh, mai, bé' akeu' buha' Tuhan pohéé' gem ké', hun iteu' ngan temurei', bé' omok, ha' néh. Ka' ha' Yésus ngan néh kepéh, Hun Ké' bé' pohéé' gem ko', bé' ke' omok bakéh Ké', ha' Néh.

⁹Ka' ha' Péterus kepéh, O Tuhan, hun néh kenat mai Ke' pohéé' gem ké' awah, jian Ke' pohéé' avéé' ojoo' ngan ulun ké' kepéh, ha' néh.

¹⁰Ka' ha' Yésus ngan néh, séé'-séé' éh lepah meroo' pu'un éh jian, bé' éh meroo' kepéh, gem néh awah éh nohéé' néh. Kekat ka'ah pu'un jian, jah usah awah éh bé' jian, ha' Néh.

¹¹Kejam Yésus séé' éh juk memalo Éh inah ke' Néh bara' ka', Kekat ka'ah pu'un jian, jah usah awah éh bé' jian.

¹²La'o Yésus pohéé' gem réh, nalaa' Néh seput Néh kepéh ngan mokoo' Éh pemung ngan irah éh kuman nah. Boh éh pané ngan réh, ka' ha' Néh Kineu', kejam keh éh neu' Ké' inah.

¹³Ka'ah bara' Akeu' éh Guru keh ngan Tuhan keh, jian, tekep keh bara' kenat, uban kenat néh Akeu'.

¹⁴Hun Akeu' Éh Tuhan keh ngan Guru keh pu'un pohéé' gem keh, tekep keh pohéé' gem siget ka'ah ke'.

¹⁵ Pu'un Akeu' maneu' kenat dokoo' ka'ah péh jam maneu' kenat, jian keh maneu' pekua' barei' éh neu' Ké' nah.

¹⁶ Akeu' bara' mu'un ngan keh, kelunan ripen bé' éh ja'au ngaran jin pengeja'au néh, kelunan sohoo' bé' éh ja'au ngaran jin kelunan éh nyohoo' éh.

¹⁷Hun iteu' kejam keh éh kenat, hun keh pu'un kivu ngan maneu' éh kenat, boh keh pu'un murung mu'un.

¹⁸ Bé' Akeu' bara' kenat ngan kekat ka'ah béé, Akeu' jam irah éh kevéléé' Ké', bang ha' lem surat Allah éh bara' ka', Kelunan éh kuman pemung ngan Ké', pu'un iah pupah maneu' Akeu' kepéh, adang ha' inah pu'un teneng kenat mu'un.

¹⁹Bé' jak éh pu'un kenat, inah Akeu' bara' éh ngan keh tenah, dokoo' hun néh pu'un kenat, omok keh ngelan adang Akeu' Éh Allah.

²⁰ Akeu' bara' mu'un ngan keh, séé'-séé' éh alaa' kelunan éh sohoo' Ké', inah iah alaa' Akeu' kepéh, ngan séé'-séé' éh alaa' Akeu', inah iah alaa' Iah éh nyohoo' Akeu' tuai, ha' Néh.

²¹La'o Yésus pané kenat besau kenin Néh, boh Éh bara' petek ngan réh, ka' ha' Néh Akeu' bara' ngan keh, pu'un jah usah jin belah keh siteu' éh juk memalo Akeu', ha' Néh.

²²Mujah kenin irah bakéh Néh, pekepuh réh jah usah ngan jah usah réh, bé' réh jam séé' éh kunah Yésus nah.

²³Jah bakéh Yésus éh kemurung Yésus mu'un, pu'un éh mokoo' déhéé' Yésus.

²⁴Boh Simon Péterus nyohoo' bakéh Yésus nah neteng éh séé' éh kunah Néh nah.

²⁵Boh bakéh Yésus nah mokoo' petepih tong Yésus ke' néh neteng Éh ka' ha' néh, O Tuhan, séé' éh juk memalo Ke' kunah Ko' nah, ha' néh.

²⁶Ka' ha' Yésus mipa éh, Kelunan éh nena' Ké' ka'an éh tenilan Ké' dalem ba'an iteu', inah éh iah, ha' Néh. Boh Éh tilan ka'an ke' néh mena' éh ngan Yudas anak Simon Iskariot.

²⁷Hun Yudas alaa' ka'an inah, tioo Sitan masek lem kenin néh. Ka' ha' Yésus ngan néh, Kekat éh juk neu' ko', rigah ke' maneu' éh ha' Néh.

²⁸Bang bé' pu'un séé'-séé' péh éh mokoo' kuman pemung ngan Yésus nah éh jam mu'un tong ha' Yésus pané ngan Yudas kenat.

²⁹Jelua' seruh uban Yudas mihau bék jalan réh modoo' rigit réh, barang Yésus nyohoo' éh tai melih ka'an éh tekep réh kuman tong Dau Ja'au réh. Jelua' kelunan kepéh seruh barang Yésus nyohoo' éh mena' rigit ngan kelunan kari péh.

³⁰La'o Yudas alaa' ka'an éh tenilan Yésus, tioo musit éh. La'ah dau lepah merem.

³¹La'o Yudas musit Yésus pané kepéh ngan irah bakéh Néh, ka' ha' Néh, Hun iteu' pengaren Anak Kelunan pu'un poléng ngan pengaren Allah pu'un poléng dalem Iah.

³²Hun pengaren Allah pu'un poléng dalem Anak Kelunan, boh Allah omok pepoléng pengaren Anak Néh kepéh, ngan rigah.

³³ O anak Ké', bé' Akeu' lebéé' lah mokoo' ngan keh dat, adang ka'ah pu'un pitah Akeu', bang Akeu' bara' ngan keh pekua' barei' ha' Ké' ngan irah Yahudi lepah rai, bé' keh omok tai tong jalan Ké' juk tai nah.

³⁴ Akeu' mena' jah sohoo' éh maréng ngan keh, inah éh, Jian keh pika jah usah ngan jah usah pekua' Akeu' pika keh.

³⁵Hun keh pika jah usah ngan jah usah kenat, boh kekat kelunan omok jam keh bakéh Ké' mu'un, ha' Néh.

³⁶La'ah ka' ha' Simon Péterus ngan Yésus, O Tuhan, juk tai semah ke' Néh kei? Ha' Néh. Ka' ha' Yésus mipa éh, Bé' ke' omok kivu Akeu' hun iteu', Bang temurei' kepéh, boh ke' omok ha' Néh.

³⁷Ka' ha' Péterus kepéh, O Tuhan, kineu' éh ké' bé' omok kivu Ke' hun iteu', keloo' akeu' matai ngeliwah Ke', ha' néh.

³⁸Ka' ha' Yésus mipa éh kepéh, Keloo' ke' matai ngeliwah Akeu' kei? Akeu' bara' mu'un ngan Ko', Bé' jak iap sakui ngelangéé' pu'un ke' ngaken teleu' koléé' bara' bé' ke' jam Akeu', ha' Néh.