Read Western Penan YOHANES 17 Bible Online

YOHANES 17 - Western Penan bible

YOHANES 17

¹La'o Yésus pané kenat, Iah na'at tong langit ngan sebayang, ka' ha' Néh, Tamen, hun iteu' sukup jaka' Ké'. Jian Ke' ngajung Anak Ko' iteu' dokoo' Ké' omok ngajung Ke' kepéh.

²Uban Ka'au maneu' Akeu' pengeja'au kekat kelunan dokoo' Ké' omok mena' urip pelinguh ngan kekat irah éh nena' Ko' ngan Ké'.

³La'ah urip éh pelinguh, inah éh, hun kelunan jam jah Ka'au awah néh Allah éh mu'un, ngan hun réh jam Yésus Kristus éh senohoo' Ko' tuai nah.

⁴Kelebéé' Akeu' pu'un tong tana' iteu', pu'un Ku' pepoléng pengaren Ko' ngan réh, pu'un Ku' pesukup kekat kereja' éh nena' Ko' ngan Ké' rai.

⁵O Tuhan, hun iteu' jian Ke' mena' pengaren Ké' kepéh pemung ngan Ko' sinah, éh pekua' pengaren Ké' hun Ké' pu'un ngan Ko' hun tana' iteu' bé' jak pu'un rai.

⁶Pu'un Ku' bara' Ke' ngan kekat irah éh nena' Ko' ngan Ké' jin tana' iteu'. Anah Ko' réh ngan pu'un Ke' mena' réh ngan Ké' kepéh. Pu'un réh kivu sohoo' Ko', ngan

⁷hun iteu' kejam réh kekat éh nena' Ko' ngan Ké', jin Ka'au ke' éh.

⁸Uban kekat ha' tebaraa' éh nena' Ko' ngan Ké', pu'un Ku' bara' éh ngan réh kepéh, ngan pu'un réh mihau éh lem kenin réh. Kejam réh mu'un Akeu' pu'un tuai jin Ka'au ngan pu'un réh ngelan Ka'au éh nyohoo' Akeu' tuai.

⁹Akeu' sebayang tong irah, bé' Akeu' sebayang tong kekat kelunan tong tana' iteu', bang Akeu' sebayang tong irah éh nena' Ko' ngan Ké' awah uban anah Ko' réh.

¹⁰Kekat-kekat éh anah Ké', anah Ko' ke' éh, ngan kekat-kekat éh anah Ko', anah Ké' ke' éh, ngan pu'un réh pepoléng kemaren Ké'.

¹¹Hun iteu' inah Akeu' moléé' tai Ka'au kepéh, bé' Akeu' pu'un mokoo' tong tana' iteu' la'ah, bang irah pu'un mokoo' keto tong tana' iteu'. O Amam éh Ni'ai, jian Ke' mihau réh neu' penyukat ngaran Ko'. Jian Ke' mihau réh dalem ngaran Ko', dokoo' réh omok pekua' kenin barei' Tuah iteu'.

¹² Kelebéé' Akeu' pu'un ngan réh, pu'un Ku' mihau réh dalem ngaran Ko'. Pu'un Ku' mihau réh mu'un ngan bé' pu'un jah usah éh tawang, bang jah inah éh tawang dokoo' pesukup ha' lem surat Allah.

¹³Ngan hun iteu' Akeu' moléé' ngan Ko', bang hun Ké' pu'un keto tong tana' iteu', pu'un Ku' bara' kekat ha' Ké' inah jalan irah omok murung kenin.

¹⁴Pu'un Ku' bara' ha' tebaraa' Ko' ngan réh, ngan irah pinaa' tong tana' leko tong réh uban réh bé' pu'un pekua' kenin ngan irah la'ah, barei' Akeu' péh bé' pu'un pekua' kenin ngan irah.

¹⁵Bé' Akeu' nyohoo' Ke' pepiso réh jin tana' iteu', bang Akeu' menyat Ke' mihau réh jin iah éh sa'at.

¹⁶Bé' irah pu'un pekua' kenin ngan kelunan tong tana' iteu', barei' Akeu' péh bé' pu'un pekua' kenin ngan réh.

¹⁷Jian Ke' maneu' réh anah Ko' mu'un neu' ha' tebaraa' Ko' éh teneng.

¹⁸Barei' Ka'au nyohoo' Akeu' tuai tong tana' iteu', kenat péh Akeu' nyohoo' irah kepéh.

¹⁹Uban Ké' pika réh, inah Akeu' mena' usah Ké' ngan Ko' dokoo' réh omok anah Ko' mu'un.

²⁰Bé' Ku' sebayang tong irah iteu' awah, bang Akeu' sebayang kepéh tong kekat kelunan éh omok ngelan tong Akeu' neu' ha' tebaraa' éh benara' irah iteu'.

²¹Akeu' sebayang dokoo' irah béé omok pekua' kenin. O Amam, jian irah pu'un petem dalem Tuah, barei' Ka'au pu'un dalem Akeu', ngan Akeu' pu'un dalem Ka'au. Jian irah pu'un pekua' kenin dokoo' kelunan tong tana' iteu' omok ngelan Ka'au nyohoo' Akeu' tuai.

²²Kekat pengaren éh nena' Ko' ngan Ké', Akeu' mena' éh kepéh ngan réh, dokoo' irah omok pekua' kenin barei' Tuah iteu'.

²³Akeu' dalem irah ngan Ka'au dalem Akeu', dokoo' réh béé omok pekua' kenin, dokoo' kekat kelunan tong tana' iteu' omok jam Ka'au éh nyohoo' Akeu' tuai ngan ke' réh jam kepéh Ka'au murung réh barei' Ke' murung Akeu'.

²⁴O Amam, Ka'au pu'un mena' irah ngan Ké', ngan Akeu' keloo' irah pu'un pemung ngan Ké' tong jalan Ké' pu'un, dokoo' irah omok jam pengaren Ké' éh nena' Ko' ngan Ké' uban pu'un Ke' murung Akeu' hun tana' iteu' bé' jak pu'un.

²⁵O Amam éh tigéh, bé' kelunan tong tana' iteu' jam Ka'au, bang Akeu' jam Ka'au ngan irah inah pu'un réh jam Ka'au éh nyohoo' Akeu' tuai.

²⁶Pu'un Akeu' bara' ngaran Ko' ngan réh, ngan Akeu' juk maneu' kenat kepéh, dokoo' barei' Ka'au murung Akeu' nah, irah péh omok jam kemurung Ko' inah pu'un dalem kenin irah kepéh, la'ah dokoo' réh omok jam Akeu' pu'un dalem irah, ha' Néh sebayang.