Read Western Penan YOHANES 21 Bible Online

YOHANES 21 - Western Penan bible

YOHANES 21

¹La'o inah Yésus pepoléng usah Néh kepéh ngan irah bakéh Néh hun réh mokoo' tong baa' Banget Tiberias, ka' jalan Néh pepoléng usah Néh.

²Simon Péterus ngan Tomas, éh keruwah ngaran néh Papin, ngan Natanael éh jin leboo' Kana tong tana' Galilia, ngan rawah anak Sabedeus, ngan duah usah kepéh éh bakéh Yésus, pu'un réh pemung béé.

³ Boh Simon Péterus bara' ngan réh, Akeu' juk tai ngejala', ha' néh. Ha' irah pinaa' nah, Améé' péh juk kivu ke' dat, ha' réh. Boh irah béé tai tuhun lem alut réh, bang dau merem inah, bé' pu'un jah-jah seluang nalaa' réh.

⁴Sioo' ngivun.pu'un Yésus nekedéng tong dirin baa', bang bé' irah jam éh Yésus.

⁵Boh Yésus bara' ngan réh, ka' ha' Néh, O padéé', kineu' pu'un seluang nalaa' keteleu', ha' Néh. Ha' réh, Bé' pu'un.

⁶ Boh Yésus bara' ngan réh, Jian keh ngaléng jala' keh saa' na'au' alut inah, boh seluang pu'un laa' keh, ha' Néh. Boh réh ngaléng jala' réh sinah, bahat mu'un menat jala' réh, bé' réh omok menat éh uban seluang pinaa' lem néh.

⁷Boh jah bakéh Yésus éh kemurung Yésus bara' ngan Péterus, Tuhan ine', ha' néh. Hun Simon Péterus jam éh Tuhan, tioo laa' néh seput néh éh nega' néh bu'un ri' ke' néh memakai éh, tioo neporok éh lem baa' tai tavin Yésus.

⁸Irah bakéh Yésus éh jah jalan alut tai dirin baa' ke' réh mihit jala' éh penoo' neu' seluang pinaa' nah. Bé' réh juu' jin dirin baa' ngioo' éh poléng ha' réh meta kayeu' nah kejuu' néh.

⁹Tovoo' réh musit jin lem alut, boh réh na'at la'ang luten ngan seluang nebah tong néh ngan roti péh pu'un sinah.

¹⁰Boh Yésus bara' ngan réh, Jian keh mihin jelua' seluang éh nalaa' keh nah tuai, ha' néh.

¹¹Boh Simon Péterus masek lem alut kepéh ngan menat jala' inah tong dirin baa'. Pinaa' mu'un seluang ja'au lem néh, kekat néh 153 usah. Na' péh seluang pinaa' kenat nalaa' réh, bé' jala' inah pejéé'.

¹²Ka' ha' Yésus ngan réh, Tuai tam kuman, ha' Néh. Bé' pu'un jah usah makang neteng Éh, séé' ke' Néh, uban réh jam Éh Tuhan mu'un.

¹³Yésus tai alaa' roti ke' Néh mena' éh ngan réh, kenat éh mena' seluang nah kepéh.

¹⁴Iteu' néh keteleu' koléé' Yésus pepoléng usah Néh ngan irah bakéh Néh la'o Néh betéé' jin patai Néh.

¹⁵La'o réh kuman Yésus pané ngan Simon Péterus, ka' ha' Néh, Simon anak Yohanes, kineu' néh, kemurung ko' Akeu' pelapah jin kemurung irah iteu' tong Akeu'? ha' Néh, Ha' Péterus mipa Éh, oo' Tuhan, Ka'au jam akeu' murung Ke', ha' néh. Ha' Yésus ngan néh ko' mihau anak domba Ké', ha' Néh.

¹⁶Keruwah koléé' Yésus neteng ngan néh, Simon anak Yohanes, kineu' néh kemurung ko' Akeu'? Ha' Néh. Ha' Péterus mipa Éh oo' Tuhan ka'au' jam akeu' murung tong ke', ha' néh. Ha Yésus ngan néh, ko' mihau néh domba-domba Ké', ha' Néh.

¹⁷Keteleu' koléé' Yésus neteng éh, Simon anak Yohanes, kineu' néh kemurung ko' Akeu'? Ha Néh. Tusah kenin Péterus uban Yésus neteng éh teleu' koléé', kineu' néh kemurung ko' Akeu'? Ha' nah. Boh Péterus mipa Éh oo' Tuhan Ka'au jam kekat néh, ka'au' jam akeu' murung tong Ke'. Ha' Yésus ngan néh mihau néh domba-domba Ké', ha' Néh.

¹⁸Akeu' bara' mu'un ngan ko', hun ko' si'ik urip rai, ka'au' tengéé' nyelirut ngan lakau semah-semah éh keneloo' ko', bang hun ko' mukun, boh ke' pejai ojoo' ko' ngan kelunan éh jah ngejeret éh ngan mihin ke' tai tong jalan éh bé' keneloo' ko', ha' Néh.

¹⁹Yésus pané kenat bara' tong jalan Péterus matai ke' néh peparen Allah, boh Yésus bara' ngan Péterus kepéh, Jian ke' kivu Akeu', ha' Néh.

²⁰ Boh Péterus pupah ngan na'at jah bakéh Yésus kepéh, bakéh Néh inah, kelunan éh kemurung Yésus éh mokoo' tepih tong Yésus hun réh kuman rai ngan éh neteng Yésus séé' éh kelunan éh juk memalo Éh nah.

²¹Hun Péterus na'at bakéh néh inah, inah iah neteng Yésus, Tuhan, kineu' tong kelunan iteu' vam, ha' néh.

²²Ha' Yésus ngan néh, Mai keh tusah kenin seruh tong iah, hun Ké' keloo' éh murip pah avéé' hun Ké' tuai kepéh, bé' ineu' tong ka'au', jian ke' kivu Akeu', ha' Néh.

²³Neu' ha' Yésus bara' kenat, pinaa' bakéh Néh seruh kelunan inah bé' omok matai, bang bé' Yésus bara' kelunan inah bé' omok matai, bang pu'un Éh bara', Hun Ké' keloo' éh murip pah avéé' hun Ké' tuai kepéh, bé' éh ineu', ha' Néh.

²⁴La'ah akeu' iteu' éh bakéh Néh inah éh bara' kekat iteu' ngan keh, ngan éh nyurat éh lem surat iteu', adang ka'ah jam kekat éh senurat ké' iteu' pu'un éh teneng.

²⁵La'ah pinaa' keto telana' éh naneu' Yésus. Hun kekat néh senurat béé-béé ieng ke' jalan modoo' kekat surat inah tong tana' iteu'.