Read Western Penan YOHANES 5 Bible Online

YOHANES 5 - Western Penan bible

YOHANES 5

¹La'o inah irah Yahudi maneu' jah dau ja'au tong adet sebayang réh ngan pu'un Yésus lakau tai Yérusalem kepéh.

²La'ah tong Yérusalem déhéé' jah usit tapé éh ngaran néh Tapé Domba, pu'un jah baa' éh neu' kelunan, ngaran baa' inah dalem ha' irah Yahudi, Betsaida. Déhéé' baa' inah pu'un lemah lamin.

³Tong lamin inah pinaa' kelunan sakit, irah éh peseu', irah éh paket, ngan irah éh matai keluhat péh. Kekat réh béé mena baa' inah beri'ek,

⁴uban hun meliket tuhun tong baa' inah, boh baa' inah beri'ek. Kenat péh séé'-séé' éh tenah tuhun tong baa' inah la'o baa' nah beri'ek, pelapah éh ma'o jin kesakit néh.

⁵Pu'un jah kelunan sinah éh pu'un sakit teleu' poloo' ayah ta'un tenéh.

⁶Hun Yésus na'at éh pegen kenat ngan kejam Néh éh pu'un sakit lebéé' tenéh, inah Yésus pané ngan néh, ka' ha' Néh, Keloo' ke' ma'o jin kesakit ko' nah, ha' Néh.

⁷Ka' ha' lakei' éh sakit nah mipa éh, O lakei' ja'au bé' pu'un séé'-séé' éh omok mihin akeu' tai baa' inah tovoo' baa' nah beri'ek. Teka ké' juk tai, irah éh tenah tai, ha' néh.

⁸La'ah ka' ha' Yésus ngan néh, Betéé' ke', ko' alaa' mak ko', lakau ke', ha' Néh. Tioo ma'o éh jin kesakit néh, laa' néh mak néh, lakau éh.

⁹Tovoo' inah ke' kelunan inah ma'o.Iah alaa' mak néh tioo lakau. Sioo' Yésus peka'o kelunan sakit nah, inah éh Dau Posot irah Yahudi.

¹⁰ kenat péh irah Yahudi pané ngan lakei' inah, ka' ha' réh, Uban ineu' ke' nyu'un mak ko' kenat tovoo' dau iteu' uban dau iteu' Dau Posot, bé' tekep ke' maneu' kenat tong dau iteu', ha' réh.

¹¹Ka' ha' lakei' inah mipa réh, Lakei' ja'au éh peka'o ku' ri', Iah nyohoo' ku' alaa' mak ké' ngan nyohoo' ku' lakau, ha' néh.

¹²Ka' ha' irah Yahudi kepéh, séé' éh lakei' inah éh nyohoo' ke' kenat, ha' réh.

¹³Bang lakei' inah bé' éh jam séé' éh peka'o éh nah, uban Yésus lepah piso jin sinah uban kelunan pinaa' nah.

¹⁴La'o inah Yésus petemeu' ngan lakei' inah kepéh tong umaa' Allah, ka' ha' Yésus ngan néh, Hun iteu' ka'au' lepah ma'o jin kesakit ko', seruh ke' jian-jian, mai ke' maneu' penyala' la'ah dai pu'un penusah éh pelapah ja'au teneng tong ka'au' kepéh, ha' Néh.

¹⁵La'o inah lakei' inah tai bara' ngan irah Yahudi tong Yésus éh peka'o éh.

¹⁶Naneu' ha' lakei' inah kenat, inah irah merek ngan Yésus, uban Néh pu'un peka'o kelunan tong Dau Posot péh.

¹⁷Boh Yésus pané kepéh ngan réh, ka' ha' Néh, Tamen Ké' bé' éh posot jin kekat penganeu' Néh, kenat péh Akeu', ha' Néh.

¹⁸Naneu' ha' Néh kenat, merek mu'un-mu'un réh ngan irah juk mematai Éh mu'un, bé' makat uban Néh ngelapah tong Dau Posot réh awah, bang neu' ha' Néh bara' Allah éh Tamen Néh, inah Iah bara' Iah péh pekua' ngan Allah.

¹⁹La'ah ka' ha' Yésus mipa réh, Akeu' bara' mu'un ngan keh, Akeu' éh Anak Allah, bé' Ku' maneu' ineu'-ineu' kivu kenin Ké' tengéé', bang kekat éh neu' Tamen Ké' éh ta'an Ké', inah awah ke' éh neu' Ké'. Kekat penganeu' Tamen Ké', inah ke' éh neu' Ké' éh Anak Néh kepéh.

²⁰Uban Tamen Ké' murung Akeu' éh Anak Néh, kenat péh Iah pekelenaa' kekat éh neu' Néh ngan Ké'. La'ah Iah juk pekelenaa' kereja' éh pelapah ja'au jin kekat iteu' ngan Ké', boh keh béé kenin.

²¹Barei' Tamen Ké' purip kekat kelunan éh matai, kenat péh Akeu' éh Anak Néh omok purip séé'-séé' éh keneloo' Ké'.

²²Tamen Ké' bé' éh ngukum séé'-séé' péh. Pu'un éh mena' penyukat Néh ngan Ké' éh Anak Néh, ke' ké' omok ngukum réh.

²³Pu'un Éh maneu' kenat dokoo' kekat kelunan omok ngajung Akeu' éh Anak Néh, pekua' irah ngajung Tamen Ké'. séé'-séé' éh bé' ngajung Akeu' éh Anak Néh, bé' éh ngajung Tamen Ké' éh nyohoo' Akeu' tuai, ha' Néh.

²⁴Akeu' bara' mu'un ngan keh, séé'-séé' éh mihau ha' Ké' ngan éh ngelan tong Iah éh nyohoo' Akeu' tuai, iah pu'un urip éh pelinguh, ngan bé' éh teneng ukum uban néh lepah musit jin jalan éh mihin éh matai tai tong jalan éh mihin éh murip.

²⁵Akeu' bara' mu'un ngan keh, pu'un jah sioo' temurei', éh mu'un néh pu'un éh lepah avéé' tenéh, inah éh, jaka' kekat kelunan éh matai omok réh menéng ha' Anak Allah, ngan kekat irah éh menéng ha' Néh nah, murip réh kepéh.

²⁶Barei' Tamen Ké' pu'un purip kekat ineu'-ineu' péh, kenat péh Iah mena' penyukat Néh ngan Anak Néh, dokoo' Néh omok purip ineu'-ineu' kepéh.

²⁷Pu'un Éh mena' penyukat Néh ngan Anak Néh dokoo' Néh omok ngukum réh, uban Anak Néh inah, Iah péh Anak Kelunan.

²⁸Mai keh béé kenin tong ha' Ké' iteu', uban temurei' kepéh adang kekat kelunan éh lepah matai omok menéng ha' Ké',

²⁹ boh réh pu'un musit jin tanem. Kekat kelunan éh pu'un maneu' jian, pu'un réh betéé' murip, ngan kekat irah éh lepah maneu' sa'at, pu'un réh betéé' ke' réh teneng ukum, ha' Yésus ngan réh.

³⁰Ka' ha' Yésus kepéh, Bé' Akeu' omok maneu' ineu'-ineu' kivu kenin Ké' tengéé', hun Ké' ngukum kelunan, inah Akeu' ngukum réh pekua' éh sohoo' Allah ngan Ké'. Kenat éh ukum neu' Ké' inah pu'un teneng, uban bé' Ku' kivu kenin Ké' tengéé', bang Akeu' kivu kekat sohoo' Iah éh nyohoo' Akeu' tuai.

³¹Hun néh Akeu' awah bara' tong usah Ké', bé' tekep keh ngelan ha' Ké' kenat, uban jah Akeu' awah éh bara' éh kenat.

³²Bang pu'un jah usah kepéh éh bara' tong Akeu' ngan Akeu' jam kekat éh benara' Néh inah adang néh pu'un teneng mu'un.

³³ Pu'un keh nyohoo' kelunan tai tavin Yohanes rai, iah péh bara' kekat ha' Ké' inah pu'un teneng.

³⁴Na' péh Ku' bara' kenat tong Yohanes, bé' Ku' ngelan ha' kelunan awah éh bara' Akeu' pu'un pekua' ngan Allah, bang Akeu' bara' kenat tong Yohanes dokoo' keh omok alaa' urip.

³⁵Yohanes nah, iah barei' jah lapung éh mahang ngan peséng jian, ngan kelebéé' néh pu'un kenat, ka'ah péh murung mokoo' tong nawa néh.

³⁶Bang inah kepéh kekat penganeu' Ké' éh neu' Ké' kivu sohoo' Tamen Ké', kekat inah péh nojoo' Akeu' pu'un jin Allah mu'un. Uban kekat penganeu' Ké' pekelenaa' adang Tamen Ké' Iah éh nyohoo' Ku' tuai, penganeu' Ké' inah pelapah lenaa' éh jin éh benara' Yohanes tong Akeu'.

³⁷ La'ah Tamen Ké' éh nyohoo' Akeu' tuai, Iah péh bara' Akeu' éh Anak Néh. Jah-jah koléé' péh bé' keh pu'un menéng ha' Néh, ngan jah-jah koléé' péh, bé' éh poléng ta'an keh,

³⁸ngan kekat ha' Néh bé' éh pu'un petem lem keh uban bé' keh keloo' ngelan tong Akeu' éh sohoo' Néh tuai.

³⁹Pu'un keh pekalai tong surat Allah, uban keh seruh neu' kekat ha' tebaraa' inah, adang keh omok alaa' urip pelinguh. Kekat ha' lem surat Allah pu'un éh bara' tong Akeu',

⁴⁰na' péh kenat, bé' keh keloo' tavin Akeu' dokoo' keh omok alaa' urip, ha' Néh.

⁴¹Ha' Yésus kepéh, Bé' Akeu' keloo' kenajung kelunan awah.

⁴²Bang Akeu' jam adang ka'ah keloo' kenajung kelunan awah, ngan bé' keh murung Allah.

⁴³Pu'un Ku' tuai kivu sohoo' Tamen Ké', bang bé' keh keloo' alaa' Ku'. Kelunan éh jah éh pu'un tuai kivu kenin néh tengéé', pu'un keh alaa' réh.

⁴⁴Ka'ah keloo' kenajung kelunan awah, bé' keh keloo' kenajung Allah. Hun néh kenat, kineu' jalan keh omok ngelan tong Akeu', adang keh bé' omok.

⁴⁵Mai keh seruh Akeu' juk pesala' keh ngan Tamen Ké', pu'un jah usah éh pesala' keh, inah éh Musa, éh kenelan keh omok purip keh.

⁴⁶Bang hun keh pu'un ngelan tong ha' Musa mu'un, adang keh pu'un ngelan tong Akeu' kepéh, uban Musa nah lepah nyurat bara' tong Akeu'.

⁴⁷Bang hun keh bé' ngelan tong kekat ha' éh senurat Musa nah, kineu' jalan keh omok ngelan tong ha' Ké' kepéh, ha' Yésus nah.