Read Western Penan YOHANES 8 Bible Online

YOHANES 8 - Western Penan bible

YOHANES 8

¹La'o inah moléé' kekat réh béé, Yésus tai tengéé' tong tokong Saitun.

²Dau dileu' tai Yésus masek kepéh tong umaa' Allah, pinaa' kelunan tavin Éh, mokoo' Éh ke' Néh nebaraa' réh.

³La'ah kelunan Parisi ngan irah guru éh nebaraa' tong sohoo' lem Surat Musa, mihin jah redo éh petuyang ke' réh nyohoo' éh nekedéng belah réh béé.

⁴La'ah ha' irah ngan Yésus, Guru, améé' alaa' redo iteu' lem néh petuyang.

⁵ Hun néh pu'un kelunan petuyang kenat, ha' Musa lem surat néh, nyohoo' mé' memateu' éh. Bang kineu' ha' Ko' kepéh.

⁶Pu'un réh neteng Yésus kenat, uban réh keloo' pesala' Éh awah, bang bé' éh ke' réh neteng éh uban réh juk jam éh mu'un. Bang Yésus madaa' ke' Néh nyurat palaa' buaa' ojoo' Néh tong tana'.

⁷Uban irah to neteng-neteng Éh, nekedéng Éh pejek kepéh ngan pané ngan réh, ha' Néh séé' belah ka'ah éh bé' pu'un penyala', jian éh ngaléng bateu' tong redo iteu' tenah, ha' Néh.

⁸Boh Éh madaa' nyurat tong tana' kepéh.

⁹Hun irah menéng ha' Néh kenat, musit réh béé pejah-jah usah, éh tenah musit jin irah, iah éh ja'au urip jin kekat réh pah avéé' tong kekat réh béé. Yésus awah éh pu'un sinah keto, ngan redo inah éh pu'un nekedéng sinah.

¹⁰Yésus nekedéng pejek kepéh ke' Néh pané ngan redo inah, ka' ha' Néh. Kemah kekat kelunan éh juk ngukum ke' ri'? ha' Néh.

¹¹Ha' redo inah, Guru bé' pu'un ha néh. Ha' Yésus ngan néh kepéh, Jian, Akeu' péh bé' Akeu' ngukum Ka'au. Tai ke' ngan mai ke' maneu' penyala' kepéh ha' Néh.

¹² Ka' ha' Yésus ngan réh kepéh, Akeu' iteu' rema tana' iteu', séé'-séé' éh kivu Akeu' bé' éh lakau dalem merem, adang néh pu'un rema jin Akeu' éh purip réh, ha' Néh.

¹³ Ka' ha' irah Parisi mipa Éh, inah Ke' bara' tong usah Ko' tengéé', bé' améé' ngelan tong ha' Ko' kenat, ha' réh.

¹⁴Ka' ha' Yésus mipa réh, Oo', na' péh Akeu' bara' tong usah Ké' tengéé', adang kekat ha' Ké' inah pu'un teneng, uban Akeu' jam jin semah Ku' tuai rai ngan semah Ku' juk tai kepéh. Bé' ka'ah jam jin semah Ku' tuai ngan bé' keh jam semah Ku' juk tai kepéh.

¹⁵Tong kekat jalan éh keh petuneng kelunan, pu'un keh maneu' kenat kivu éh seneruh kelunan awah, Bé' Akeu' pu'un petuneng séé'-séé' péh.

¹⁶Bang hun Ké' pu'un bara' réh sala', bé' éh ha' Ké' awah, adang pu'un éh kenat mu'un. Adang kekat ha' Ké' teneng lem kekat éh benara' Ké' sala' nah, uban bé' éh Akeu' tengéé' éh bara' éh kenat, uban Tamen Ké' éh nyohoo' Akeu' tuai, Iah pu'un pemung ngan Ké', ha' Néh.

¹⁷ Ka' ha' Néh kepéh, Pu'un ha' lem Surat Musa éh bara' ka', Hun pu'un duah usah éh bara' tong ineu'-ineu' éh ta'an roh, hun ha' roh pu'un pekua', boh éh poléng ha' roh pu'un teneng mu'un.

¹⁸Akeu' bara' tong usah Ké' tengéé', ngan Tamen Ké' Éh nyohoo' Akeu' tuai, Iah péh bara' tong Akeu', ha' Néh.

¹⁹Ka' ha' réh neteng Éh Semah Tamen Ko', ha' réh. Ha' Yésus ngan réh kepéh, Bé' keh jam Akeu' ngan bé' keh jam Tamen Ké'. Hun keh jam Akeu' adang keh omok jam Tamen Ké' kepéh, ha' Néh.

²⁰Kenat ha' Yésus ngan réh tovoo' Néh nebaraa' réh tong umaa' Allah danii' déhéé' jalan réh modoo' rigit Tuhan. Bang bé' pu'un séé'-séé' éh tai ngamit Éh uban bé' jak sukup jaka' Néh.

²¹Ka' ha' Yésus ngan réh kepéh, Pu'un Ku' juk piso jin siteu' da', boh keh pu'un pitah Akeu' kepéh, bang ka'ah matai lem penyala' keh awah. Bé' keh omok tai tong jalan Ké' éh juk tai nah, ha' Néh.

²²Ka' ha' irah Yahudi, Kineu' Éh, pu'un Éh juk mematai usah Néh tengéé' uban ka' ha' Néh bara', Bé' keh omok tai tong jalan Ké' juk tai nah, ha' irah Yahudi nah.

²³Ka' ha' Yésus mipa réh, Ka'ah pu'un jin tana' iteu' awah, bang Akeu' pu'un jin bau. Ka'ah pu'un kivu kenin kelunan tong tana' awah, bé' Akeu' kivu kenin kelunan tong tana'.

²⁴Kenat péh Akeu' bara' ngan keh ri', adang ka'ah matai lem penyala' keh awah, ngan hun keh bé' ngelan Akeu' pu'un jin Allah, adang keh matai lem penyala' keh awah, ha' Néh.

²⁵Ka' ha' réh kepéh, séé' ke' Néh, ha' réh. Ha' Yésus mipa réh, Pekua' éh benara' Ké' jin bu'un rai.

²⁶Pinaa' ha' kepéh éh juk benara' Ké' ngan keh, ngan pinaa' jalan keh kepéh éh juk benara' Ké' keh sala'. Bang Iah éh nyohoo' Ku' tuai rai, pu'un Éh teneng, ngan kekat ha' éh nenéng Ké' jin Iah, inah ke' éh benara' Ké' ngan kekat kelunan pah tipo tana', ha' Néh.

²⁷Bang bé' réh jam inah Iah bara' tong Tamen Néh.

²⁸Boh Yésus bara' ngan réh kepéh, ka' ha' Néh, La'o keh metéé' Anak Kelunan tong salib, boh keh pu'un jam adang Akeu' pu'un tuai jin Allah, boh keh pu'un jam bé' Akeu' maneu' ineu'-ineu' kivu kenin Ké' tengéé', bang pu'un Ku' bara' kekat-kekat éh benara' Tamen Ké' ngan Ké'.

²⁹La'ah Iah éh nyohoo' Ku' tuai, pu'un Éh pemung ngan Ké', ngan bé' Éh bet Ku', uban Ké' ngelayau maneu' kekat pengeloo' Néh, ha' Yésus ngan réh.

³⁰Pinaa' kelunan éh menéng ha' Yésus bara' tong kekat inah ngelan tong Néh.

³¹La'ah ka' ha' Yésus ngan irah kelunan Yahudi éh ngelan tong Néh, Hun keh mihau ha' Ké' boh keh omok bakéh Ké' mu'un.

³²La'ah ka'ah omok jam kekat éh benara' Ké' tong Allah pu'un éh teneng, ngan neu' pengeteneng inah, omok keh pelepu, ha' Néh.

³³ Ka' ha' réh mipa Éh kepéh, Améé' éh pohoo' jin Abraham ngan bé' améé' keripen kelunan séé'-séé' péh. Kineu' Ko' bara' améé' omok pelepu, bé' améé' jam ha' Ko' kenat, ha' réh.

³⁴Ka' ha' Yésus ngan réh, Akeu' bara' mu'un ngan keh, séé'-séé' éh maneu' penyala', iah éh keripen penyala'.

³⁵Kelunan éh ripen bé' éh pu'un tong lamin pelinguh, hun réh juk bet éh omok réh bet éh awah, bang anak usah réh inah éh pu'un tong lamin réh pelinguh.

³⁶Hun néh Anak Allah éh ngelepu keh, boh keh pelepu mu'un.

³⁷Akeu' jam ka'ah pohoo' Abraham, na' péh kenat pu'un keh pitah jalan juk mematai Akeu' uban bé' keh keloo' alaa' ha' tebaraa' Ké' lem kenin keh mu'un.

³⁸Pu'un Akeu' bara' tong kekat éh benara' Tamen Ké' ngan Ké', bang ka'ah péh maneu' kekat éh sohoo' tamen keh ngan keh, ha' Yésus ngan réh.

³⁹Ka' ha' réh mipa Éh kepéh Abraham iah éh tamen mé', ha' réh. Ka' ha' Yésus kepéh, Hun keh anak Abraham mu'un, adang keh pu'un maneu' pekua' éh naneu' Abraham.

⁴⁰Pu'un Akeu' bara' tong kekat éh teneng éh kejam Ké' jin Allah, na' péh kenat, pu'un keh pitah jalan juk mematai Akeu'. Abraham bé' éh maneu' kenat.

⁴¹Adang ka'ah pu'un maneu' pekua' barei' éh neu' tamen keh, ha' Néh. Ka' ha' réh, Bé' améé' jin pohoo' kelunan éh bavah, jah awah tamen mé', inah éh Allah, ha' réh.

⁴²Ka' ha' Yésus kepéh, Hun néh mu'un Allah éh Tamen keh, adang keh pu'un murung Akeu', uban Akeu' pu'un tuai jin Allah, kenat éh ke' Akeu' pu'un siteu'. Bé' Akeu' tuai kivu kenin Ké' tengéé', bang Iah Éh nyohoo' Akeu' tuai.

⁴³Uban ineu' keh bé' omok jam tong ha' éh benara' Ké' nah? Éh ke' néh kenat uban keh leko menéng ha' Ké'.

⁴⁴Ka'ah anak tamen keh Sitan, ngan pu'un keh kivu kekat pengeloo' tamen keh. Jin bu'un-bu'un sahau péh Sitan mematai kelunan, bé' éh keloo' alaa' saa' éh teneng, uban bé' pu'un ineu'-ineu' éh teneng lem néh. Hun néh pané, pu'un éh pané kenyo awah, pohoo' néh kenyo, ngelayau éh kenyo kenat, ngan inah éh tamen kekat kelunan éh kenyo.

⁴⁵Bé' Akeu' pané kenyo, kenat péh keh bé' keloo' ngelan tong Akeu'.

⁴⁶Séé' jin belah keh éh omok nojoo' penyala' Ké'. Pu'un Akeu' bara' tong kekat éh teneng, uban ineu' keh bé' ngelan tong Akeu'.

⁴⁷Kelunan éh pu'un tuai jin Allah keloo' éh menéng kekat ha' Allah, bang bé' keh jin Allah, kenat éh keh leko ngan bé' keloo' menéng ha' Néh, ha' Yésus.

⁴⁸Ka' ha' irah Yahudi ngan Yésus kepéh, teneng mu'un ha' améé' bara' ke' kelunan Samaria rai, pu'un Ke' nasek balei', ha' réh.

⁴⁹Ka' ha' Yésus kepéh, Bé' Akeu' nasek balei', Akeu' seva' Tamen Ké' bang bé' ka'ah seva' Akeu'.

⁵⁰Bé' Akeu' keloo' kenajung kelunan. Tamen Ké' Iah Éh ngajung Akeu' ngan pu'un Éh ngukum kelunan éh bé' ngajung Akeu'.

⁵¹Akeu' bara' mu'un ngan keh, séé'-séé' éh mihau ha' tebaraa' Ké', bé' éh omok matai, ha' Néh.

⁵²Ka' ha' irah Yahudi kepéh, Nah, hun iteu' kejam mé' mu'un, Ka'au nasek balei'. Abraham ngan irah Nabi Tuhan, pu'un réh lepah matai, bang ha' Ko' nah, séé'-séé' éh mihau ha' tebaraa' Ké' bé' éh omok matai.

⁵³Tepun mé' Abraham pu'un éh matai tenéh, kineu' Ke', Ka'au éh ja'au ngaran jin Abraham seneruh Ko'. Kekat irah nabi Tuhan matai béé réh, kineu' ke' kunah Ko', ha' réh.

⁵⁴Ka' ha' Yésus kepéh, Hun Ké' ngajung usah Ké' tengéé', bé' pu'un gunah néh kenat, bang Tamen Ké' Iah pu'un ngajung Akeu', Tamen Ké' éh benara' keh, Allah éh kenelan keh.

⁵⁵Bé' ka'ah jam Éh, bang Akeu' jam Éh. Hun Ké' bara' Ku' bé' jam Éh, adang Akeu' kenyo awah, pekua' barei' ka'ah nah. Adang Akeu' jam Éh ngan pu'un Ku' kivu kekat sohoo' Néh.

⁵⁶Tepun keh Abraham murung kenin néh na'at savéé' Ké', pu'un éh na'at éh ngan jian kenin, ha' Néh.

⁵⁷Ha' irah Yahudi ngan Néh kepéh, Bé' urip Ko' avéé' lemah poloo' ta'un, kineu' Ke' jam Abraham, ha' réh.

⁵⁸Ka' ha' Yésus kepéh, Akeu' bara' mu'un ngan keh, Hun Abraham bé' jak pu'un péh, Akeu' pu'un tenéh, ha' Néh.

⁵⁹Boh réh alaa' bateu' ke' réh juk memateu Éh bang Yésus kelim ngan musit jin umaa' Allah.