Read Western Penan PENGANEU' LAWAH 20 Bible Online

PENGANEU' LAWAH 20 - Western Penan bible

PENGANEU' LAWAH 20

¹Hun penusah inah lepah ma'o, pu'un Paulus tebai kekat kelunan éh ngelan tong Tuhan ke' néh ngereken kenin réh ngan bara' tabi' ngan réh teka néh lakau. Boh éh lakau kepéh tai tana' Makedonia.

²Lakau éh tai siget leboo' tong tana' inah ke' néh ngereken kenin réh neu' kuraa'-kuraa' ha' tebaraa' néh. La'o inah lakau éh tai tana' Akhaya kepéh,

³pu'un éh mokoo' ngan réh sinah teleu' laséh kelebéé'. Hun néh teven juk peleka tai tana' Siria, iah jam irah Yahudi pakat juk maneu' éh kepéh, pelapah éh moléé' murin pajau jin tana' Makedonia.

⁴La'ah Sopater anak Pirus éh jin leboo' Berea kivu éh, kenat péh Aristarkhus rawah Sekundus, éh jin Tesalonika leboo' ja'au, ngan Gayus jin Derbe leboo' ja'au, ngan Timotius réh teleu' Tikhikus ngan Tropimus, jin tana' Asia.

⁵Pu'un réh lakau jalan tana' tai tenah mena améé' tong Troas leboo' ja'au déhéé' baa' banget.

⁶La'o Dau Ja'au Roti éh bé' pu'un tawan pekevat inah, lakau mé' jalan kapen jin Pilipi. Lemah dau la'o inah avéé' mé' tong leboo' Troas, sinah mé' mokoo' jah batang migu kelebéé'.

⁷Dau migu inah, tovoo' mé' pelelong kuman ngan sebayang, pu'un Paulus nebaraa' réh, kebit ha' tebaraa' néh avéé' lepok merem, uban néh juk lakau kepéh dau rema da'.

⁸Pu'un pinaa' pelita' tong lamin éh saa' bau éh jalan mé' petipun nah.

⁹La'ah jah lakei' lemanai ngaran néh Eutikhus, pu'un éh menyun tong sikan lamin. Uban Paulus pané lebéé', iah nuro' tioo jenek mu'un ga' néh iah pelohoo' tai tana' jin tevan lamin éh keteleu' nah.Hun réh metéé éh iah lepah matai.

¹⁰Pelapah Paulus tuhun makung ngan mikop éh, ka' ha' néh, Mai keh besau kenin uban pu'un laset néh keto, ha' néh ngan réh.

¹¹La'o inah Paulus taket kepéh boh éh petulat roti ngan irah pemung kuman. La'o inah lebéé éh pané ngan réh, pah avéé' maten dau musit boh éh peleka.

¹²La'ah pu'un réh alaa' lakei' lemanai ri' moléé', murip éh, jian kenin irah béé.

¹³Lakau mé' tenah jalan baa' tai leboo' Asos, ke' mé' juk alaa' Paulus jin Asos nah, uban ha' néh bu'un iah juk lakau jalan tana' avéé' sinah.

¹⁴Hun Paulus avéé' tong leboo' Asos, améé' alaa' éh masek lem kapen lakau kepéh tai leboo' Metilene.

¹⁵Jin sinah améé' lakau kepéh ngan dau rema inah avéé' mé' tong pulau Khios, dau rema inah kepéh avéé' mé' tong Samos, jah dau la'o inah kepéh avéé' mé' tong Miletus.

¹⁶La'ah Paulus memekat kenin néh ke' néh lakau pajau jin Épesus' dai néh lebéé' mokoo' tong tana' Asia. Iah juk ngerigah avéé' tong Yérusalem, bé' jak dau Pentakosta.

¹⁷Jin Miletus Paulus nyohoo' kelunan tai Épesus tebai kekat pengeja'au sidang tuai temeu' ngan néh sinah.

¹⁸Hun kekat kelunan inah tuai, boh éh bara' ngan réh, ka' ha' néh, Ka'ah jam tong kekat kereja' ké' ngan barék ké' belah keh jin dau bu'un ké' avéé' tong tana' Asia iteu' rai.

¹⁹La'ah dawai kenin ké' avéé' baa' maten ké' musit ku' kereja' ngan Tuhan rai, uban pinaa' arong penusah ké' neu' irah Yahudi éh pakat maneu' ku'.

²⁰La'ah kekat ha' tebaraa' éh omok ngegahang keh, bé' ku' bé' bara' éh ngan keh, bang pu'un ku' bara' éh tong jumen kekat kelunan, kenat péh tong siget-siget lamin péh.

²¹Pu'un ku' nebaraa' pohoo' Yahudi ngan irah éh tengéé' pohoo' péh, nyohoo' réh piso jin kesa'at réh ngan tavin Allah ngan ngelan tong Tuhan Yésus Kristus.

²²Hun iteu' akeu' juk kivu sohoo' Sahéé' Ni'ai tai Yérusalem, bé' ku' jam ineu' éh juk pu'un tong ku' sitai da'.

²³Bang pu'un Sahéé' Ni'ai bara' lem kenin ké', tong siget-siget leboo' adang réh juk nutup ngan juk petusah akeu'.

²⁴ Bang bé' akeu' paréé' urip ké', sokoh ke' ku' omok pesukup kekat kereja' éh na' Tuhan Yésus ngan ké', inah éh, bara' Rengah Jian tong penika Allah.

²⁵Pu'un ku' lakau belah keh rai, ngan nebaraa' keh tong Allah éh pengeja'au ngan mihau keh, kejam ké' bé' ka'ah omok na'at akeu' la'o iteu' kepéh, bé' akeu' pu'un peliwet ngan keh kepéh.

²⁶Uban néh kenat dau iteu' akeu' bara' mu'un ngan keh, hun néh pu'un séé'-séé' jin belah keh éh tawang, bé' éh uban ké' bé' nebaraa' éh,

²⁷uban bé' ku' melim jelua' ha' tebaraa', bang pu'un ku' lepah bara' kekat jalan Allah ngan keh.

²⁸Jian keh mihau kenin keh mu'un-mu'un, kenat péh mihau kekat domba Tuhan éh nena' Sahéé' Ni'ai ngan keh. Jian keh mihau sidang Allah mu'un-mu'un, éh anah nah neu' dahaa' Anak Néh.

²⁹La'ah akeu' jam la'o ké' piso, pu'un kuraa' kelunan éh barei' bekuleu' éh luvaa' masek belah keh kepéh. Bé' réh jam pika domba Tuhan inah.

³⁰La'ah jin belah ka'ah ke' pu'un kuraa' kelunan juk betéé' nalau keh jin ha' tebaraa' éh teneng, ke' réh pepetat kelunan éh ngelan tong Tuhan jin pengelan réh ke' réh kivu irah kepéh.

³¹Uban néh kenat mavaa' keh jian-jian, ngan seruh keh jian-jian, uban teleu' ta'un tenéh, pu'un ku' nebaraa' keh siget dau ngan siget merem pah avéé' baa' maten ké' musit mu'un.

³²Hun iteu' akeu' mejai keh ngan Allah, ngan ha' tebaraa' Néh éh bara' tong penika Néh. Iah pu'un penyukat ngereken keh ngan mena' kekat pengejian Néh ngan keh éh pu'un nena' Néh ngan kekat kelunan éh anah nah.

³³Bé' akeu' magat livah ngan pakai kelunan.

³⁴Ka'ah péh jam usah ké' tengéé' lepah kereja' pesukup kekat éh bé' pu'un sukup ngan ké', kenat péh ku' pesukup kekat éh bé' sukup ngan kekat kelunan éh ngan ké'.

³⁵Dalem kekat éh neu' ké' inah, inah akeu' bara' adang tekep lu' gahang kereja' nolong kelunan éh lemoo', uban pu'un Tuhan Yésus bara' ka', Kelunan éh mena' pelapah jian kenin néh jin irah éh alaa' éh, ha' Néh. Kenat ha' Paulus ngan kekat pengeja'au jin sidang Épesus.

³⁶La'o Paulus pané kenat, boh éh ngejekuu' lep néh ke' néh sebayang pemung ngan kekat réh béé.

³⁷Pu'un réh nyekavit Paulus ngan mangaa' besau uban réh petat.

³⁸Besau kenin réh neu' ha' néh bara', bé' réh pu'un na'at éh kepéh. Boh réh kivu éh avéé' tong kapen.