Read Western Penan PENGANEU' LAWAH 23 Bible Online

PENGANEU' LAWAH 23 - Western Penan bible

PENGANEU' LAWAH 23

¹Pu'un Paulus kepuh kekat irah Komiti sebayang Yahudi, ka' ha' néh, O kekat tamen ngan kekat padéé' ké', bé' pu'un ineu'-ineu' éh lem kenin ké' éh omok pesala' ku' tong jumen Allah jin bu'un urip ké' pah avéé' dau iteu' péh.

²La'ah Ananias éh Imam éh pengeja'au kekat imam, nyohoo' kelunan éh nekedéng déhéé' Paulus mabok ujun néh.

³ La'ah ka' ha' Paulus ngan néh, Allah juk ngukum ke', ka'au' barei' boloo' senang pinaa' beték bang tetok awah. Pu'un ke' mokoo' juk ngukum akeu' kivu sohoo' lem Surat Musa, bang pu'un ke' ngelapah tong ukum inah uban ko' nyohoo' réh mabok ujun ké', ha' Paulus.

⁴Ka' ha' kelunan éh nekedéng déhéé' Paulus nah, Kineu' ke' pané kenat nyesa'at Imam éh pengeja'au kekat imam Allah lu', ha' néh ngan Paulus.

⁵ Ka' ha' Paulus mipa éh, O kekat padéé' ké', bé' akeu' jam iah éh Imam éh pengeja'au kekat imam, uban pu'un jah ha' lem surat Allah éh bara' ka', Mai keh ngesa'at iah éh pengeja'au keh, ha' néh.

⁶ Hun Paulus jam jelua' irah Komiti sebayang Yahudi nah kelunan éh kivu adet Saduki ngan jelua' kivu adet Parisi, pelapah éh pané ngan ja'au ha' ngan irah Komiti sebayang Yahudi, ka' ha' néh, O kekat tamen ngan kekat padéé' ké', akeu' iteu' péh kelunan Parisi ngan anak kelunan Parisi. La'ah uban ké' ngelan kelunan matai omok betéé' murip kepéh, inah ké' kenukum réh ka', ha' néh.

⁷Hun réh menéng ha' néh kenat, pelapah irah Parisi ngan irah Saduki pepaneu', pah avéé' réh petengéé' kenin kepéh.

⁸ Uban kelunan Saduki bara' bé' pu'un pengebetéé' jin patai, ngan bé' pu'un meliket ngan sahéé' péh, bang kelunan Parisi ngelan kekat inah pu'un.

⁹Pelapah ja'au ha' réh pepaneu' kepéh ngan pu'un kuraa' kelunan Parisi éh nebaraa' tong sohoo' lem Surat Musa nekedéng ngan pesakat, ka' ha' réh, Bé' améé' jam ineu'-ineu' éh kesa'at kelunan iteu'. Barang pu'un jah sahéé' éh pané ngan néh, barang meliket péh, ha' réh.

¹⁰Uban réh paneu' ngan merek mu'un kenat, inah pengeja'au jah ibu seradu nah medai réh mesa Paulus. Kenat iah nyohoo' seradu tai alaa' Paulus jin belah réh ngan mihin éh tai umaa' peritah.

¹¹Tong keruwah merem nekedéng Tuhan déhéé' Paulus ke' Néh bara' ngan néh, ka' ha' Néh, reken kenin ko', uban pekua' ko' bara' Akeu' tong Yérusalem rai, kenat péh tekep ke' bara' Akeu' tong leboo' Rum kepéh, ha' Tuhan ngan Paulus.

¹²Hun dau rema kepéh kelunan Yahudi petipun ngan pakat, ngan pekua' kenin pesupa bara', Bé' irah kuman, bé' irah mesep péh pah avéé' Paulus penatai réh.

¹³La'ah mutaa' pat poloo' usah réh éh pakat ngan pesupa kenat.

¹⁴Tai réh tavin irah pengeja'au imam ngan irah pengeja'au kelunan Yahudi, ke' réh bara' ngan réh, ka' ha' réh, Améé' pekua' kenin pesupa mu'un, bé' améé' keloo' kuman ineu'-ineu' péh pah avéé' Paulus penatai mé'.

¹⁵Uban néh kenat jian ka'ah ngan irah Komiti sebayang Yahudi nyohoo' pengeja'au jah ibu seradu mihin Paulus ngan ka'ah, barei' keh juk pané ngan néh ke' néh seruh keh keloo' peresa' éh lenaa' mu'un. Bang bé' mena Paulus avéé' siteu' omok mé' mematai éh belu'an jalan nah, ha' irah éh pesupa nah.

¹⁶Bang pu'un jah anak éh anak padéé' Paulus éh redo, menéng ha' réh pané kenat, pelapah éh tai tong umaa' peritah ke' néh bara' ngan Paulus.

¹⁷La'ah Paulus tebai jah kelunan éh pengeja'au jah ato seradu ke' néh bara' ngan néh, ka' ha' néh, Jian ke' mihin anak iteu' tavin lakei' ja'au éh pengeja'au jah ibu seradu, uban pu'un jah ha' éh juk benara' néh ngan néh ne', ha' Paulus.

¹⁸ La'ah iah mihin éh tai pengeja'au seradu nah, ka' ha' néh, Paulus éh tenutup rai pu'un éh nyohoo' ku' mihin anak iteu' ngan ko', uban pu'un jah ha' éh juk benara' néh ngan ko', ha' néh.

¹⁹La'ah pengeja'au seradu nah ngamit ojoo' anak inah ke' néh mihin éh tengéé' ke' néh neteng éh, ka' ha' néh, Ineu' éh juk benara' ko' ngan ké' kei, ha' néh.

²⁰Ka' ha' anak inah ngan néh, Pu'un kelunan Yahudi lepah pakat juk menyat ke' mihin Paulus tai irah Komiti sebayang Yahudi kepéh sagam, barei' réh keloo' neteng éh pelapah lenaa' kepéh nah.

²¹ Bang mai ke' kivu sohoo' réh da', uban mutaa' pat poloo' réh pu'un kelim belu'an jalan ke' réh mavang éh. Pu'un réh lepah pesupa bé' keloo' kuman ngan mesep pah avéé' réh pu'un mematai Paulus. Hun iteu' kekat réh lepah petenup mena ha' ko' awah, ha' anak inah bara' ngan pengeja'au seradu nah.

²²Ka' ha' pengeja'au seradu inah ngan néh, Mai ke' bara' ha' éh benara' ko' ngan ké' iteu' ri' ngan irah éh jah kepéh da', ha' néh. Boh éh nyohoo' anak inah moléé'.

²³La'ah lakei' ja'au éh pengeja'au jah ibu seradu nah tebai duah usah éh pengeja'au jah ato seradu kepéh ke' néh bara' ka' ngan roh, Jian keh nyohoo' kekat seradu petenup ke' réh tai leboo' Kaisarea. Duah ato seradu éh omok lakau tana', ngan tujuu' poloo' kepéh éh jalan kuda,

²⁴Jian réh peleka pukun pien merem iteu' da' ngan mihin kuda' kepéh éh jalan Paulus ke' réh omok mihin éh tavin Peliks éh pengeja'au peritah nah, dai réh maneu' éh belu'an jalan nah da', ha' néh.

²⁵La'ah pu'un éh maneu' jah surat, ka' ha' néh.

²⁶Akeu' Klaudius Lisias bara' tabi' ngan ko' Peliks, éh pengeja'au mé'.

²⁷La'ah pu'un irah Yahudi ngamit Paulus ke' réh juk mematai éh. Hun ké' jam iah pu'un lem nihau Rum boh ku' tai alaa' éh.

²⁸La'ah uban ké' juk jam uban ineu' réh maneu' éh kenat, inah akeu' mihin éh tai tavin Komiti sebayang Yahudi.

²⁹Inah awah éh kejam ké' tong iah, irah pu'un pesala' éh uban ha' tebaraa' néh tong adet réh tengéé', bang bé' pu'un jah ineu' péh éh ke' néh tekep kenukum réh matai ngan tenutup péh.

³⁰Hun ké' jam irah pu'un pakat pitah jalan ke' réh juk mematai éh, inah akeu' nyohoo' éh tai tavin ka'au' kepéh. Pu'un ku' nyohoo' irah éh pesala' éh nah bara' kekat kesa'at néh ngan ko' kepéh. Kenat ha' Klaudius lem surat néh.

³¹La'ah kekat seradu nah maneu' pekua' éh sohoo' Klaudius ngan réh nah. Tovoo' merem inah irah alaa' Paulus ke' réh patet éh avéé' leboo' ja'au Antipatris.

³²Dau rema inah moléé' kepéh irah éh lakau tana' tai umaa' peritah, irah éh jalan kuda' nah to ke' patet Paulus.

³³Hun réh avéé' tong Kaisarea pu'un réh mena' surat inah ngan pengeja'au peritah ngan pokoo' Paulus ngan néh sinah.

³⁴La'o néh purung surat inah pu'un éh neteng Paulus semah éh pengurip néh bu'un. Hun néh jam Paulus iteu' kelunan jin tana' Kilikia,

³⁵boh éh bara' ngan néh, ka' ha' néh, Hun kekat kelunan éh maneu' ke' rai avéé' siteu' da', boh ku' peresa' ke', ha' Peliks. La'ah iah nyohoo' réh pokoo' Paulus tong umaa' Raja' Herodis ngan mavaa' éh sinah.