Read Western Penan PENGANEU' LAWAH 25 Bible Online

PENGANEU' LAWAH 25 - Western Penan bible

PENGANEU' LAWAH 25

¹Teleu' dau la'o savéé' Pestus tong tana' inah, boh éh lakau kepéh jin Kaisarea tai Yérusalem.

²La'ah sinah kekat irah pengeja'au imam ngan pengeja'au irah Yahudi maneu' Paulus.

³Irah menyat éh kejeraa' Paulus tai Yérusalem, bang irah tengéé' lepah pakat pitah jalan juk mematai Paulus belu'an jalan lem néh lakau tuai nah.

⁴Bang ka' ha' Pestus mipa réh, Paulus lepah pokoo' réh tong Kaisarea, tai ke' ku' sinah dat.

⁵Hun néh pu'un séé'-séé' pengeja'au keh éh juk bara' sala' ineu'-ineu' tong lakei' inah, omok éh kivu ku' tai da', ha' néh.

⁶La'ah Pestus mokoo' tong Yerusalem ngioo'-ngioo' ayah dau hun bé' kenat barang jah poloo' dau kepéh, boh éh moléé' tai Kaisarea, Barei' sagam menyun éh tong lamin besara' ke' néh nyohoo' réh mihin Paulus tong jumen néh.

⁷Hun Paulus avéé', pu'un kelunan Yahudi éh lepah tuai jin Yérusalem nekedéng tutuh néh ngan maneu' éh bara' éh pu'un maneu' kuraa' arong penyala' éh ja'au, bang bé' réh omok pekelenaa' ha' réh kenat.

⁸Bang hun Paulus mipa ha' réh, pu'un éh bara' bé' éh pu'un kenat. Ka' ha' néh, Bé' pu'un ineu' sala' ké' éh ngelapah sohoo' lem Surat Musa éh kenivu kelunan Yahudi, kenat péh tong umaa' Allah, bé' ku' pu'un maneu' ineu'-ineu' éh bé' tekep ké' maneu' sinah, kenat péh bé' ku' ngelapah tong sohoo' raja' Rum, ha' Paulus nah.

⁹Uban Pestus juk ngayo kenin kelunan Yahudi, pu'un éh neteng Paulus, ka' ha' néh, Kineu' ke', keloo' ke' tai Yérusalem ke' réh pekelenaa' ke' tong kekat jalan ko' éh ke' réh maneu' ke' kenat, ha' néh.

¹⁰Ka' ha' Paulus, Pu'un akeu' nekedéng tong lamin besara' peritah Rum tong jumen kelunan éh jam petuneng, hun réh juk maneu' ku', iteu' néh retek éh tekep réh maneu' ku'. Bé' pu'un ineu'-ineu' sala' ké', ke' irah Yahudi pesala' ku' nah ka'au' péh jam sala' ké' bé' pu'un.

¹¹Hun ké' pu'un sala' ngan ngelapah tong ukum ngan pu'un maneu' ineu'-ineu' éh tekep ké' penatai réh, bé' akeu' juk kelap. Bang hun ha' réh bé' teneng lem kekat ha' réh éh maneu' ku' nah, bé' pu'un jah usah éh omok mena' ku' ngan réh. Akeu' menyat juk tai tong jumen raja' lu', ha' néh.

¹²La'o néh pané kenat, boh Pestus pané ngan kekat pengeja'au réh éh tong besara' nah, boh éh pané ngan Paulus kepéh, ka' ha' néh, Pu'un ke' menyat juk tavin raja', hun néh kenat tekep ke' tavin éh, ha' néh.

¹³Lebéé' si'ik la'o inah, tuai Agripa éh pengeja'au réh, pemung ngan redo néh Bernike tong Kaisarea ke' roh nepah Pestus.

¹⁴La'o duah-teleu' dau la'o savéé' roh, boh Pestus bara' kekat rungen Paulus ngan Agripa nah. Ka' ha' néh, Pu'un jah kelunan lem tutup siteu' éh pokoo' Peliks.

¹⁵La'ah hun Ké' tai Yérusalem irai, pu'un irah pengeja'au imam, ngan irah pengeja'au kelunan Yahudi, maneu' éh ngan nyohoo' ku' ngukum éh.

¹⁶Bang pu'un ku' bara' ngan réh, bé' pu'un suket kelunan Rum ngukum séé'-séé' péh hun néh bé' jak tavin kelunan éh maneu' éh, ke' néh sakui bara' tong kekat jalan réh maneu' éh nah.

¹⁷La'ah hun réh tuai siteu', bé' ku' ngelalah, bang barei' sagam menyun ku' tong lamin besara' ngan nyohoo' réh mihin lakei' inah tuai.

¹⁸Tovoo' inah kekat kelunan éh maneu' éh nah pu'un réh nekedéng, bang bé' réh bara' tong kekat rungen éh sa'at pekua' éh seneruh ké' nah.

¹⁹Bang pu'un réh maneu' éh tong kuraa' jalan tong sebayang réh tengéé', ngan tong jah kelunan éh ngaran néh Yésus, éh lepah matai, bang murip Éh kepéh kunah Paulus nah.

²⁰La'ah uban ké' bé' jam kineu' jalan ké' omok pekelenaa' kekat ha' réh kenat nah, pu'un ku' neteng Paulus hun néh keloo' tai Yérusalem ke' réh pekelenaa' kekat ha' inah sitai.

²¹Bang Paulus menyat dokoo' Kaisar éh petuneng éh ngan kejeraa' éh petem tong lamin tutup pah avéé' besara' néh ma'o. Uban kenat akeu' nyohoo', réh pokoo' éh keto, pah avéé ké' pu'un avah dokoo' patet éh tai Kaisar.

²²Ka' ha' Agripa kepéh, Akeu' tengéé' péh keloo' ku' menéng ha' lakei' inah, ha' néh. Ka' ha' Pestus, Dau sagam da' boh ke' omok menéng ha' néh, ha' Pestus.

²³Barei' sagam tuai Agripa ngan Bernike ngan pu'un kekat kelunan ngajung ngan sepah roh. Tai roh tong lamin besara' pemung ngan kekat pengeja'au seradu ngan kekat pengoloo' ngan kelunan éh ja'au tong leboo' inah. Boh Pestus nyohoo' réh mihin Paulus tuai.

²⁴Ka' ha' Pestus ngan réh, O Agripa ngan kekat pengeja'au éh pu'un pemung ngan améé' siteu', lakei' inah éh ngelayau benara' irah Yahudi pu'un sa'at, kenat péh ha' irah tong Yérusalem kenat péh ha' irah siteu' péh. Pu'un réh bika' bara' bé' tekep éh murip la'ah.

²⁵Bang bé' ku' jam ineu'-ineu' penganeu' néh éh tekep kelu' mematai éh. Inah kepéh pu'un éh menyat juk tai tong jumen Kaisar, inah akeu' peturut éh tai.

²⁶Bang bé' ku' jam kineu' ha' ké' pané ngan raja' lem surat ké' da', kenat éh ké' mihin éh tavin ka'au' Agripa ngan kekat ka'ah béé, barang pu'un péh ineu'-ineu' éh kejam keh tong ha' néh la'o keh menéng éh, éh tekep ké' nyurat da'.

²⁷Uban akeu' seruh bé' tekep nyohoo' kelunan tai kenat hun lu' bé' omok bara' sala' néh, ha' Pestus nah.