Read Western Penan 1 KORINTUS 1 Bible Online

1 KORINTUS 1 - Western Penan bible

1 KORINTUS 1

¹Akeu' Paulus éh tenebai Allah ké' omok lawah Kristus Yésus, kivu pengeloo' kenin Allah awah, amo Sostenes éh padéé' keh dalem Tuhan.

² Maneu' surat iteu' ngan kekat sidang Allah éh tong leboo' ja'au Korintus, inah éh ngan kekat kelunan éh tenebai Tuhan ke' néh anah Nah, neu' urip réh pemung ngan Kristus Yésus, pemung ngan kekat kelunan semah-semah péh éh tebai tong ngaran Tuhan Yésus Kristus. Iah éh Tuhan lu', ngan Tuhan irah péh.

³Jian Allah éh Tamen lu' ngan Tuhan Yésus Kristus, mena' penika Néh ngan pengepawah Néh ngan keh.

⁴La'ah ngelayau akeu' sebayang bara' jian kenin ngan Allah uban penika Néh ngan ka'ah dalem Kristus.

⁵Uban neu' keh petem dalem Tuhan, ka'ah kaya' lem kekat urip keh, inah ka'ah pu'un penoo' neu' pengejam, kenat péh lem pengané keh, kenat péh lem ha' tebaraa' keh.

⁶Ha' tebaraa' tong Kristus pu'un éh petem reken lem ka'ah,

⁷avéé' ka'ah bé' pu'un kurang dalem ineu'-ineu' pengena' Néh kelebéé' keh mena Tuhan Yésus Kristus tuai kepéh.

⁸La'ah Iah omok ngereken keh pah avéé' tong ga', dokoo' ka'ah bé' pu'un teneng kenukum Néh, tovoo' savéé' Néh.

⁹La'ah omok uleu' ngelan Allah, Iah éh Allah éh tebai keh dokoo' keh omok pebakéh ngan Anak Néh Yésus Kristus éh Tuhan lu'.

¹⁰O kekat padéé' ké', dalem ngaran Tuhan Yésus Kristus, akeu' nyohoo' ka'ah pekua' kenin béé-béé dalem kekat ha' ané keh, mai ka'ah tengéé' kenin, jian ka'ah pekua' kenin ngan pekua' penyeruh.

¹¹Uban pu'un kuraa' kelunan jin lamin lakei' Kloe lepah bara' ngan ké', jelua' ka'ah pu'un paneu'.

¹² Barei' iteu' éh, jelua' ka'ah pu'un bara', Akeu' kivu Paulus, jelua' kepéh bara', Akeu' kivu Apolos, jelua' kepéh bara', Akeu' kivu Péterus, ha' jelua' kepéh, Akeu' kivu Kristus.

¹³Mai keh petengéé' kenin uban Kristus Iah jah awah. Kineu', Paulus éh matai tong kayeu' salib ngeliwah keh kei? Kineu', pu'un keh benatis réh dalem ngaran Paulus kei?

¹⁴ Akeu' bara' jian kenin ngan Allah uban bé' ku' pu'un ngebatis séé'-séé' péh jin belah ka'ah, bang Krispus ngan Gayus awah éh benatis ké' rai.

¹⁵Bé' pu'un séé'-séé' péh éh omok bara' iah benatis réh dalem ngaran ké'.

¹⁶ Oo', pu'un jah usah kepéh éh benatis ké', inah éh Stépanus ngan irah tong lamin néh kepéh, bang kioo' ké' bé' pu'un éh jah kepéh éh benatis ké'.

¹⁷Uban Kristus bé' éh nyohoo' akeu' tai ngebatis kelunan bang Iah nyohoo' akeu' tai bara' Rengah Jian ngan réh, ngan bara' éh lenaa' mu'un ngan bé' éh kivu pengejam kenin kelunan dai pematai Kristus tong kayeu' salib seleket bé' pu'un penyukat kepéh.

¹⁸La'ah tebaraa' tong pematai Kristus tong salib, bé' pu'un gunah néh ngan kekat kelunan éh tawang, bang ngan uleu' éh pu'un alaa' urip, inah éh penyukat Allah.

¹⁹ Uban pu'un ha' lem Surat Allah éh bara' ka', La'ah Akeu' juk kebéé kenin kelunan tong jalan réh seruh réh omok alaa' urip. Na' péh réh kelunan éh jam seruh mu'un ngan pekalai mu'un, adang Akeu' kebéé kekat pengejam réh.

²⁰ Hun néh kenat, kineu' irah kelunan éh jam seruh? Ngan kineu' irah éh lepah pekalai mu'un, ngan irah éh jam pané tong kuraa'-kuraa' arong pengejam? Allah pu'un maneu' réh barei' kelunan éh bé' jam seruh ineu'-ineu' péh, kekat pengejam réh palui awah.

²¹Dalem kekat pengejam Allah éh teneng mu'un, bé' Iah kejeraa' kelunan omok jam iah neu' Allah murip kelunan éh ngelan tong ha' tebaraa' éh benara mé' éh seneruh kelunan éh jah, tebaraa' éh palui awah.

²²Kelunan Yahudi nyohoo' kelunan éh bara' ha' Tuhan maneu' kuraa' telana' éh omok pepoléng ha' tebaraa' réh inah pu'un teneng mu'un, ke' réh omok ngelan éh, ngan irah Yunani juk alaa' ha' tebaraa' jin pengejam kenin kelunan awah.

²³Bang pu'un mé' bara' ngan kekat kelunan, Kristus matai tong kayeu' salib. Ha' tebaraa' inah keleko irah Yahudi, ngan irah éh tengéé' pohoo' bara' éh ha' éh palui awah.

²⁴Bang ngan kelunan éh tenebai Allah, irah Yahudi péh kenat péh irah éh tengéé' pohoo', tebaraa' inah, inah éh Kristus, éh penyukat Allah ngan éh pengejam Allah mu'un.

²⁵Uban éh seneruh kelunan pengepalui Allah, éh mu'un néh, inah éh pelapah jam mu'un jin pengejam kelunan, ngan éh seneruh kelunan pengelemoo' Allah, éh ke' Kristus matai tong salib, inah éh pelapah gahang mu'un jin pengegahang kelunan.

²⁶O kekat padéé' ké', jian keh seruh, kineu' ka'ah hun Allah tebai keh lepah rai. Bé' ka'ah pinaa' barei' kelunan éh jam seruh mu'un, ngan bé' ka'ah pinaa' pu'un penyukat, ngan bé' ka'ah pinaa' kelunan éh maren.

²⁷Bang na' péh kenat, Allah ngevéléé' éh seneruh kelunan éh jah, palui awah, dokoo' pekenyaa' kelunan éh jam seruh tong kuraa' arong éh tong tana' iteu'. Éh seneruh kelunan pu'un lemoo', inah éh kevéléé' Allah dokoo' pekenyaa' kelunan éh ja'au penyukat.

²⁸Iah ngevéléé' éh keleko kelunan éh jah, ngan éh nebet réh, dokoo' Néh ngebéé kekat-kekat éh seneruh kelunan pu'un gunah.

²⁹Uban Iah ngevéléé' réh kenat, bé' pu'un jah-jah usah péh éh omok ngajung usah néh tong jumen Tuhan Allah.

³⁰Bang Allah éh maneu' keh petem dalem Kristus Yésus. La'ah jin Kristus Allah maneu' uleu' pu'un pengejam. Kenat kepéh naneu' Kristus, inah uleu' pu'un teneng kenin tong jumen Allah ngan paléu anak Néh mu'un, ngan pelepu jin kekat penyala'.

³¹ Hun néh kenat barei' ha' lem surat Allah bara' ka', séé'-séé' éh bahuu', tekep iah bahuu' tong kekat jalan Tuhan pika éh, ha' Néh.