Read Western Penan 1 KORINTUS 11 Bible Online

1 KORINTUS 11 - Western Penan bible

1 KORINTUS 11

¹ Jian keh kivu uban ké' pekua' akeu' kivu uban Kristus.

²Akeu' mejing ka'ah uban keh ngelayau nesen akeu' ngan kivu kekat tebaraa' éh benara' ké' ngan keh.

³Bang akeu' keloo' ka'ah jam, Kristus éh ja'au jin kekat lakei', ngan irah lakei' éh ja'au jin kekat redo, ngan Allah éh ja'au jin Kristus.

⁴Kenat péh hun pu'un lakei' sebayang tong petipun ngan bara' tong ha' tebaraa' Tuhan ketem tavun ulun néh, iah ngesa'at ngaran Kristus.

⁵Kenat péh siget redo éh sebayang tong petipun ngan bara' tong ha' tebaraa' Tuhan hun néh bé' petavun ulun néh, iah ngesa'at ngaran lakei' uban iah barei' irah redo éh memerit bok néh.

⁶Hun redo bé' petavun ulun néh, jian memerit bok néh awah. Bang uban irah redo menyaa' memerit bok réh, jian éh petavun ulun néh.

⁷ Bé' makat irah lakei' tusah petavun ulun, uban irah pepoléng layan ngan pengaren Allah, bang irah redo nah barei' pepoléng pengaren irah lakei'.

⁸Uban irah lakei' bé' réh senuai Tuhan jin redo, bang redo éh senuai Néh jin lakei'.

⁹ Ngan lakei' bé' éh senuai Tuhan uban redo pu'un, bang redo senuai Néh uban lakei' pu'un.

¹⁰Uban néh kenat tekep irah redo petavun ulun réh telana' réh ngerera' tong lakei' réh dokoo' kekat meliket omok jam éh.

¹¹Uban lem pengeloo' Tuhan, bé' irah lakei' omok pelaya lakei' awah, kenat péh redo, bé' réh omok pelaya redo awah.

¹²Uban pekua' redo senuai Néh jin lakei', kenat péh lakei' pu'un alaa' urip jin redo, bang kekat néh béé pu'un jin Allah.

¹³Ka'ah tengéé' seruh éh kepéh. Kineu', tekep redo sebayang ngan Allah tong petipun ngan bé' petavun ulun néh?

¹⁴Uban pohoo' irah lakei' bé' éh omok kebit bok, hun néh kenat adang ka'ah jam bé' éh tekep irah lakei' kebit bok, menyaa' réh hun réh kebit bok.

¹⁵Bang hun redo kebit bok, inah éh ngejian layan néh. Uban bok néh inah nena' Tuhan ngan néh ke' néh petavun éh.

¹⁶Bang hun pu'un kelunan nyakat tong ha' ké' inah, bé' améé' ngan bé' sidang Allah kivu adet éh tengéé' jin éh benara' ké' inah.

¹⁷Bang tong kekat ha' tebaraa' ké' iteu' kepéh, bé' akeu' mejing ka'ah, uban hun ka'ah petipun sebayang, bé' éh pesavéé' pengejian, bang néh pesavéé' kesa'at awah.

¹⁸Uban éh bu'un néh inah éh nenéng ké', hun ka'ah petipun sebayang pu'un kelunan éh tengéé' kenin, ngan kioo' ké' adang éh pu'un pekua' éh benara' réh kenat mu'un.

¹⁹Adang néh tekep jelua' jin belah ka'ah pu'un tengéé' kenin dokoo' pepoléng séé' kelunan éh tigéh.

²⁰Uban hun ka'ah petipun, bé' ka'ah petipun dokoo' keh kuman ka'an éh sohoo' Tuhan.

²¹Uban hun ka'ah petipun kuman, siget-siget usah tioo kuman penguman néh tenah, kenat péh pu'un jelua' éh la'au' ngan pu'un jelua' kepéh éh mavuk.

²²Kineu', bé' keh pu'un lamin keh tengéé' éh jalan keh kuman ngan mesep kenat kei? Kineu', pu'un keh juk ngesa'at sidang Allah, ngan juk pekenyaa' kelunan éh bé' pu'un penguman kei? Kineu' ha' ké' ngan keh kepéh? Kineu', tekep ku' mejing keh? Bé' akeu' mejing keh.

²³Uban tebaraa' éh nalaa' ké' jin Tuhan, inah éh benara' ké' ngan ka'ah kepéh. Ka' éh, Sioo' merem tovoo' Tuhan Yésus penalo, Iah alaa' roti

²⁴ngan sebayang bara' jian kenin ngan Allah, boh éh memila' éh. Ha' Néh, Iteu' néh seleket usah ké' éh nena' ké' ngeliwah ka'ah. Jian keh maneu' kenat dokoo' petesen kenin keh tong Akeu', ha' Néh.

²⁵ Kenat péh la'o réh kuman, Iah alaa' sawan baa' kepéh, ha' Néh, Baa' iteu' néh seleket dahaa' ké', uban neu' dahaa' ké' pega', inah éh maneu' jajii' Allah pu'un petem. Siget koléé' keh mesep éh, jian keh mesep petesen kenin keh tong Akeu', ha' Néh.

²⁶Uban siget koléé' keh kuman roti inah ngan mesep baa' inah, inah néh keh bara' Tuhan Yésus matai ngeliwah keh, pah avéé' Néh tuai kepéh.

²⁷Hun néh kenat séé'-séé' éh kuman roti éh nena' Tuhan inah, ngan mesep baa' inah ngan bé' teneng kenin seruh éh, iah pu'un penyala' ngan ngeluén dahaa' Tuhan awah.

²⁸Hun néh kenat jian siget-siget usah seruh tong kenin néh tengéé' tenah, boh éh kuman ngan mesep baa' inah.

²⁹Uban kelunan éh kuman ngan mesep baa' inah ngan bé' nesen tong pematai Tuhan, inah iah alaa' ukum tong usah néh tengéé'.

³⁰Kenat péh pu'un kelunan belah ka'ah éh sakit ngan lemoo' ngan pu'un éh matai péh.

³¹Bang hun lu' seruh mu'un tong kenin lu' tengéé' tenah, bé' lu' teneng kenukum Allah.

³²Bang Tuhan éh petuneng uleu' ngan ngukum lu' dai uleu' sioo' kenukum Néh kepéh, pemung ngan kelunan éh bé' ngelan tong Iah.

³³O kekat padéé' ké', uban néh kenat hun keh petipun juk kuman penguman éh sohoo' Tuhan, jian keh mena jah usah ngan jah usah.

³⁴Hun pu'un kelunan éh la'au', jian iah kuman tong lamin néh tengéé' tenah, dokoo' hun keh petipun, ka'ah bé' teneng kenukum Allah kepéh. La'ah tong kekat rungen éh jah kepéh, hun mah akeu' tuai tavin keh, boh akeu' bara' éh ngan keh kepéh.