Read Western Penan 1 KORINTUS 4 Bible Online

1 KORINTUS 4 - Western Penan bible

1 KORINTUS 4

¹Tekep ka'ah seruh amo Apolos, kelunan éh kivu sohoo' Kristus awah. Kristus éh mena' ha' tebaraa' Néh ngan amo. Ha' tebaraa' iteu' pelim éh tong kelunan sahau rai, amo mihau éh ngan bara' éh ngan kelunan éh jah kepéh.

²Adang tekep kelunan éh mihau éh pu'un tigéh lem kekat sohoo' pengeja'au néh.

³Bé' akeu' tusah kenin seruh kineu'-kineu' éh seneruh keh tong akeu', kenat péh seneruh kelunan séé'-séé' péh. Akeu' tengéé' péh bé' akeu' petuneng kenin ké'.

⁴Bé' akeu' nesen ineu'-ineu' kesa'at lem kenin ké', na' péh kenat bé' akeu' bara' akeu' bé' pu'un sala', bang Tuhan awah éh jam petuneng kenin ké'.

⁵Uban néh kenat mai ka'ah petuneng ngan maneu' kelunan pah avéé' jaka' éh kevéléé' Tuhan hun sioo' Néh tuai kepéh. Adang Iah omok pepoléng kekat penyeruh réh éh merem ngan éh pelim rai, ngan Iah pepoléng kekat pengeloo' kenin kelunan éh pelim rai. Tovoo' inah Tuhan pu'un mejing kelunan kivu pekua' penganeu' réh.

⁶O kekat padéé' ké', tong kekat éh benara' ké' iteu', akeu' maneu' ha' tapan tong amo Apolos, dokoo' keh omok nesen éh. Pu'un ku' tapan éh kenat dokoo' ka'ah omok jam, bé' tekep keh petuneng kelunan ngan ngajung jah usah ngan tengéé' kenin ngan leko tong jah usah kepéh.

⁷Séé' maneu' keh pelapah jian jin irah éh jah? Kineu', bé' éh Tuhan éh mena' kekat-kekat pengena' lem kenin keh kei? Hun néh kenat uban ineu' keh bau kenin ngajung usah keh, barei' keh seruh bé' éh pengena' Tuhan?

⁸Bé' makat uban keh kurang pengejam. Pengejam keh nah sukup mu'un éh. Ka'ah seruh ka'ah éh kelunan jian. Ka'ah seruh ka'ah éh raja'. Amo iteu' bé' amo kelunan jian. Jian ka'ah raja' mu'un dokoo' amo omok raja' pemung ngan ka'ah kepéh.

⁹Uban akeu' seruh, Allah maneu' améé' éh lawah Néh barei' saa' likot kekat kelunan béé, pekua' kelunan éh teneng kenukum réh éh juk penatai réh tong jumen réh béé, dokoo' mé' omok ta'an kekat kelunan ngan kekat meliket péh.

¹⁰Uban mé' maneu' kereja' Kristus, inah mé' barei' okoo' kelunan éh palui awah, bang ka'ah kelunan éh jam seruh tong urip keh lem Kristus. Améé' kelunan éh lemoo' awah, bang ka'ah éh gahang, ka'ah éh kenajung kelunan, améé' éh keleko réh awah.

¹¹Avéé' hun iteu' améé' pu'un la'au' ngan mapeu' batok, ngan bé' pu'un sukup pakai, pu'un réh mipok mé', ngan pu'un mé' lakau-lakau bé' pu'un jalan mokoo' petem.

¹² Mutau mé' kereja' dokoo' tagong usah mé'. Hun kelunan maneu' mé' pu'un mé' mipa réh ngan jian, hun réh peketa mé', améé' ngerera' ngan ngeretep awah.

¹³Hun réh ngesa'at ngaran mé', améé' mipa ha' réh ngan ha' éh dawai. La'ah améé' pekua' moo' ngan dek awah tong ta'an kekat kelunan, pah avéé' hun iteu'.

¹⁴La'ah akeu' nyurat kenat bé' éh uban ké' juk pekenyaa' keh, akeu' nyurat éh kenat uban ké' juk nebaraa' keh, pekua' anak usah ké' éh penika ké'.

¹⁵Uban na' péh ka'ah pu'un ibu-ibu guru éh nebaraa' keh tong urip keh dalem Kristus, bé' tamen keh pinaa'. Uban dalem Kristus Yésus akeu' éh tamen keh, uban akeu' éh bu'un bara' Rengah Jian ngan keh.

¹⁶ Uban néh kenat akeu' nyohoo' ka'ah kivu uban ké' kepéh.

¹⁷La'ah kenat péh akeu' nyohoo' Timotius tai tavin ka'ah kepéh. Iah seleket anak ké' éh penika ké' ngan éh tigéh dalem kereja' néh. Iah omok petesen keh tong kekat jalan ké' dalem Kristus Yésus, pekua' éh benara' ké' tong siget-siget sidang semah-semah péh.

¹⁸Bang pu'un jelua' ka'ah éh bau kenin, uban keh seruh bé' akeu' makang tuai nepah keh.

¹⁹Bang hun néh lem pengeloo' Allah, adang akeu' juk tuai ngan keh ngan laho, boh akeu' omok jam kenin irah éh bau-bau kenin kenat ngan jam tong penganeu' réh kepéh, bé' makat tong kekat ha' éh nané réh awah.

²⁰Uban tong kelunan éh pu'un lem nihau Allah, bé' éh neu' ha' tosok réh awah bang neu' penyukat Tuhan.

²¹Kineu' éh pengeloo' keh? Keloo' akeu' tuai mihin perah, kineu', keloo' akeu' tuai ngan dawai kenin ngan penoo' neu' penika Tuhan kei?