Read Western Penan 1 KORINTUS 6 Bible Online

1 KORINTUS 6 - Western Penan bible

1 KORINTUS 6

¹Hun pu'un kelunan éh pepadéé' dalem Tuhan, éh tengéé' kenin ngan pepaneu', kineu' éh makang tai besara' tong jumen kelunan éh bé' ngelan tong Tuhan? Kineu' éh bé' kejeraa' irah éh ngelan tong Allah seruh tong kekat penusah néh inah?

²Kineu', bé' keh jam irah éh anah Allah juk petuneng kekat kelunan tong tana' iteu'! Hun néh kenat, hun keh pu'un petuneng tana' iteu' kepéh vam, kineu', bé' keh omok petuneng tong kekat rungen éh si'ik awah éh pu'un hun iteu' kei?

³Kineu', bé' keh jam uleu' péh juk petuneng meliket? Hun néh kenat makin péh tong kekat éh pu'un dalem pengurip lu' hun iteu'.

⁴Hun néh kenat hun pu'un penusah belah ka'ah, kineu' keh, tekep keh mihin éh tai tong jumen kelunan éh bé' pu'un dalem sidang ke' réh omok seruh éh kei?

⁵Tekep ka'ah menyaa'. Kineu', bé' pu'un jah usah belah ka'ah éh jam seruh éh omok memekat ha' belah irah padéé' inah kei?

⁶Bang inah éh jah kelunan éh padéé' dalem Tuhan besara' maneu' jah padéé' néh kepéh, ngan inah kepéh, pu'un iah kejeraa' kelunan éh bé' ngelan tong Tuhan petuneng roh.

⁷Sala' mu'un ka'ah, uban keh pu'un tusah éh juk mihin keh tai besara', inah éh pepoléng keh sala' mu'un. Pelapah jian hun keh kejeraa' réh ngerugii' keh awah. Pelapah jian keh kejeraa' réh nekau, jin keh pu'un tai besara' ngan irah éh bé' ngelan tong Tuhan.

⁸Bang ka'ah tengéé' ngerugii' ka'ah ke', ngan nekau jin belah ka'ah ke', ngan inah éh jin irah éh pata padéé' dalem Tuhan. Béé kenin ké'.

⁹Adang keh jam kelunan éh sa'at barék bé' omok tai tong nihau Allah. Mai keh tawang, kelunan éh sa'at barék ngan petuyang, ngan kelunan éh pakai butun, ngan lakei' éh petuyang ngan lakei',

¹⁰ngan kelunan nekau, ngan kelunan éh magat juk alaa' mekum, ngan kelunan mavuk, ngan kelunan éh pesala' kelunan éh jah, ngan kelunan éh ngelapah sohoo', kekat irah éh maneu' kenat bé' omok alaa' Allah pengeja'au réh ngan tai lem nihau Néh.

¹¹Hun lepah rai pu'un jelua' ka'ah kenat, bang pu'un Tuhan mohéé' keh jin penyala' keh, ngan hun iteu' ka'ah anah Allah, ngan pu'un teneng tong jumen Néh neu' ngaran Tuhan Yésus Kristus ngan neu' Sahéé' Allah.

¹² Barang pu'un jah usah éh bara', Omok akeu' maneu' ineu'-ineu' kivu pengeloo' kenin ké' tengéé', bé' pu'un ineu' éh meta' akeu' kenat. Oo', omok, bang bé' éh kekat inah omok ngejian kenin keh. Akeu' péh, omok akeu' bara', omok akeu' maneu' ineu'-ineu' kivu pengeloo' kenin ké' tengéé', bé' pu'un ineu' éh meta' akeu' kenat, bang bé' akeu' juk maneu' éh, uban bé' akeu' keloo' tai lem penyukat néh ke' néh ngeripen akeu'.

¹³Barang pu'un jah usah kepéh éh bara', Ka'an pu'un dokoo' lu' omok beso betuken, ngan betuken lu' pu'un dokoo' lu' omok kuman ka'an. Oo' mu'un, bang ka'an ngan betuken lu' péh juk kenebéé Allah. Usah kelunan bé' éh pu'un ke' néh maneu' barék sa'at ngan petuyang, bang pu'un éh ke' néh anah Tuhan, ngan Tuhan pu'un ke' Néh purip usah uleu'.

¹⁴La'ah pu'un Allah pebetéé' Tuhan Yésus jin patai Néh ngan Iah omok pebetéé' uleu' kepéh naneu' penyukat Néh.

¹⁵Ka'ah jam usah keh iteu' usah Kristus. Kineu', tekep ku' alaa' jebila' usah Kristus ngan maneu' éh usah redo éh petuyang? Bé'. Bé' omok.

¹⁶ Kineu', bé' keh jam kelunan éh tai pemung ngan redo bavah, rawah seleket jah usah awah? Uban pu'un jah ha' lem surat Allah éh bara' lenaa' mu'un, Kelunan éh pemung, inah rawah seleket jah usah awah, ha' Néh.

¹⁷Kenat péh kelunan éh pemung ngan Tuhan pu'un éh jah awah neu' Sahéé'.

¹⁸Kelap keh jin petuyang. La'ah kekat arong penyala' éh jah éh naneu' kelunan, bé' éh ngesa'at usah néh mu'un, bang kelunan éh petuyang, pu'un éh maneu' penyala' ngan ngesa'at avéé' usah néh mu'un.

¹⁹ Kineu', bé' keh jam usah keh iteu' lamin Sahéé' Allah éh pu'un dalem keh, éh nena' Allah ngan keh? Bé' ka'ah anah ka'ah ke', bang ka'ah anah Allah.

²⁰Pu'un Iah melih ka'ah palaa' éh ma'an. Uban néh kenat tekep ka'ah peparen Allah dalem usah keh.