Read Western Penan 2 KORINTUS 1 Bible Online

2 KORINTUS 1 - Western Penan bible

2 KORINTUS 1

¹ Akeu' Paulus éh lawah Yésus Kristus neu' pengeloo' Allah, ngan Timotius éh padéé' lu', amo éh maneu' surat iteu' ngan sidang Allah éh pu'un tong leboo' ja'au Korintus, kenat péh ngan kekat kelunan éh anah Allah éh pu'un tong tana' Akhaya.

²Jian Allah éh Tamen lu' ngan Tuhan Yésus Kristus mena' penika Néh ngan pengepawah Néh ngan keh.

³Jian uleu' bara' jian kenin ngan Allah éh Tamen Tuhan Yésus Kristus, inah éh Tamen lu' éh ngelayau pika lu', Allah éh papung kenin lu' ngan ngegahang kenin lu' dalem kekat penusah lu'.

⁴Pu'un éh ngegahang kenin lu', dokoo' barei' Iah ngegahang kenin lu' nah, kenat péh jalan uleu' omok ngegahang kenin irah éh jah dalem kekat penusah réh kepéh.

⁵Hun uleu' pepit dalem pengeketa lu' pekua' pengeketa Kristus rai, boh uleu' pepit kepéh dalem pengepapung Néh.

⁶Hun améé' jam tusah, pu'un éh kenat dokoo' mé' omok ngegahang kenin keh ngan ngereken pengelan keh tong Tuhan, hun Allah pu'un ngegahang kenin mé', pu'un éh kenat dokoo' mé' omok ngegahang kenin keh kepéh, dokoo' keh omok ngeretep ngan kebit kenin dalem kekat pengeketa éh teneng tong ka'ah pekua' éh teneng tong améé' nah.

⁷Kenat péh bé' améé' putui pengelan seruh ka'ah, uban améé' jam pekua' ka'ah pu'un keta barei' améé', kenat péh Tuhan pu'un ngegahang kenin ka'ah barei' Iah pu'un ngegahang kenin améé' nah.

⁸ O kekat padéé' mé', améé' juk petesen keh kepéh tong penusah améé' hun mé' pu'un tong tana' Asia rai. Uban kekat penusah éh teneng tong améé' rai, bahat mu'un éh, avéé' améé' seruh adang mé' matai awah.

⁹Kenin mé' hun irai barei' kenin kelunan hun néh jam iah pu'un kenukum réh matai. Bang kekat penusah inah pu'un éh dokoo' nebaraa' améé', mai mé' ngelan tong pengegahang mé', bang ngelan tong Allah éh pebetéé' kelunan matai.

¹⁰Pu'un Iah pepiso mé' jin kekat penusah éh juk mihin améé' matai rai, ngan adang Iah pu'un pepiso mé' hun iteu' kepéh, ngan améé' ngelan adang Iah omok pepiso mé' kepéh.

¹¹Jian keh nolong sebayang tong améé'. Adang Tuhan omok nolong améé' mipa ha' sebayang kelunan pinaa', adang pinaa' kelunan juk bara' jian kenin ngan Tuhan uban Iah pu'un nolong améé'.

¹²Pu'un jah jalan améé' bahuu', inah éh uban dalem kenin mé' bé' pu'un ineu'-ineu' lem kenin mé' éh pesala' mé' tong urip mé' belah kelunan semah-semah péh, makin péh belah ka'ah, uban kekat barék mé' pu'un éh jian ngan teneng awah. Jah awah kenin améé', bé' mé' maneu' ineu'-ineu' ngan ngelayoo' awah, bé' mé' kivu pengejam mé' tengéé', tong kekat penganeu' mé' pu'un éh neu' penika Allah.

¹³Kekat ha' lem surat mé' rai, bé' éh pu'un tengéé' sin, bé' éh pu'un tai jah lah, omok keh purung éh ngan nesen éh.

¹⁴Akeu' ngelan kekat éh bé' kejam keh mu'un, omok keh jam éh kepéh, dokoo' tong Dau Tuhan Yésus tuai kepéh, ka'ah omok bahuu' améé' pekua' barei' améé' péh bahuu' ka'ah.

¹⁵ La'ah uban akeu' seruh ka'ah nesen ha' ké' lepah rai' akeu' seruh juk tai nepah keh tovoo' ké' lakau tai tana' Makedonia rai, ngan tovoo' ké' moléé' jin sinah péh. Akeu' seruh hun ké' omok tai kenat, boh keh omok alaa' ha' tebaraa' Tuhan duah koléé'. Inah kepéh dokoo' keh omok patet ku' tai tana' Yudea kepéh.

¹⁷Uban ké' bé' pu'un kivu ha' jajii' ké' éh bu'un nah, éh bara' juk tai ngan keh rai, kineu', akeu' seneruh keh kelunan éh kenyo awah ku'. Bé' akeu' kenyo. Tong pengelakau ké' nah, bé' akeu' kivu kenin ké' tengéé', bé' akeu' barei' kelunan éh bara' Oo' kangai ku' dat, bang lem kenin néh seruh, bé', bé' akeu' tai dat.

¹⁸Kejam lu' Tuhan pu'un tigéh, ngan uleu' omok ngelan kekat ha' éh benara' Néh pu'un teneng, kenat péh akeu'. Hun ké' bara' akeu' juk tai nepah keh rai, bé' akeu' pané kenat palaa' ha' ujun ké' awah. Bé' akeu' barei' kelunan éh bara' Oo' bang lem kenin réh seruh bé'.

¹⁹ Uban Yésus Kristus, Anak Allah éh benara' mé' teleu' Silas ngan Timotius rai, bé' Éh barei' kelunan éh bara' Oo' bang éh lem kenin réh seruh bé'. Kristus bé' éh pu'un kenat. Kekat ha' Néh ngelayau éh Oo' uban Iah ngelayau maneu' pekua' éh benara' Néh.

²⁰Uban kekat ha' éh pejajii' Allah pu'un éh kivu éh dalem Yésus Kristus. Kenat péh uleu' omok bara' Amin dalem Yésus Kristus ngan peparen Allah.

²¹La'ah neu' Allah inah, iah éh maneu' améé' pemung ngan ka'ah péh, jam uleu' pu'un urip dalem Kristus. Allah Iah éh pepemung uleu' ke' Néh maneu' uleu' anah Nah mu'un,

²²ngan pu'un Éh nelana' lu' bara' uleu' éh anah Nah, neu' Néh mena' Sahéé' Ni'ai Néh lem kenin lu', Sahéé' Ni'ai nah telana' tong kekat éh juk nena' Néh ngan uleu' kepéh.

²³Akeu' bara' mu'un tong jumen Allah bé' ku' kenyo. Bang tong jalan ké' bé' angai nepah keh rai uban ké' pika keh dai ku' barei' pepit penusah keh kepéh.

²⁴Bé' mé' juk angai ngan bau kenin, bé' améé' naten nyohoo' keh maneu' ineu'-ineu', uban ka'ah tengéé' péh pu'un petem dalem pengelan keh tong Tuhan. Bang améé' juk angai nolong keh awah, dokoo' keh omok murung kenin.