Read Western Penan 2 KORINTUS 10 Bible Online

2 KORINTUS 10 - Western Penan bible

2 KORINTUS 10

¹Akeu' Paulus menyat pika ngan ka'ah, akeu' éh benara' kelunan pu'un diva' kenin hun ké'pemung ngan ka'ah bang éh makang kenin ngan mahéng kenin hun ké' juu'. Akeu' menyat keh neu' kekat penika ngan pengejian Kristus,

²mai keh pebetéé' kenin ké' dokoo' ké' makang pané tovoo' ké' angai da'. Omok awah ku' pané bahat ngan kelunan éh bara' améé' maneu' kereja' mé' kivu pengagat dalem usah mé'.

³Mu'un péh améé' murip tong tana', bang bé' mé' ngelawan kesa'at pakai ineu'-ineu' éh jin tana',

⁴uban lajam mé' bé' éh barei' lajam éh penakai kelunan tong tana' iteu', bang pu'un éh jin Allah ngan pu'un penyukat éh ja'au, palaa' lajam inah améé' nasa' apat éh reken, améé' memata' kekat ha' kelunan pesakat.

⁵Ngan ineu'-ineu' éh neu' kelunan ke' néh mapat jalan dai kelunan jam Allah. Améé' ngelawan dokoo' siget-siget penyeruh kelunan pu'un lem penyukat Tuhan kepéh ke' réh kivu pengeloo' Kristus.

⁶Hun améé' jam ka'ah pu'un reken kenin kivu sohoo', adang mé' ngukum séé'-séé' éh tengéé' kenin bé' keloo' kivu sohoo'.

⁷Jian keh seruh tong kekat éh pu'un belah keh sinah. Kelunan éh seruh iah éh anah Kristus, jian, bang jian iah nesen, améé' péh anah Kristus, bé' makat iah awah.

⁸Bé' akeu' menyaa', na' péh akeu' ngajung usah ké' uban Tuhan mena' penyukat Néh ngan améé', pu'un éh kenat dokoo' ngereken ka'ah, bé' éh pu'un dokoo' néh mega' ka'ah.

⁹La'ah bé' akeu' keloo' ngedai ka'ah neu' kekat ha' lem surat ké'.

¹⁰Barang kelunan pu'un bara', Bahat ha' ngan mahéng ha' Paulus lem surat néh, bang hun usah néh pu'un pemung ngan lu', lemoo' awah éh ngan bé' iah jam pané, ha' réh.

¹¹Kelunan éh pané kenat jian iah nesen, kekat ha' mé' dalem surat mé' hun mé' juu', kenat péh tong kekat penganeu' mé' hun mé' pu'un ngan keh sinah, bé' éh tengéé'.

¹²Adang améé' bé' makang pepata usah mé' ngan kelunan éh ngajung usah réh tengéé' irah palui awah. Irah pepata ngan petuneng usah réh belah irah ke' awah.

¹³Bang hun mé' ngajung bé' mé' ngajung tong éh bé' pu'un barei' irah inah, adang mé' pepata éh ngan kereja' éh nena' Allah ngan mé', ngan kereja' inah, pu'un éh belah keh kepéh.

¹⁴Bé' mé' sala' hun mé' bara' améé' pu'un penyukat belah ka'ah, uban améé' éh bu'un tai bara' Rengah Jian Kristus ngan keh.

¹⁵La'ah bé' mé' ngajung usah mé' tong kereja' éh neu' irah éh jah ngan éh bé' neu' améé', éh bé' lem nihau mé'. Bang améé' ngelan pengelan keh tong Tuhan omok pepit kenat péh kereja' mé' omok pepit kepéh belah keh,

¹⁶dokoo' mé' omok bara' Rengah Jian tong tana' éh juu' jin ka'ah, uban bé' mé' keloo' ngajung usah mé' tong kereja' irah éh jah tong tana' semah-semah éh pu'un lem nihau réh.

¹⁷ Bang barei' ha' lem surat Allah pu'un bara', Kelunan éh juk ngajung, jian iah ngajung tong kekat éh penganeu' Tuhan, ha' Néh.

¹⁸Bé' éh kelunan éh ngajung usah néh tengéé' éh pu'un teneng bang kelunan éh kenajung Tuhan.