Read Western Penan 2 KORINTUS 5 Bible Online

2 KORINTUS 5 - Western Penan bible

2 KORINTUS 5

¹Uban uleu' jam lamin lu', inah éh usah lu' éh jalan lu' mokoo' tong tana' iteu', hun néh pega' Allah pu'un lamin ngan uleu' kepéh, lamin inah pu'un éh tong seruga, bé' éh senuai kelunan, bang senuai Tuhan ngan pu'un éh pelinguh.

²Uban néh kenat, otoo' lu' mokoo' tong lamin lu' iteu', gahang kenin lu' juk memakai lamin éh tong seruga,

³uban hun lu' memakai lamin inah boh lu' pu'un usah éh maréng kepéh.

⁴Uban kelebéé' lu' pu'un dalem lamin iteu', otoo' lu', uban lu' bahat kenin ngan tejeu' siteu', bé' makat uban lu' juk piso jin lem usah lu' iteu', bang uleu' keloo' alaa' usah éh maréng kepéh dokoo' usah lu' éh juk matai iteu', omok mesoléé' neu' urip.

⁵La'ah Allah pu'un petenup uleu' kelu' omok mesoléé' kenat, ngan Iah mena sahéé' Néh ngan uleu' telana' tong kekat éh petenup Néh ngan lu' pu'un kenat mu'un.

⁶Uban néh kenat bé' lu' putui kenin, uban uleu' jam kelebéé' uleu' pu'un dalem usah lu' iteu', uleu' bé' pu'un tong lamin éh petenup Tuhan ngan uleu',

⁷uban kekat urip lu' tong tana' pu'un éh neu' pengelan, bé' éh neu' éh poléng ta'an lu' awah.

⁸Gahang kenin mé' juk piso jin usah iteu' ke' mé' omok tai ngan Tuhan.

⁹Bang gahang kenin lu' juk ngepayoo' kenin Tuhan, kenat péh hun lu' mokoo' siteu' keto, kenat péh hun lu' pu'un moléé' ngan Tuhan péh.

¹⁰ Uban adang kekat uleu' béé pu'un tai tong jumen Kristus ke' Néh petuneng lu', dokoo' siget-siget kelunan alaa' oléé' néh pekua' barei' kekat penganeu' néh kelebéé' néh murip tong tana', kenat péh hun néh jian ngan hun néh sa'at péh.

¹¹Uban améé' jam tong kemerek Tuhan tong kelunan éh maneu' penyala', inah améé' gahang kenin juk mihin réh ngelan tong Iah. Allah éh jam kekat éh lem kenin mé', ngan akeu' ngelan ka'ah péh pu'un jam éh kenat.

¹²Bé' améé' pané kenat dokoo' mé' ngajung usah mé', bang améé' keloo' ka'ah jam améé' kelunan éh teneng kenin hun keh pemung ngan kelunan éh ngelayoo' awah jian, ngan éh bau kenin seruh réh kenajung kelunan.

¹³Uban hun améé' tuleu', pu'un mé' tuleu' dokoo' peparen Allah. Hun mé' jam seruh, pu'un mé' jam seruh dokoo' mé' nolong ka'ah.

¹⁴Uban tong kekat penganeu' mé' pu'un éh uban neu' penika Kristus éh barei' mugun améé', uban kejam mé' jah usah inah éh Kristus, lepah matai ngan kekat kelunan. Hun néh kenat kekat kelunan seleket matai.

¹⁵Hun Kristus lepah matai ngan kekat kelunan kenat, tekep uleu' éh alaa' urip Néh éh maréng, mai lu' murip kivu pengeloo' lu' tengéé', bang jian lu' murip kivu pengeloo' Iah éh lepah matai ngan éh betéé' kepéh.

¹⁶Hun néh kenat bé' améé' seruh tong kejian ngan kesa'at kelunan barei' éh kemalai éh seneruh kelunan awah. Sahau rai na' péh améé' seruh tong Kristus barei' éh seneruh kelunan malai, hun iteu' kepéh, bé' mé' seruh éh kenat.

¹⁷Séé'-séé' éh murip dalem Kristus, iah pu'un urip maréng, kekat urip néh jin sahau lepah béé, iah pu'un urip maréng kepéh.

¹⁸Allah éh pu'un ngepaléu lu' kelu' omok kenat, bu'un-bu'un uleu' éh ayau Allah bang Iah ngepaléu lu' dokoo' lu' omok bakéh Néh kepéh. Iah ngepaléu lu' kenat neu' Kristus, la'ah Iah mena' kereja' Néh ngan lu' dokoo' lu' omok mihin irah éh jah bakéh Néh kepéh.

¹⁹La'ah inah éh ha' tebaraa' mé', Allah neu' Kristus pu'un mihin kekat kelunan bakéh Néh kepéh. Bé' Iah mihau penyala' réh ke' Néh ngukum réh, Ha' tebaraa' inah nena' Néh ngan améé' dokoo' améé' omok bara' éh kepéh ngan irah éh jah, ke' réh omok bakéh Néh kepéh.

²⁰Uban néh kenat améé' éh lawah Kristus pané ngan keh pekua' barei' hun néh usah Allah mu'un pané ngan keh, Dalem ngaran Kristus améé' naten nyohoo' ka'ah jian keh tavin Allah, kejeraa' Iah ngepaléu keh omok bakéh Néh, ngan bé' lah keh ayau Néh kepéh.

²¹La'ah bé' Kristus pu'un penyala', bang Allah nyohoo' Iah tagong penyala' uleu', dokoo' uleu' omok alaa' jian kepéh ngan Allah hun lu' pu'un pemung ngan Néh kepéh.