Read Western Penan 2 KORINTUS 8 Bible Online

2 KORINTUS 8 - Western Penan bible

2 KORINTUS 8

¹ O kekat padéé' ké', améé' keloo' ka'ah jam tong jalan penika Allah poléng tong kekat sidang tong tana' Makedonia.

²Pinaa' arong penusah réh, penusah inah tupat kenin réh tong pengelan réh tong Tuhan, bang kemurung réh pelapah ja'au jin kekat arong penusah réh inah. La'ah livah ineu' éh pu'un ngan réh, irah mena' éh ngan Tuhan. Na' péh réh pu'un kari, pelapah ja'au kepéh pengena' réh ngan Tuhan jin pengekari réh.

³Kejam ké' mu'un irah mena' éh pekua' barei' éh pu'un tong irah, éh mu'un néh, éh nena' réh éh pelapah ja'au jin éh pu'un ngan réh, irah mena' éh kenat kivu éh jian seneruh réh lem kenin réh.

⁴Irah nyohoo' mé' alaa' pengena' réh inah, éh mu'un néh bé' irah kejeraa' mé' bé' pu'un alaa' éh, uban réh keloo' nolong kelunan éh ngelan tong Tuhan tong tana' Yudea.

⁵Bé' améé' seruh réh omok mena' éh pelapah ja'au kenat, éh bu'un néh irah mena' usah réh tenah ngan Tuhan, la'o inah irah mena' pengena' réh ngan améé' kivu pengeloo' Allah.

⁶Kenat péh améé' nyohoo' Titus éh bu'un-bu'un pebetéé' kenin keh dokoo' mena' ngan Tuhan, maneu' kereja' Néh kepéh nolong keh pesukup kereja' keh éh neu' penika keh dokoo' keh omok mena' ngan Tuhan kepéh.

⁷Ka'ah kaya' tong kekat-kekat éh pu'un tong ka'ah, inah éh lem pengelan keh tong Tuhan ngan ha' tebaraa' keh ngan pengejam keh, ngan tong kemekat keh nolong irah éh jah péh, kenat péh tong penika keh ngan améé'. Uban keh pu'un barei' kaya' lem kekat inah, kenat péh améé' keloo' ka'ah barei' kaya' kepéh lem kereja' keh mena' ngan Tuhan uban keh pika Iah.

⁸Bé' akeu' bara' tong kekat jalan éh tekep keh mena' ngan Tuhan, bang inah akeu' bara' tong jalan kelunan éh jah gahang kenin mena' ngan Tuhan, inah akeu' juk jam kepéh, Kineu' penika ka'ah iteu' ngan Tuhan, pu'un keh pika éh mu'un ngan maneu' kenat.

⁹Ka'ah jam tong penika Yésus Kristus éh Tuhan lu', na' péh Iah kaya' mu'un bang uban Iah pika ka'ah Iah tuai paléu kari mu'un kepéh, dokoo' ka'ah omok kaya' neu' pengekari Néh.

¹⁰La'ah inah éh seneruh ké', jian ka'ah pesukup éh neu' keh tong ta'un éh lepah rai. Ka'ah éh tenah mena' éh ngan keloo' maneu' éh jin kekat irah éh jah.

¹¹Uban néh kenat hun iteu' kepéh jian keh pesukup éh. Barei' keh gahang kenin keloo' mena' éh rai, jian keh gahang kenin mena' éh kepéh jin kekat éh pu'un ngan ka'ah.

¹²Uban hun keh gahang kenin juk mena' éh, Tuhan jam seruh tong kekat pengena' keh inah, bé' Iah nyohoo' keh mena' éh bé' pu'un.

¹³Bé' akeu' keloo' kelunan éh jah alaa' jian, ngan ka'ah pu'un kurang kepéh,

¹⁴bang uban keh pu'un sukup hun iteu', tekep keh nolong irah éh pu'un kurang. Hun ka'ah pu'un kurang ngan hun irah pu'un sukup, boh irah omok nolong ka'ah kepéh. Boh keh pu'un pekua' béé.

¹⁵ Barei' ha' lem surat Allah, ka' ha' Néh, Kelunan éh alaa' éh pinaa' bé' éh mutaa' kepéh, Kelunan éh alaa' éh kerat awah péh, bé' éh pu'un kurang. ha' Néh.

¹⁶Améé' bara' jian kenin ngan Allah uban Titus péh pekua' kenin ngan améé', gahang kenin juk tai nepah ka'ah ngan nolong keh.

¹⁷Bé' makat iah pekua' kenin kivu sohoo' mé' awah, bang kenin néh tengéé' péh keloo' nolong keh.

¹⁸La'ah pu'un jah padéé' lu' kivu éh tai, padéé' éh kenajung kuraa' kelunan tong sidang uban kereja' néh perengah Rengah Jian.

¹⁹Bé' iah tuai uban néh sohoo' mé' makat, bang iah éh kevéléé' ngan éh senohoo' kekat sidang, ke' néh kivu améé' dalem kereja' mé' éh petulat pengena' jin siget sidang éh nena' réh uban penika réh ngan Tuhan, dokoo' mé' peparen Tuhan ngan dokoo' kekat kelunan omok jam améé' juk nolong réh béé.

²⁰La'ah améé' mavaa' mu'un dai pu'un séé'-séé' péh pesala' mé' tong jalan mé' tulat pengena' iteu'.

²¹ Améé' juk maneu' éh pekua' éh teneng tong ta'an Tuhan ngan tong ta'an kelunan péh.

²²Pemung ngan Titus rawah améé' pu'un nyohoo' jah padéé' lu' éh pekua' pengelan, tai kivu réh, uban pinaa' koléé améé' lepah mena' kereja' ngan néh, ngelayau iah mekat maneu' éh, ngan hun iteu', uban néh ngelan ka'ah, gahang kenin néh juk nolong keh kepéh.

²³Titus nah bakéh ké' éh kereja' pemung ngan ké' ke' néh nolong ka'ah. Pu'un duah usah padéé' éh tai pemung ngan néh sohoo' irah sidang siteu', ngan kereja' réh omok peparen Kristus.

²⁴Jian keh pepoléng penika keh ngan réh, dokoo' kekat sidang omok jam ka'ah jam pika kelunan, ngan jam bé' mé' sala' hun mé' mejing ka'ah.