Read Western Penan PILIPI 1 Bible Online

PILIPI 1 - Western Penan bible

PILIPI 1

¹ Amo Paulus ngan Timotius éh kelunan sohoo' Kristus Yésus, amo maneu' surat iteu' ngan kekat kelunan éh anah Allah éh mokoo' tong tana' Pilipi éh ngelan tong Kristus Yésus, pemung ngan kekat pengeja'au ngan irah éh jah péh éh nolong tong sidang.

²Jian Allah éh Tamen lu', ngan Tuhan Yésus Kristus, mena' penika Néh ngan pengepawah Néh ngan keh.

³La'ah siget koléé' akeu' seruh tong ka'ah, ngelayau akeu' bara' jian kenin ngan Allah.

⁴Kenat péh siget koléé' hun ké' sebayang tong ka'ah pu'un ku' sebayang ngan jian kenin.

⁵Pu'un ku' seruh tong kekat jalan keh nolong ku' perengah Rengah Jian, jin bu'un keh pu'un menéng rengah iteu' rai, pah avéé' hun iteu' péh.

⁶La'ah akeu' jam Allah éh ngusii' kenin keh bu'un, adang Néh juk ngusii' kenin keh kepéh pah avéé' keh pu'un sukup ngan jian mu'un tong Dau Yésus Kristus pu'un tuai kepéh.

⁷Akeu' murung keh ngan nesen keh lem kenin ké'. Ka'ah béé pu'un nolong ku' lem kereja' ké' ngan Allah, jin ké' bé' jak tai lamin tutup ngan ké' nyakat tong kelunan éh juk kebéé Rengah Jian iteu', pah avéé' ké' pu'un lem lamin tutup nah péh.

⁸Allah éh jam akeu' pané mu'un hun ké' bara' akeu' pika keh ngan tawai keh neu' penika Kristus Yésus.

⁹Akeu' sebayang dokoo' penika keh ngan Allah ngan kelunan omok pepit, pemung ngan pengejam keh tong kekat éh teneng, pah avéé' keh jam seruh mu'un,

¹⁰dokoo' keh omok jam ngelayau ngevéléé' kekat éh jian. Boh ka'ah pu'un ni'ai, bé' pu'un ineu'-ineu' éh omok pesala' keh tong Dau Kristus pu'un tuai kepéh.

¹¹Akeu' keloo' kekat urip ngan barék keh pu'un jian neu' penyukat Yésus Kristus lem kenin keh, dokoo' keh omok peparen ngan mejing Allah.

¹²O kekat padéé' ké', akeu' keloo' ka'ah jam tong kekat penusah éh teneng tong akeu', penusah inah mukap jalan kepéh tong Rengah Jian.

¹³ Uban neu' penusah ké' iteu', pinaa' seradu tong lamin Raja' ngan kekat irah éh jah péh siteu', irah béé jam akeu' pu'un dalem lamin tutup uban ké' kivu Kristus.

¹⁴La'ah neu' ké' pu'un tong lamin tutup, pinaa' padéé' lu' dalem Tuhan pu'un éh gahang kepéh lem pengelan réh tong Tuhan, avéé' irah makang kenin bara' ha' Allah ngan bé' medai.

¹⁵Pu'un jelua' réh perengah Kristus uban réh leko tong akeu' ngan nyelepéé' kenin, bang jelua' réh kepéh, pu'un réh perengah éh ngan jian kenin.

¹⁶Irah maneu' kenat uban réh pika akeu' uban kejam réh akeu' pu'un siteu' dokoo' ké' nyakat kelunan éh juk kebéé Rengah Jian.

¹⁷Irah éh jah nah bé' réh perengah Kristus uban réh juk mihin kelunan ngelan Iah mu'un, bang irah seruh hun réh perengah Iah kenat, inah jalan réh omok petusah kenin ké' kepéh uban akeu' pu'un tong lamin tutup iteu'.

¹⁸Bang na' péh kenat, bé' akeu' sa'at kenin, murung kenin ké', sokoh néh kelunan pu'un bara' tong Kristus. Kenat péh hun irah bara' éh ngan teneng kenin, kenat péh hun néh bé' teneng kenin, sokoh néh réh bara' tong Kristus, boh ku' murung kenin.

¹⁹Uban akeu' jam neu' ha' sebayang keh ngan neu' Sahéé' Yésus Kristus pu'un nolong akeu', adang akeu' omok pelepu jin lamin tutup iteu' kepéh.

²⁰Uban kenin ké' mu'un, akeu' ngelan mai akeu' maneu' ineu'-ineu' éh omok mihin akeu' menyaa', bang siget-siget koléé', makin péh hun iteu' hun ké' pu'un tong lamin tutup, jian akeu' makang kenin dalem kekat urip ké', dokoo' ké' omok pesavéé' kenajung ngan Kristus, kenat péh hun ké' murip, kenat péh hun ké' matai péh.

²¹Uban urip ké', inah éh Kristus. Uban néh kenat hun ké' matai, inah éh pelapah jian.

²²Bang hun néh neu' ké' murip boh akeu' omok maneu' jah kereja' ngan Tuhan kepéh, hun néh kenat bé' akeu' jam éh mah éh tekep ké' ngevéléé'.

²³Uban duah kenin ké', jah kenin ké' juk piso jin usah ké' iteu' tai pemung ngan Kristus, uban inah éh pelapah jian.

²⁴Bang uban ka'ah, inah éh pelapah jian hun ké' omok murip keto.

²⁵Adang éh kenat, uban néh kenat bé' akeu' matai, adang akeu' omok murip ngan mokoo' ngan ka'ah, dokoo' ka'ah omok pepit kepéh dalem pengelan keh ngan kemurung keh tong Tuhan.

²⁶Hun néh kenat hun akeu' pu'un pemung ngan ka'ah kepéh, boh keh omok murung tong urip keh dalem Kristus Yésus.

²⁷La'ah jian kekat urip keh pu'un pekua' éh tekep tong Rengah Jian Kristus, dokoo' hun ké' pu'un tai ngan ka'ah, kenat péh hun ké' bé' omok tai péh, omok akeu' menéng rengah ka'ah pu'un nekedéng petem ngan pekua' kenin ngelawan ineu'-ineu' éh juk nyopéé' pengelan kelunan tong Rengah Jian iteu'.

²⁸Mai keh medai ayau keh, jian keh ngelayau makang kenin, hun néh kenat inah éh pepoléng éh ngan réh irah juk sopéé' awah ngan ka'ah omok menang uban Allah éh mihin lu' menang.

²⁹Jian keh murung kenin uban neu' penika Kristus Iah mihin keh ngelan tong Iah, bang bé' makat ngelan kenat awah, bang inah kepéh Iah mihin keh jam keta pemung ngan Néh.

³⁰ Hun iteu' ka'ah omok ngelawan pemung ngan ké' tong kekat éh kelawan ké' rai, ngan éh kelawan ké' pah avéé' hun iteu' pekua' éh nenéng keh nah.