Read Western Penan PILIPI 3 Bible Online

PILIPI 3 - Western Penan bible

PILIPI 3

¹O kekat padéé' ké', tong pengega' ha' ké', inah akeu' bara', jian ka'ah murung kenin dalem Tuhan. La'ah bé' akeu' menyaa' nyurat kepéh éh lepah senurat ké' rai, uban inah éh jalan keh omok jam seruh.

²Mavaa' usah keh jin kekat kelunan éh maneu' sa'at, barei' aseu' awah réh, gahang mu'un réh nyohoo' kelunan pesunat,

³bang uleu' éh pu'un pesunat éh teneng, uban uleu' seva' Allah naneu' Sahéé' Néh ngan murung naneu' urip lu' lem Kristus Yésus, bé' uleu' ngelan tong ineu'-ineu' éh omok neu' kelunan.

⁴Bé' makat uban néh bé' pu'un ineu'-ineu' kenat éh omok kenelan ké', adang éh pu'un. Hun kelunan seruh neu' kekat penganeu' réh inah éh omok mihin réh jian tong jumen Tuhan, makin péh tong akeu', omok akeu' jian uban pinaa' penganeu' éh lepah naneu' ké'.

⁵ Pu'un réh pesunat akeu' ayah dau la'o lohoo' ké'. La'ah pohoo' ké' inah éh pohoo' Yahudi, ngan akeu' pu'un jin betah Benyamin, Oo' mu'un, akeu' éh pohoo' Yahudi mu'un. Hun lepah rai pu'un ku' kivu kekat sebayang irah Yahudi, ngan pu'un ku' kivu adet Parisi,

⁶ avéé' ké' pu'un peketa sidang Tuhan. Hun kelunan omok teneng kenin tong jumen Tuhan neu' réh kivu sohoo' lem Surat Musa, akeu' éh pu'un kivu kekat néh béé.

⁷Bang tong kekat éh benara' ké' pu'un gunah bu'un rai, hun iteu' kepéh akeu' bara' éh pekua' moo' awah neu' pengelan ké' tong Kristus.

⁸Bé' makat kekat inah awah, bang kekat ineu'-ineu' péh kepéh akeu' bara' éh pekua' moo' awah hun ké' pepata éh tong kekat éh jian, inah éh tong pengejam ké' tong Kristus Yésus éh pengeja'au ké'. Uban neu' pengelan ké' tong Kristus, akeu' lepah bet kekat inah, kekat inah seleket moo' awah éh tong jumen ké', dokoo' ké' omok alaa' Kristus anah ké' mu'un,

⁹ngan pu'un petem dalem Iah. Bé' éh neu' pengeteneng ké' uban ké' pu'un kivu kekat sohoo' lem Surat Musa, bang pengeteneng éh pu'un neu' pengelan ké' tong Kristus, inah éh pengeteneng éh jin Allah éh pu'un neu' pengelan.

¹⁰Jah awah kenin ké', akeu' juk jam Kristus ngan juk jam tong penyukat Néh dalem pengebetéé' Néh jin patai Néh ngan juk pemung ngan Néh dalem pengeketa Néh, ngan pu'un barei' Iah dalem pengematai Néh,

¹¹dokoo' ké' omok betéé' jin patai ké' alaa' urip maréng.

¹²Bé' jak akeu' jam éh kenat, bé' jak akeu' pu'un sukup mu'un, bang akeu' juk lakau mu'un pah avéé' ké' pu'un jian mu'un, barei' éh seneruh Kristus Yésus hun néh purip ku' bu'un rai.

¹³O kekat padéé' ké', na' péh akeu' lepah peleka, bé' akeu' seruh akeu' lepah avéé' tong néh tenéh, bang jah awah éh neu' ké', akeu' juk ngelepan tong kekat pengelakau ké' lepah, ngan lakau mu'un dokoo' ké' omok avéé' tong éh juk tenavin ké' inah.

¹⁴Akeu' nekedeu' mu'un barei' irah lem petakéé' dokoo' ké' omok alaa' pengena' néh, inah éh, tong Allah tebai ku' dalem Kristus Yésus, dokoo' ké' omok alaa' urip maréng pemung ngan Néh tong seruga.

¹⁵Uban néh kenat kelunan éh jam seruh ngan éh sukup mu'un, jian iah pu'un kenin pekua' barei' iteu'. Hun pu'un séé'-séé' éh tengéé' kenin jin inah, Allah omok pekelenaa' éh ngan réh.

¹⁶Bang jian uleu' béé lakau kivu Tuhan lem kekat éh kenivu lu' rai.

¹⁷ O kekat padéé' ké', jian ka'ah kivu uban ké'. Pu'un mé' lepah bara' jalan ngan ka'ah, jian keh kivu kelunan éh kivu barék éh teneng inah.

¹⁸Pinaa' koléé' ké' bara' éh ngan keh tenéh, ngan hun iteu' kepéh akeu' bara' éh ngan baa' maten ké' musit mu'un, pu'un jelua' kelunan neu' barék néh éh sa'at, inah éh maneu' réh ayau Kristus éh matai tong kayeu' salib.

¹⁹Kelunan éh kenat adang réh pu'un tai tong luten meraka, uban pengeja'au réh inah éh kekat pengagat éh sa'at lem usah réh. Bau kenin réh tong kekat éh tekep réh menyaa', ngan irah seruh tong kekat éh pu'un jin tana' iteu' awah.

²⁰Bang tana' ngan baa' uleu' pu'un éh tong seruga, jin sinah uleu' mena Tuhan Yésus Kristus tuai kepéh, éh juk purip lu'.

²¹La'ah usah uleu' éh lemoo' ngan omok matai iteu', omok éh paléu pekua' usah Nah éh maren, naneu' penyukat Néh éh jalan Néh juk mihin ineu'-ineu' lem nihau Néh.