Read Western Penan 1 YOHANES 2 Bible Online

1 YOHANES 2 - Western Penan bible

1 YOHANES 2

¹O kekat anak ké', akeu' nyurat ngan keh dai ka'ah maneu' penyala', pu'un kelunan maneu' penyala', pu'un jah Usah éh nolong lu', inah éh Yésus Kristus éh teneng. Adang Iah omok menyat Tamen Néh pika lu'.

²Uban Kristus awah éh jalan mega' kekat penyala' lu', bé' éh kekat penyala' uleu' iteu' awah, bang jalan mega' penyala' kekat kelunan pah tipo tana'.

³Telana' lu' jam Allah inah éh hun lu' kivu kekat sohoo' Néh.

⁴Hun pu'un kelunan bara', Akeu' jam Allah, bang bé' iah kivu sohoo' Néh, kelunan inah kenyo awah, ngan Allah bé' pu'un dalem kenin néh.

⁵Bang séé séé' éh tigéh kivu sohoo' Néh, kelunan inah pika Allah mu'un, inah néh tada' uleu' murip petem dalem Allah.

⁶Séé' séé' éh bara' iah murip petem dalem Allah kelunan inah tekep murip kivu Pengurip Kristus.

⁷ O kekat padéé' ké' éh penika ké', ha' sohoo' éh senurat ké' iteu', bé' makat éh ha' sohoo' éh maréng, Ha' sohoo' iteu' ha' sohoo' éh lepah kejam keh jin bu'un keh ngelan tong Kristus. Ha' sohoo' iteu' Rengah jin Allah éh lepah nenéng keh.

⁸Na' péh kenat ha' sohoo' éh senurat ké' iteu' pu'un éh maréng uban pengeteneng néh pu'un poléng tong usah Kristus ngan tong usah ka'ah kepéh. Nah ke' néh kenat uban merem juk pajau, ngan rema éh mu'un lepah avéé'.

⁹Séé-séé' éh bara' iah murip lem rema, bang hun néh leko padéé' néh, kelunan inah to ke' murip dalem merem avéé' hun iteu'.

¹⁰Séé-séé éh pika padéé' néh iah murip dalem rema ngan bé' pu'un ineu'-ineu' lem Iah éh omok mihin kelunan éh jah maneu' penyala'.

¹¹Bang séé-séé éh leko padéé' néh kelunan inah murip dalem merem. Iah lakau dalem merem, ngan bé' éh jam kemah éh tai, uban merem inah lepah memeseu' maten néh.

¹²O kekat anak ké' akeu' nyurat ngan keh uban penyala' keh lepah pega' dalem ngaran Kristus.

¹³O kekat tamen, akeu' nyurat ngan keh uban keh jam Iah éh pu'un jin bu'un-bu'un. O kekat lemanai, akeu' nyurat ngan keh uban keh lepah nyopéé' Iah éh Sa'at.

¹⁴O kekat anak, akeu' nyurat uban keh lepah jam tong Allah Tamen. O kekat tamen, akeu' nyurat ngan keh uban keh jam Iah éh pu'un jin bu'un-bu'un sahau. O kekat lemanai, akeu' nyurat ngan keh uban keh pu'un gahang, ngan ha' tebaraa' Allah pu'un petem dalem keh, ngan pu'un keh lepah nyopéé' Iah éh Sa'at.

¹⁵Mai keh murung tana' iteu' ngan murung ineu'-ineu' éh pu'un tong tana' iteu'. Hun keh murung tana' iteu' bé' keh pu'un murung Allah Tamen.

¹⁶Uban kekat éh jin tana' iteu', inah éh pengagat lem kenin kelunan éh penyala', éh pekelih maten kelunan, ngan kekat éh benara' kelunan pu'un jian, bé' éh tuai jin Tamen, bang jin tana' iteu' awah.

¹⁷Tana' iteu' ngan kekat éh pu'un tong tana' iteu', éh kenelih kelunan bé' éh pelinguh. Bang kelunan éh maneu' pengeloo' Allah, omok murip pelinguh-linguh.

¹⁸O kekat anak ké' sioo' pengega' dau lepah danii'. Pu'un keh lepah menéng rengah ayau Kristus juk tuai, hun iteu' pinaa' kelunan éh ayau Kristus lepah musit, inah jalan uleu' omok jam sioo' pengega' dau lepah danii'.

¹⁹Kekat kelunan inah bé' réh pekua' kenin ngan lu', kenat péh irah piso jin uleu'. Hun réh pu'un pekua' kenin ngan lu', adang irah petem pemung ngan lu'. Irah nelana' réh tengéé' mu'un kenin ngan uleu' uban réh piso jin uleu'.

²⁰La'ah pu'un Kristus mena' Sahéé' Ni'ai ngan keh, kenat péh jalan keh jam tong tebaraa' éh teneng.

²¹La'ah akeu' nyurat ngan keh bé' makat uban keh bé' jam ha' tebaraa' éh teneng, bang uban keh jam éh ngan inah kepéh kejam keh bé' pu'un ha' éh kenyo jin lem kekat ha' tebaraa' éh teneng inah.

²²Hun néh kenat séé' éh kenyo? Séé-séé bara' Yésus bé' éh Iah éh Kristus éh pejajii' Allah, kelunan inah kenyo. Kelunan inah néh ayau Kristus, kelunan inah bé' ngelan tong Tamen kenat péh Anak Néh.

²³Uban hun néh bé' ngelan tong Anak Néh adang néh bé' ngelan tong Tamen Néh péh. La'ah kelunan éh alaa' Anak Néh, iah péh alaa' Tamen Néh kepéh.

²⁴Uban néh kenat, ha' tebaraa' éh nenéng keh jin bu'un-bu'un keh ngelan tong Kristus tekep nodoo' keh dalem kenin keh. Hun keh petem dalem ha' tebaraa' inah. Adang ka'ah ngelayau murip pemung ngan Anak Néh ngan Tamen Néh péh.

²⁵La'ah pu'un Kristus jajii' mena' urip pelinguh ngan lu'.

²⁶Pu'un ku' nyurat kenat ngan keh bara' tong irah éh juk ngelavo' keh.

²⁷Bang pu'un Kristus mena' Sahéé' Néh ngan keh ngan hun Sahéé' Ni'ai nah pu'un petem dalem keh, bé' tiken ke' kelunan éh jah nebaraa' keh kepéh uban Sahéé' nah nebaraa' keh tong kekat ineu'-ineu' péh. La'ah kekat ha' tebaraa' Néh teneng éh, bé' éh ngelavo' keh. Jian keh kivu kekat ha' tebaraa' éh jin Sahéé' Néh ngan petem murip pemung ngan Kristus.

²⁸O kekat anak ké', jian keh murip petem dalem Kristus, dokoo' tovoo' Iah pu'un tuai kepéh, uleu' omok makang kenin temeu' ngan Néh ngan bé' pu'un medai ngan menyaa'.

²⁹La'ah ka'ah jam Kristus maneu' pengeloo Allah. Uban néh kenat ka'ah jam siget-siget usah éh maneu' pengeloo' Allah Iah néh anak Allah.