Read Western Penan 1 YOHANES 4 Bible Online

1 YOHANES 4 - Western Penan bible

1 YOHANES 4

¹O kekat padéé' ké' éh kemurung ké', mai keh ulak ngelan ha' kelunan éh bara' iah pu'un Sahéé' Ni'ai, jian keh ngelenaa' réh dokoo' keh omok jam éh hun sahéé' inah pu'un jin Allah ngan hun néh bé' péh. Uban pinaa' kelunan éh ngelavo' lepah tai semah-semah péh.

²La'ah inah jalan keh omok jam hun néh Sahéé' jin Allah ngan hun néh bé' péh. Siget kelunan éh ngelan Yésus Kristus lepah tuai paléu kelunan, kelunan inah éh pu'un Sahéé' éh tuai jin Allah.

³Bang séé'-séé' éh bara' Yésus bé' pu'un tuai jin Allah, kelunan inah bé' éh pu'un Sahéé' jin Allah. Sahéé' inah pu'un jin ayau Kristus. Pu'un keh lepah menéng rengah néh juk tuai, ngan hun iteu' pu'un éh lepah avéé' tenéh

⁴O kekat anak ké', ka'ah éh anah Allah pu'un keh lepah nyopéé' irah éh tuai pané ngelavo' nah, uban Sahéé' Tuhan éh pu'un dalem keh, pelapah gahang éh jin sahéé' éh pu'un dalem irah éh pohoo' jin tana' iteu'.

⁵Irah nabi éh ngelavo' bara' tong kekat arong éh tong tana' iteu', ngan kelunan éh pohoo' tong tana' iteu', kivu ha' réh uban irah inah anah tana' iteu'.

⁶Bang uleu' iteu' éh anah Allah, ngan séé'-séé' éh jam Allah pu'un iah mihau ha' lu', la'ah séé'-séé' éh bé' pu'un jin Allah, bé' iah mihau ha' lu'. Kenat péh jalan uleu' omok jam tong Sahéé' éh teneng ngan tong sahéé' éh petawang awah.

⁷O kekat padéé' éh kemurung ké', jian uleu' pata pepika, uban penika nah jin Allah. Séé'-séé' éh pika kelunan inah pepoléng éh iah anak Allah ngan pu'un éh jam Allah.

⁸La'ah séé'-séé' éh bé' jam pika kelunan éh jah, bé' iah jam Allah, uban Allah inah penika.

⁹La'ah inah jalan Allah pepoléng penika Néh ngan lu', pu'un éh nyohoo' Anak Néh tuai tong tana' iteu' dokoo' neu' Anak Néh inah uleu' alaa' urip mu'un ngan pelinguh.

¹⁰Inah éh matek penika mu'un, bé' éh uleu' éh pika Allah, bang Allah éh pika uleu' ngan Iah nyohoo' Anak Néh tuai ke' Néh mega' penyala' lu'.

¹¹O kekat padéé' éh kemurung ké', hun Allah pika lu' kenat, tekep lu' pika kekat padéé' lu' kepéh.

¹² La'ah bé' pu'un kelunan séé'-séé' péh éh lepah na'at Allah bang hun uleu' pika kekat padéé' lu', Allah pu'un petem dalem lu' ngan penika Néh pu'un sukup dalem lu'.

¹³Jalan lu' jam uleu' pu'un petem dalem Allah ngan Iah pu'un petem dalem uleu', inah éh neu' Sahéé' Néh éh nena' Néh ngan lu'.

¹⁴Pu'un Allah nyohoo' Anak Néh tuai tong tana' iteu' ke' Néh purip kelunan. Améé' tengéé' péh lepah na'at Iah, ngan pu'un mé' bara' éh ngan kelunan éh jah kepéh.

¹⁵Séé'-séé' éh ngakun Yésus nah adang Néh Anak Allah, Allah pu'un petem dalem néh ngan iah péh petem dalem Allah,

¹⁶uleu' tengéé' jam ngan lenaa' mu'un tong Allah pu'un pika uleu'. Allah inah inan penika ngan séé-séé éh petem pika kelunan éh jah Iah pu'un petem dalem Allah ngan Allah pu'un petem dalem iah.

¹⁷Penika Néh pu'un sukup dalem lu', dokoo' lu' omok makang kenin tovoo' ga' dau' vam. Adang uleu' pu'un makang kenin uban urip lu' kelebéé' lu' murip tong tana' iteu', pu'un éh pekua' ngan urip Kristus.

¹⁸Kelunan éh lepah jam penika Allah bé' iah pu'un medai, uban penika éh sukup mu'un maneu' lu' bé' pu'un medai. Uban néh kenat kelunan éh bé' jak jam tong penika Allah ngan sukup mu'un adang néh medai kenukum tovoo' ga' dau vam.

¹⁹Uleu' pu'un pika kelunan uban Allah éh bu'un-bu'un pika uleu'.

²⁰Hun kelunan bara' iah pika Allah, bang iah leko padéé' néh, kelunan éh kenat kenyo awah, uban bé' iah omok pika Allah éh bé' omok ta'an néh, hun néh bé' pika padéé' néh éh poléng ta'an néh.

²¹Iteu' ha' sohoo' éh nena' Kristus ngan lu', hun séé-séé éh pika Allah tekep éh pika padéé' néh kepéh.