Read Westminster Leningrad Codex (morphological with vowels and accents) איוב 36 Bible Online

איוב 36 - Westminster Leningrad Codex (morphological with vowels and accents) bible

איוב 36

¹וַ/יֹּ֥סֶף אֱלִיה֗וּא וַ/יֹּאמַֽר׃

²כַּתַּר־לִ֣/י זְ֭עֵיר וַ/אֲחַוֶּ֑/ךָּ כִּ֤י ע֖וֹד לֶ/אֱל֣וֹהַּ מִלִּֽים׃

³אֶשָּׂ֣א דֵ֭עִ/י לְ/מֵ/רָח֑וֹק וּ֝/לְ/פֹעֲלִ֗/י אֶֽתֵּֽן־צֶֽדֶק׃

⁴כִּֽי־אָ֭מְנָם לֹא־שֶׁ֣קֶר מִלָּ֑/י תְּמִ֖ים דֵּע֣וֹת עִמָּֽ/ךְ׃

⁵הֶן־אֵ֣ל כַּ֭בִּיר וְ/לֹ֣א יִמְאָ֑ס כַּ֝בִּ֗יר כֹּ֣חַֽ לֵֽב׃

⁶לֹא־יְחַיֶּ֥ה רָשָׁ֑ע וּ/מִשְׁפַּ֖ט עֲנִיִּ֣ים יִתֵּֽן׃

⁷לֹֽא־יִגְרַ֥ע מִ/צַּדִּ֗יק עֵ֫ינָ֥י/ו וְ/אֶת־מְלָכִ֥ים לַ/כִּסֵּ֑א וַ/יֹּשִׁיבֵ֥/ם לָ֝/נֶ֗צַח וַ/יִּגְבָּֽהוּ׃

⁸וְ/אִם־אֲסוּרִ֥ים בַּ/זִּקִּ֑ים יִ֝לָּכְד֗וּ/ן בְּ/חַבְלֵי־עֹֽנִי׃

⁹וַ/יַּגֵּ֣ד לָ/הֶ֣ם פָּעֳלָ֑/ם וּ֝/פִשְׁעֵי/הֶ֗ם כִּ֣י יִתְגַּבָּֽרוּ׃

¹⁰וַ/יִּ֣גֶל אָ֭זְנָ/ם לַ/מּוּסָ֑ר וַ֝/יֹּ֗אמֶר כִּֽי־יְשֻׁב֥וּ/ן מֵ/אָֽוֶן׃

¹¹אִֽם־יִשְׁמְע֗וּ וְֽ/יַ֫עֲבֹ֥דוּ יְכַלּ֣וּ יְמֵי/הֶ֣ם בַּ/טּ֑וֹב וּ֝/שְׁנֵי/הֶ֗ם בַּ/נְּעִימִֽים׃

¹²וְ/אִם־לֹ֣א יִ֭שְׁמְעוּ בְּ/שֶׁ֣לַח יַעֲבֹ֑רוּ וְ֝/יִגְוְע֗וּ כִּ/בְלִי־דָֽעַת׃

¹³וְֽ/חַנְפֵי־לֵ֭ב יָשִׂ֣ימוּ אָ֑ף לֹ֥א יְ֝שַׁוְּע֗וּ כִּ֣י אֲסָרָֽ/ם׃

¹⁴תָּמֹ֣ת בַּ/נֹּ֣עַר נַפְשָׁ֑/ם וְ֝/חַיָּתָ֗/ם בַּ/קְּדֵשִֽׁים׃

¹⁵יְחַלֵּ֣ץ עָנִ֣י בְ/עָנְי֑/וֹ וְ/יִ֖גֶל בַּ/לַּ֣חַץ אָזְנָֽ/ם׃

¹⁶וְ/אַ֤ף הֲסִיתְ/ךָ֨ ׀ מִ/פִּי־צָ֗ר רַ֭חַב לֹא־מוּצָ֣ק תַּחְתֶּ֑י/הָ וְ/נַ֥חַת שֻׁ֝לְחָנְ/ךָ֗ מָ֣לֵא דָֽשֶׁן׃

¹⁷וְ/דִין־רָשָׁ֥ע מָלֵ֑אתָ דִּ֖ין וּ/מִשְׁפָּ֣ט יִתְמֹֽכוּ׃

¹⁸כִּֽי־חֵ֭מָה פֶּן־יְסִֽיתְ/ךָ֣ בְ/סָ֑פֶק וְ/רָב־כֹּ֝֗פֶר אַל־יַטֶּֽ/ךָּ׃

¹⁹הֲ/יַעֲרֹ֣ךְ שׁ֭וּעֲ/ךָ לֹ֣א בְ/צָ֑ר וְ֝/כֹ֗ל מַאֲמַצֵּי־כֹֽחַ׃

²⁰אַל־תִּשְׁאַ֥ף הַ/לָּ֑יְלָה לַ/עֲל֖וֹת עַמִּ֣ים תַּחְתָּֽ/ם׃

²¹הִ֭שָּׁמֶר אַל־תֵּ֣פֶן אֶל־אָ֑וֶן כִּֽי־עַל־זֶ֝֗ה בָּחַ֥רְתָּ מֵ/עֹֽנִי׃

²²הֶן־אֵ֭ל יַשְׂגִּ֣יב בְּ/כֹח֑/וֹ מִ֖י כָמֹ֣/הוּ מוֹרֶֽה׃

²³מִֽי־פָקַ֣ד עָלָ֣י/ו דַּרְכּ֑/וֹ וּ/מִֽי־אָ֝מַ֗ר פָּעַ֥לְתָּ עַוְלָֽה׃

²⁴זְ֭כֹר כִּֽי־תַשְׂגִּ֣יא פָעֳל֑/וֹ אֲשֶׁ֖ר שֹׁרְר֣וּ אֲנָשִֽׁים׃

²⁵כָּל־אָדָ֥ם חָֽזוּ־ב֑/וֹ אֱ֝נ֗וֹשׁ יַבִּ֥יט מֵ/רָחֽוֹק׃

²⁶הֶן־אֵ֣ל שַׂ֭גִּיא וְ/לֹ֣א נֵדָ֑ע מִסְפַּ֖ר שָׁנָ֣י/ו וְ/לֹא־חֵֽקֶר׃

²⁷כִּ֭י יְגָרַ֣ע נִטְפֵי־מָ֑יִם יָזֹ֖קּוּ מָטָ֣ר לְ/אֵדֽ/וֹ׃

²⁸אֲשֶֽׁר־יִזְּל֥וּ שְׁחָקִ֑ים יִ֝רְעֲפ֗וּ עֲלֵ֤י ׀ אָדָ֬ם רָֽב׃

²⁹אַ֣ף אִם־יָ֭בִין מִפְרְשֵׂי־עָ֑ב תְּ֝שֻׁא֗וֹת סֻכָּתֽ/וֹ׃

³⁰הֵן־פָּרַ֣שׂ עָלָ֣י/ו אוֹר֑/וֹ וְ/שָׁרְשֵׁ֖י הַ/יָּ֣ם כִּסָּֽה׃

³¹כִּי־בָ֭/ם יָדִ֣ין עַמִּ֑ים יִֽתֶּן־אֹ֥כֶל לְ/מַכְבִּֽיר׃

³²עַל־כַּפַּ֥יִם כִּסָּה־א֑וֹר וַ/יְצַ֖ו עָלֶ֣י/הָ בְ/מַפְגִּֽיעַ׃

³³יַגִּ֣יד עָלָ֣י/ו רֵע֑/וֹ מִ֝קְנֶ֗ה אַ֣ף עַל־עוֹלֶֽה׃