Read Westminster Leningrad Codex (morphological with vowels and accents) איוב 42 Bible Online

איוב 42 - Westminster Leningrad Codex (morphological with vowels and accents) bible

איוב 42

¹וַ/יַּ֖עַן אִיּ֥וֹב אֶת־יְהוָ֗ה וַ/יֹּאמַֽר׃

²[k_ידעת] [q_יָ֭דַעְתִּי] כִּי־כֹ֣ל תּוּכָ֑ל וְ/לֹא־יִבָּצֵ֖ר מִמְּ/ךָ֣ מְזִמָּֽה׃

³מִ֤י זֶ֨ה ׀ מַעְלִ֥ים עֵצָ֗ה בְּֽלִ֫י דָ֥עַת לָ/כֵ֣ן הִ֭גַּדְתִּי וְ/לֹ֣א אָבִ֑ין נִפְלָא֥וֹת מִ֝מֶּ֗/נִּי וְ/לֹ֣א אֵדָֽע׃

⁴שְֽׁמַֽע־נָ֭א וְ/אָנֹכִ֣י אֲדַבֵּ֑ר אֶ֝שְׁאָלְ/ךָ֗ וְ/הוֹדִיעֵֽ/נִי׃

⁵לְ/שֵֽׁמַע־אֹ֥זֶן שְׁמַעְתִּ֑י/ךָ וְ֝/עַתָּ֗ה עֵינִ֥/י רָאָֽתְ/ךָ׃

⁶עַל־כֵּ֭ן אֶמְאַ֣ס וְ/נִחַ֑מְתִּי עַל־עָפָ֥ר וָ/אֵֽפֶר׃ פ

⁷וַ/יְהִ֗י אַחַ֨ר דִּבֶּ֧ר יְהוָ֛ה אֶת־הַ/דְּבָרִ֥ים הָ/אֵ֖לֶּה אֶל־אִיּ֑וֹב וַ/יֹּ֨אמֶר יְהוָ֜ה אֶל־אֱלִיפַ֣ז הַ/תֵּֽימָנִ֗י חָרָ֨ה אַפִּ֤/י בְ/ךָ֙ וּ/בִ/שְׁנֵ֣י רֵעֶ֔י/ךָ כִּ֠י לֹ֣א דִבַּרְתֶּ֥ם אֵלַ֛/י נְכוֹנָ֖ה כְּ/עַבְדִּ֥/י אִיּֽוֹב׃

⁸וְ/עַתָּ֡ה קְחֽוּ־לָ/כֶ֣ם שִׁבְעָֽה־פָרִים֩ וְ/שִׁבְעָ֨ה אֵילִ֜ים וּ/לְכ֣וּ ׀ אֶל־עַבְדִּ֣/י אִיּ֗וֹב וְ/הַעֲלִיתֶ֤ם עוֹלָה֙ בַּֽעַדְ/כֶ֔ם וְ/אִיּ֣וֹב עַבְדִּ֔/י יִתְפַּלֵּ֖ל עֲלֵי/כֶ֑ם כִּ֧י אִם־פָּנָ֣י/ו אֶשָּׂ֗א לְ/בִלְתִּ֞י עֲשׂ֤וֹת עִמָּ/כֶם֙ נְבָלָ֔ה כִּ֠י לֹ֣א דִבַּרְתֶּ֥ם אֵלַ֛/י נְכוֹנָ֖ה כְּ/עַבְדִּ֥/י אִיּֽוֹב׃

⁹וַ/יֵּלְכוּ֩ אֱלִיפַ֨ז הַ/תֵּֽימָנִ֜י וּ/בִלְדַּ֣ד הַ/שּׁוּחִ֗י צֹפַר֙ הַ/נַּ֣עֲמָתִ֔י וַֽ/יַּעֲשׂ֔וּ כַּ/אֲשֶׁ֛ר דִּבֶּ֥ר אֲלֵי/הֶ֖ם יְהוָ֑ה וַ/יִּשָּׂ֥א יְהוָ֖ה אֶת־פְּנֵ֥י אִיּֽוֹב׃

¹⁰וַֽ/יהוָ֗ה שָׁ֚ב אֶת־[k_שבית] [q_שְׁב֣וּת] אִיּ֔וֹב בְּ/הִֽתְפַּֽלְל֖/וֹ בְּעַ֣ד רֵעֵ֑/הוּ וַ֧/יֹּסֶף יְהוָ֛ה אֶת־כָּל־אֲשֶׁ֥ר לְ/אִיּ֖וֹב לְ/מִשְׁנֶֽה׃

¹¹וַ/יָּבֹ֣אוּ אֵ֠לָי/ו כָּל־אֶחָ֨י/ו וְ/כָל־[k_אחיתי/ו] [q_אַחְיוֹתָ֜י/ו] וְ/כָל־יֹדְעָ֣י/ו לְ/פָנִ֗ים וַ/יֹּאכְל֨וּ עִמּ֣/וֹ לֶחֶם֮ בְּ/בֵית/וֹ֒ וַ/יָּנֻ֤דוּ ל/וֹ֙ וַ/יְנַחֲמ֣וּ אֹת֔/וֹ עַ֚ל כָּל־הָ֣/רָעָ֔ה אֲשֶׁר־הֵבִ֥יא יְהוָ֖ה עָלָ֑י/ו וַ/יִּתְּנוּ־ל֗/וֹ אִ֚ישׁ קְשִׂיטָ֣ה אֶחָ֔ת וְ/אִ֕ישׁ נֶ֥זֶם זָהָ֖ב אֶחָֽד׃ ס

¹²וַֽ/יהוָ֗ה בֵּרַ֛ךְ אֶת־אַחֲרִ֥ית אִיּ֖וֹב מֵ/רֵאשִׁת֑/וֹ וַֽ/יְהִי־ל֡/וֹ אַרְבָּעָה֩ עָשָׂ֨ר אֶ֜לֶף צֹ֗אן וְ/שֵׁ֤שֶׁת אֲלָפִים֙ גְּמַלִּ֔ים וְ/אֶֽלֶף־צֶ֥מֶד בָּקָ֖ר וְ/אֶ֥לֶף אֲתוֹנֽוֹת׃

¹³וַֽ/יְהִי־ל֛/וֹ שִׁבְעָ֥נָה בָנִ֖ים וְ/שָׁל֥וֹשׁ בָּנֽוֹת׃

¹⁴וַ/יִּקְרָ֤א שֵׁם־הָֽ/אַחַת֙ יְמִימָ֔ה וְ/שֵׁ֥ם הַ/שֵּׁנִ֖ית קְצִיעָ֑ה וְ/שֵׁ֥ם הַ/שְּׁלִישִׁ֖ית קֶ֥רֶן הַפּֽוּךְ׃

¹⁵וְ/לֹ֨א נִמְצָ֜א נָשִׁ֥ים יָפ֛וֹת כִּ/בְנ֥וֹת אִיּ֖וֹב בְּ/כָל־הָ/אָ֑רֶץ וַ/יִּתֵּ֨ן לָ/הֶ֧ם אֲבִי/הֶ֛ם נַחֲלָ֖ה בְּ/ת֥וֹךְ אֲחֵי/הֶֽם׃ ס

¹⁶וַ/יְחִ֤י אִיּוֹב֙ אַֽחֲרֵי־זֹ֔את מֵאָ֥ה וְ/אַרְבָּעִ֖ים שָׁנָ֑ה [k_ו/ירא] [q_וַ/יִּרְאֶ֗ה] אֶת־בָּנָי/ו֙ וְ/אֶת־בְּנֵ֣י בָנָ֔י/ו אַרְבָּעָ֖ה דֹּרֽוֹת׃

¹⁷וַ/יָּ֣מָת אִיּ֔וֹב זָקֵ֖ן וּ/שְׂבַ֥ע יָמִֽים׃