Read Westminster Leningrad Codex (morphological with vowels and accents) תהלים 103 Bible Online

תהלים 103 - Westminster Leningrad Codex (morphological with vowels and accents) bible

תהלים 103

¹לְ/דָוִ֨ד ׀ בָּרֲכִ֣י נַ֭פְשִׁ/י אֶת־יְהוָ֑ה וְ/כָל־קְ֝רָבַ֗/י אֶת־שֵׁ֥ם קָדְשֽׁ/וֹ׃

²בָּרֲכִ֣י נַ֭פְשִׁ/י אֶת־יְהוָ֑ה וְ/אַל־תִּ֝שְׁכְּחִ֗י כָּל־גְּמוּלָֽי/ו׃

³הַ/סֹּלֵ֥חַ לְ/כָל־עֲוֺנֵ֑/כִי הָ֝/רֹפֵ֗א לְ/כָל־תַּחֲלֻאָֽיְ/כִי׃

⁴הַ/גּוֹאֵ֣ל מִ/שַּׁ֣חַת חַיָּ֑יְ/כִי הַֽ֝/מְעַטְּרֵ֗/כִי חֶ֣סֶד וְ/רַחֲמִֽים׃

⁵הַ/מַּשְׂבִּ֣יַע בַּ/טּ֣וֹב עֶדְיֵ֑/ךְ תִּתְחַדֵּ֖שׁ כַּ/נֶּ֣שֶׁר נְעוּרָֽיְ/כִי׃

⁶עֹשֵׂ֣ה צְדָק֣וֹת יְהוָ֑ה וּ֝/מִשְׁפָּטִ֗ים לְ/כָל־עֲשׁוּקִֽים׃

⁷יוֹדִ֣יעַ דְּרָכָ֣י/ו לְ/מֹשֶׁ֑ה לִ/בְנֵ֥י יִ֝שְׂרָאֵ֗ל עֲלִילֽוֹתָי/ו׃

⁸רַח֣וּם וְ/חַנּ֣וּן יְהוָ֑ה אֶ֖רֶךְ אַפַּ֣יִם וְ/רַב־חָֽסֶד׃

⁹לֹֽא־לָ/נֶ֥צַח יָרִ֑יב וְ/לֹ֖א לְ/עוֹלָ֣ם יִטּֽוֹר׃

¹⁰לֹ֣א כַ֭/חֲטָאֵי/נוּ עָ֣שָׂה לָ֑/נוּ וְ/לֹ֥א כַ֝/עֲוֺנֹתֵ֗י/נוּ גָּמַ֥ל עָלֵֽי/נוּ׃

¹¹כִּ֤י כִ/גְבֹ֣הַּ שָׁ֭מַיִם עַל־הָ/אָ֑רֶץ גָּבַ֥ר חַ֝סְדּ֗/וֹ עַל־יְרֵאָֽי/ו׃

¹²כִּ/רְחֹ֣ק מִ֭זְרָח מִֽ/מַּֽעֲרָ֑ב הִֽרְחִ֥יק מִ֝מֶּ֗/נּוּ אֶת־פְּשָׁעֵֽי/נוּ׃

¹³כְּ/רַחֵ֣ם אָ֭ב עַל־בָּנִ֑ים רִחַ֥ם יְ֝הוָ֗ה עַל־יְרֵאָֽי/ו׃

¹⁴כִּי־ה֖וּא יָדַ֣ע יִצְרֵ֑/נוּ זָ֝כ֗וּר כִּי־עָפָ֥ר אֲנָֽחְנוּ׃

¹⁵אֱ֭נוֹשׁ כֶּ/חָצִ֣יר יָמָ֑י/ו כְּ/צִ֥יץ הַ֝/שָּׂדֶ֗ה כֵּ֣ן יָצִֽיץ׃

¹⁶כִּ֤י ר֣וּחַ עָֽבְרָה־בּ֣/וֹ וְ/אֵינֶ֑/נּוּ וְ/לֹא־יַכִּירֶ֖/נּוּ ע֣וֹד מְקוֹמֽ/וֹ׃

¹⁷וְ/חֶ֤סֶד יְהוָ֨ה ׀ מֵ/עוֹלָ֣ם וְ/עַד־ע֭וֹלָם עַל־יְרֵאָ֑י/ו וְ֝/צִדְקָת֗/וֹ לִ/בְנֵ֥י בָנִֽים׃

¹⁸לְ/שֹׁמְרֵ֥י בְרִית֑/וֹ וּ/לְ/זֹכְרֵ֥י פִ֝קֻּדָ֗י/ו לַ/עֲשׂוֹתָֽ/ם׃

¹⁹יְֽהוָ֗ה בַּ֭/שָּׁמַיִם הֵכִ֣ין כִּסְא֑/וֹ וּ֝/מַלְכוּת֗/וֹ בַּ/כֹּ֥ל מָשָֽׁלָה׃

²⁰בָּרֲכ֥וּ יְהוָ֗ה מַלְאָ֫כָ֥י/ו גִּבֹּ֣רֵי כֹ֭חַ עֹשֵׂ֣י דְבָר֑/וֹ לִ֝/שְׁמֹ֗עַ בְּ/ק֣וֹל דְּבָרֽ/וֹ׃

²¹בָּרֲכ֣וּ יְ֭הוָה כָּל־צְבָאָ֑י/ו מְ֝שָׁרְתָ֗י/ו עֹשֵׂ֥י רְצוֹנֽ/וֹ׃

²²בָּרֲכ֤וּ יְהוָ֨ה ׀ כָּֽל־מַעֲשָׂ֗י/ו בְּ/כָל־מְקֹמ֥וֹת מֶמְשַׁלְתּ֑/וֹ בָּרֲכִ֥י נַ֝פְשִׁ֗/י אֶת־יְהוָֽה׃