Read Westminster Leningrad Codex (morphological with vowels and accents) ירמיהו 12 Bible Online

ירמיהו 12 - Westminster Leningrad Codex (morphological with vowels and accents) bible

ירמיהו 12

¹צַדִּ֤יק אַתָּה֙ יְהוָ֔ה כִּ֥י אָרִ֖יב אֵלֶ֑י/ךָ אַ֤ךְ מִשְׁפָּטִים֙ אֲדַבֵּ֣ר אוֹתָ֔/ךְ מַדּ֗וּעַ דֶּ֤רֶךְ רְשָׁעִים֙ צָלֵ֔חָה שָׁל֖וּ כָּל־בֹּ֥גְדֵי בָֽגֶד׃

²נְטַעְתָּ/ם֙ גַּם־שֹׁרָ֔שׁוּ יֵלְכ֖וּ גַּם־עָ֣שׂוּ פֶ֑רִי קָר֤וֹב אַתָּה֙ בְּ/פִי/הֶ֔ם וְ/רָח֖וֹק מִ/כִּלְיוֹתֵי/הֶֽם׃

³וְ/אַתָּ֤ה יְהוָה֙ יְדַעְתָּ֔/נִי תִּרְאֵ֕/נִי וּ/בָחַנְתָּ֥ לִבִּ֖/י אִתָּ֑/ךְ הַתִּקֵ/ם֙ כְּ/צֹ֣אן לְ/טִבְחָ֔ה וְ/הַקְדִּשֵׁ֖/ם לְ/י֥וֹם הֲרֵגָֽה׃ ס

⁴עַד־מָתַי֙ תֶּאֱבַ֣ל הָ/אָ֔רֶץ וְ/עֵ֥שֶׂב כָּל־הַ/שָּׂדֶ֖ה יִיבָ֑שׁ מֵ/רָעַ֣ת יֹֽשְׁבֵי־בָ֗/הּ סָפְתָ֤ה בְהֵמוֹת֙ וָ/ע֔וֹף כִּ֣י אָמְר֔וּ לֹ֥א יִרְאֶ֖ה אֶת־אַחֲרִיתֵֽ/נוּ׃

⁵כִּ֣י אֶת־רַגְלִ֥ים ׀ רַ֙צְתָּה֙ וַ/יַּלְא֔וּ/ךָ וְ/אֵ֥יךְ תְּתַֽחֲרֶ֖ה אֶת־הַ/סּוּסִ֑ים וּ/בְ/אֶ֤רֶץ שָׁלוֹם֙ אַתָּ֣ה בוֹטֵ֔חַ וְ/אֵ֥יךְ תַּעֲשֶׂ֖ה בִּ/גְא֥וֹן הַ/יַּרְדֵּֽן׃

⁶כִּ֧י גַם־אַחֶ֣י/ךָ וּ/בֵית־אָבִ֗י/ךָ גַּם־הֵ֙מָּה֙ בָּ֣גְדוּ בָ֔/ךְ גַּם־הֵ֛מָּה קָרְא֥וּ אַחֲרֶ֖י/ךָ מָלֵ֑א אַל־תַּאֲמֵ֣ן בָּ֔/ם כִּֽי־יְדַבְּר֥וּ אֵלֶ֖י/ךָ טוֹבֽוֹת׃ ס

⁷עָזַ֙בְתִּי֙ אֶת־בֵּיתִ֔/י נָטַ֖שְׁתִּי אֶת־נַחֲלָתִ֑/י נָתַ֛תִּי אֶת־יְדִד֥וּת נַפְשִׁ֖/י בְּ/כַ֥ף אֹיְבֶֽי/הָ׃

⁸הָיְתָה־לִּ֥/י נַחֲלָתִ֖/י כְּ/אַרְיֵ֣ה בַ/יָּ֑עַר נָתְנָ֥ה עָלַ֛/י בְּ/קוֹלָ֖/הּ עַל־כֵּ֥ן שְׂנֵאתִֽי/הָ׃

⁹הַ/עַ֨יִט צָב֤וּעַ נַחֲלָתִ/י֙ לִ֔/י הַ/עַ֖יִט סָבִ֣יב עָלֶ֑י/הָ לְכ֗וּ אִסְפ֛וּ כָּל־חַיַּ֥ת הַ/שָּׂדֶ֖ה הֵתָ֥יוּ לְ/אָכְלָֽה׃

¹⁰רֹעִ֤ים רַבִּים֙ שִֽׁחֲת֣וּ כַרְמִ֔/י בֹּסְס֖וּ אֶת־חֶלְקָתִ֑/י נָֽתְנ֛וּ אֶת־חֶלְקַ֥ת חֶמְדָּתִ֖/י לְ/מִדְבַּ֥ר שְׁמָמָֽה׃

¹¹שָׂמָ/הּ֙ לִ/שְׁמָמָ֔ה אָבְלָ֥ה עָלַ֖/י שְׁמֵמָ֑ה נָשַׁ֙מָּה֙ כָּל־הָ/אָ֔רֶץ כִּ֛י אֵ֥ין אִ֖ישׁ שָׂ֥ם עַל־לֵֽב׃

¹²עַֽל־כָּל־שְׁפָיִ֣ם בַּ/מִּדְבָּ֗ר בָּ֚אוּ שֹֽׁדְדִ֔ים כִּ֣י חֶ֤רֶב לַֽ/יהוָה֙ אֹֽכְלָ֔ה מִ/קְצֵה־אֶ֖רֶץ וְ/עַד־קְצֵ֣ה הָ/אָ֑רֶץ אֵ֥ין שָׁל֖וֹם לְ/כָל־בָּשָֽׂר׃ ס

¹³זָרְע֤וּ חִטִּים֙ וְ/קֹצִ֣ים קָצָ֔רוּ נֶחְל֖וּ לֹ֣א יוֹעִ֑לוּ וּ/בֹ֙שׁוּ֙ מִ/תְּבוּאֹ֣תֵי/כֶ֔ם מֵ/חֲר֖וֹן אַף־יְהוָֽה׃ ס

¹⁴כֹּ֣ה ׀ אָמַ֣ר יְהוָ֗ה עַל־כָּל־שְׁכֵנַ/י֙ הָֽ/רָעִ֔ים הַ/נֹּֽגְעִים֙ בַּֽ/נַּחֲלָ֔ה אֲשֶׁר־הִנְחַ֥לְתִּי אֶת־עַמִּ֖/י אֶת־יִשְׂרָאֵ֑ל הִנְ/נִ֤י נֹֽתְשָׁ/ם֙ מֵ/עַ֣ל אַדְמָתָ֔/ם וְ/אֶת־בֵּ֥ית יְהוּדָ֖ה אֶתּ֥וֹשׁ מִ/תּוֹכָֽ/ם׃

¹⁵וְ/הָיָ֗ה אַֽחֲרֵי֙ נָתְשִׁ֣/י אוֹתָ֔/ם אָשׁ֖וּב וְ/רִֽחַמְתִּ֑י/ם וַ/הֲשִׁבֹתִ֛י/ם אִ֥ישׁ לְ/נַחֲלָת֖/וֹ וְ/אִ֥ישׁ לְ/אַרְצֽ/וֹ׃

¹⁶וְ/הָיָ֡ה אִם־לָמֹ֣ד יִלְמְדוּ֩ אֶת־דַּֽרְכֵ֨י עַמִּ֜/י לְ/הִשָּׁבֵ֤עַ בִּ/שְׁמִ/י֙ חַי־יְהוָ֔ה כַּ/אֲשֶׁ֤ר לִמְּדוּ֙ אֶת־עַמִּ֔/י לְ/הִשָּׁבֵ֖עַ בַּ/בָּ֑עַל וְ/נִבְנ֖וּ בְּ/ת֥וֹךְ עַמִּֽ/י׃

¹⁷וְ/אִ֖ם לֹ֣א יִשְׁמָ֑עוּ וְ/נָ֨תַשְׁתִּ֜י אֶת־הַ/גּ֥וֹי הַ/ה֛וּא נָת֥וֹשׁ וְ/אַבֵּ֖ד נְאֻם־יְהוָֽה׃ ס