Read Westminster Leningrad Codex (consonants) שמואל ב 21 Bible Online

שמואל ב 21 - Westminster Leningrad Codex (consonants) bible

שמואל ב 21

¹ויהי רעב בימי דוד שלש שנים שנה אחרי שנה ויבקש דוד את פני יהוה ס ויאמר יהוה אל שאול ואל בית הדמים על אשר המית את הגבענים

²ויקרא המלך לגבענים ויאמר אליהם והגבענים לא מבני ישראל המה כי אם מיתר האמרי ובני ישראל נשבעו להם ויבקש שאול להכתם בקנאתו לבני ישראל ויהודה

³ויאמר דוד אל הגבענים מה אעשה לכם ובמה אכפר וברכו את נחלת יהוה

⁴ויאמרו לו הגבענים אין [k_לי] [q_לנו] כסף וזהב עם שאול ועם ביתו ואין לנו איש להמית בישראל ויאמר מה אתם אמרים אעשה לכם

⁵ויאמרו אל המלך האיש אשר כלנו ואשר דמה לנו נשמדנו מהתיצב בכל גבל ישראל

⁶[k_ינתן] [q_יתן] לנו שבעה אנשים מבניו והוקענום ליהוה בגבעת שאול בחיר יהוה ס ויאמר המלך אני אתן

⁷ויחמל המלך על מפי בשת בן יהונתן בן שאול על שבעת יהוה אשר בינתם בין דוד ובין יהונתן בן שאול

⁸ויקח המלך את שני בני רצפה בת איה אשר ילדה לשאול את ארמני ואת מפבשת ואת חמשת בני מיכל בת שאול אשר ילדה לעדריאל בן ברזלי המחלתי

⁹ויתנם ביד הגבענים ויקיעם בהר לפני יהוה ויפלו [k_שבעתים] [q_שבעתם] יחד [k_והם] [q_והמה] המתו בימי קציר בראשנים [k_תחלת] [q_בתחלת] קציר שערים

¹⁰ותקח רצפה בת איה את השק ותטהו לה אל הצור מתחלת קציר עד נתך מים עליהם מן השמים ולא נתנה עוף השמים לנוח עליהם יומם ואת חית השדה לילה

¹¹ויגד לדוד את אשר עשתה רצפה בת איה פלגש שאול

¹²וילך דוד ויקח את עצמות שאול ואת עצמות יהונתן בנו מאת בעלי יביש גלעד אשר גנבו אתם מרחב בית שן אשר [k_תלום] [q_תלאום] [k_שם] [k_הפלשתים] [q_שמה] [q_פלשתים] ביום הכות פלשתים את שאול בגלבע

¹³ויעל משם את עצמות שאול ואת עצמות יהונתן בנו ויאספו את עצמות המוקעים

¹⁴ויקברו את עצמות שאול ויהונתן בנו בארץ בנימן בצלע בקבר קיש אביו ויעשו כל אשר צוה המלך ויעתר אלהים לארץ אחרי כן פ

¹⁵ותהי עוד מלחמה לפלשתים את ישראל וירד דוד ועבדיו עמו וילחמו את פלשתים ויעף דוד

¹⁶[k_וישבו] [q_וישבי] בנב אשר בילידי הרפה ומשקל קינו שלש מאות משקל נחשת והוא חגור חדשה ויאמר להכות את דוד

¹⁷ויעזר לו אבישי בן צרויה ויך את הפלשתי וימיתהו אז נשבעו אנשי דוד לו לאמר לא תצא עוד אתנו למלחמה ולא תכבה את נר ישראל פ

¹⁸ויהי אחרי כן ותהי עוד המלחמה בגוב עם פלשתים אז הכה סבכי החשתי את סף אשר בילדי הרפה פ

¹⁹ותהי עוד המלחמה בגוב עם פלשתים ויך אלחנן בן יערי ארגים בית הלחמי את גלית הגתי ועץ חניתו כמנור ארגים ס

²⁰ותהי עוד מלחמה בגת ויהי איש [k_מדין] [q_מדון] ואצבעת ידיו ואצבעת רגליו שש ושש עשרים וארבע מספר וגם הוא ילד להרפה

²¹ויחרף את ישראל ויכהו יהונתן בן [k_שמעי] [q_שמעה] אחי דוד

²²את ארבעת אלה ילדו להרפה בגת ויפלו ביד דוד וביד עבדיו פ