Read Westminster Leningrad Codex (consonants) שמואל ב 23 Bible Online

שמואל ב 23 - Westminster Leningrad Codex (consonants) bible

שמואל ב 23

¹ואלה דברי דוד האחרנים נאם דוד בן ישי ונאם הגבר הקם על משיח אלהי יעקב ונעים זמרות ישראל

²רוח יהוה דבר בי ומלתו על לשוני

³אמר אלהי ישראל לי דבר צור ישראל מושל באדם צדיק מושל יראת אלהים

⁴וכאור בקר יזרח שמש בקר לא עבות מנגה ממטר דשא מארץ

⁵כי לא כן ביתי עם אל כי ברית עולם שם לי ערוכה בכל ושמרה כי כל ישעי וכל חפץ כי לא יצמיח

⁶ובליעל כקוץ מנד כלהם כי לא ביד יקחו

⁷ואיש יגע בהם ימלא ברזל ועץ חנית ובאש שרוף ישרפו בשבת פ

⁸אלה שמות הגברים אשר לדוד ישב בשבת תחכמני ראש השלשי הוא עדינו [k_העצנו] [q_העצני] על שמנה מאות חלל בפעם [k_אחד] [q_אחת] ס

⁹[k_ואחרו] [q_ואחריו] אלעזר בן [k_דדי] [q_דדו] בן אחחי בשלשה [k_גברים] [q_הגברים] עם דוד בחרפם בפלשתים נאספו שם למלחמה ויעלו איש ישראל

¹⁰הוא קם ויך בפלשתים עד כי יגעה ידו ותדבק ידו אל החרב ויעש יהוה תשועה גדולה ביום ההוא והעם ישבו אחריו אך לפשט ס

¹¹ואחריו שמא בן אגא הררי ויאספו פלשתים לחיה ותהי שם חלקת השדה מלאה עדשים והעם נס מפני פלשתים

¹²ויתיצב בתוך החלקה ויצילה ויך את פלשתים ויעש יהוה תשועה גדולה ס

¹³וירדו [k_שלשים] [q_שלשה] מהשלשים ראש ויבאו אל קציר אל דוד אל מערת עדלם וחית פלשתים חנה בעמק רפאים

¹⁴ודוד אז במצודה ומצב פלשתים אז בית לחם

¹⁵ויתאוה דוד ויאמר מי ישקני מים מבאר בית לחם אשר בשער

¹⁶ויבקעו שלשת הגברים במחנה פלשתים וישאבו מים מבאר בית לחם אשר בשער וישאו ויבאו אל דוד ולא אבה לשתותם ויסך אתם ליהוה

¹⁷ויאמר חלילה לי יהוה מעשתי זאת הדם האנשים ההלכים בנפשותם ולא אבה לשתותם אלה עשו שלשת הגברים ס

¹⁸ואבישי אחי יואב בן צרויה הוא ראש [k_השלשי] [q_השלשה] והוא עורר את חניתו על שלש מאות חלל ולו שם בשלשה

¹⁹מן השלשה הכי נכבד ויהי להם לשר ועד השלשה לא בא ס

²⁰ובניהו בן יהוידע בן איש [k_חי] [q_חיל] רב פעלים מקבצאל הוא הכה את שני אראל מואב והוא ירד והכה את [k_האריה] [q_הארי] בתוך הבאר ביום השלג

²¹והוא הכה את איש מצרי [k_אשר] [q_איש] מראה וביד המצרי חנית וירד אליו בשבט ויגזל את החנית מיד המצרי ויהרגהו בחניתו

²²אלה עשה בניהו בן יהוידע ולו שם בשלשה הגברים

²³מן השלשים נכבד ואל השלשה לא בא וישמהו דוד אל משמעתו ס

²⁴עשה אל אחי יואב בשלשים אלחנן בן דדו בית לחם

²⁵שמה החרדי אליקא החרדי ס

²⁶חלץ הפלטי עירא בן עקש התקועי ס

²⁷אביעזר הענתתי מבני החשתי ס

²⁸צלמון האחחי מהרי הנטפתי ס

²⁹חלב בן בענה הנטפתי ס אתי בן ריבי מגבעת בני בנימן ס

³⁰בניהו פרעתני הדי מנחלי געש ס

³¹אבי עלבון הערבתי עזמות הברחמי ס

³²אליחבא השעלבני בני ישן יהונתן ס

³³שמה ההררי אחיאם בן שרר האררי ס

³⁴אליפלט בן אחסבי בן המעכתי ס אליעם בן אחיתפל הגלני ס

³⁵[k_חצרו] [q_חצרי] הכרמלי פערי הארבי ס

³⁶יגאל בן נתן מצבה ס בני הגדי ס

³⁷צלק העמני ס נחרי הבארתי [k_נשאי] [q_נשא] כלי יואב בן צריה ס

³⁸עירא היתרי גרב היתרי ס

³⁹אוריה החתי כל שלשים ושבעה פ