Read Westminster Leningrad Codex (consonants) שמואל ב 5 Bible Online

שמואל ב 5 - Westminster Leningrad Codex (consonants) bible

שמואל ב 5

¹ויבאו כל שבטי ישראל אל דוד חברונה ויאמרו לאמר הננו עצמך ובשרך אנחנו

²גם אתמול גם שלשום בהיות שאול מלך עלינו אתה [k_הייתה] [q_היית] [k_מוציא] [q_המוציא] [k_והמבי] [q_והמביא] את ישראל ויאמר יהוה לך אתה תרעה את עמי את ישראל ואתה תהיה לנגיד על ישראל

³ויבאו כל זקני ישראל אל המלך חברונה ויכרת להם המלך דוד ברית בחברון לפני יהוה וימשחו את דוד למלך על ישראל פ

⁴בן שלשים שנה דוד במלכו ארבעים שנה מלך

⁵בחברון מלך על יהודה שבע שנים וששה חדשים ובירושלם מלך שלשים ושלש שנה על כל ישראל ויהודה

⁶וילך המלך ואנשיו ירושלם אל היבסי יושב הארץ ויאמר לדוד לאמר לא תבוא הנה כי אם הסירך העורים והפסחים לאמר לא יבוא דוד הנה

⁷וילכד דוד את מצדת ציון היא עיר דוד

⁸ויאמר דוד ביום ההוא כל מכה יבסי ויגע בצנור ואת הפסחים ואת העורים [k_שנאו] [q_שנאי] נפש דוד על כן יאמרו עור ופסח לא יבוא אל הבית

⁹וישב דוד במצדה ויקרא לה עיר דוד ויבן דוד סביב מן המלוא וביתה

¹⁰וילך דוד הלוך וגדול ויהוה אלהי צבאות עמו פ

¹¹וישלח חירם מלך צר מלאכים אל דוד ועצי ארזים וחרשי עץ וחרשי אבן קיר ויבנו בית לדוד

¹²וידע דוד כי הכינו יהוה למלך על ישראל וכי נשא ממלכתו בעבור עמו ישראל ס

¹³ויקח דוד עוד פלגשים ונשים מירושלם אחרי באו מחברון ויולדו עוד לדוד בנים ובנות

¹⁴ואלה שמות הילדים לו בירושלם שמוע ושובב ונתן ושלמה

¹⁵ויבחר ואלישוע ונפג ויפיע

¹⁶ואלישמע ואלידע ואליפלט פ

¹⁷וישמעו פלשתים כי משחו את דוד למלך על ישראל ויעלו כל פלשתים לבקש את דוד וישמע דוד וירד אל המצודה

¹⁸ופלשתים באו וינטשו בעמק רפאים

¹⁹וישאל דוד ביהוה לאמר האעלה אל פלשתים התתנם בידי ויאמר יהוה אל דוד עלה כי נתן אתן את הפלשתים בידך

²⁰ויבא דוד בבעל פרצים ויכם שם דוד ויאמר פרץ יהוה את איבי לפני כפרץ מים על כן קרא שם המקום ההוא בעל פרצים

²¹ויעזבו שם את עצביהם וישאם דוד ואנשיו פ

²²ויספו עוד פלשתים לעלות וינטשו בעמק רפאים

²³וישאל דוד ביהוה ויאמר לא תעלה הסב אל אחריהם ובאת להם ממול בכאים

²⁴ויהי [k_בשמעך] [q_כשמעך] את קול צעדה בראשי הבכאים אז תחרץ כי אז יצא יהוה לפניך להכות במחנה פלשתים

²⁵ויעש דוד כן כאשר צוהו יהוה ויך את פלשתים מגבע עד באך גזר פ