Read Westminster Leningrad Codex (consonants) ירמיהו 3 Bible Online

ירמיהו 3 - Westminster Leningrad Codex (consonants) bible

ירמיהו 3

¹לאמר הן ישלח איש את אשתו והלכה מאתו והיתה לאיש אחר הישוב אליה עוד הלוא חנוף תחנף הארץ ההיא ואת זנית רעים רבים ושוב אלי נאם יהוה

²שאי עיניך על שפים וראי איפה לא [k_שגלת] [q_שכבת] על דרכים ישבת להם כערבי במדבר ותחניפי ארץ בזנותיך וברעתך

³וימנעו רבבים ומלקוש לוא היה ומצח אשה זונה היה לך מאנת הכלם

⁴הלוא מעתה [k_קראתי] [q_קראת] לי אבי אלוף נערי אתה

⁵הינטר לעולם אם ישמר לנצח הנה [k_דברתי] [q_דברת] ותעשי הרעות ותוכל פ

⁶ויאמר יהוה אלי בימי יאשיהו המלך הראית אשר עשתה משבה ישראל הלכה היא על כל הר גבה ואל תחת כל עץ רענן ותזני שם

⁷ואמר אחרי עשותה את כל אלה אלי תשוב ולא שבה [k_ותראה] [q_ותרא] בגודה אחותה יהודה

⁸וארא כי על כל אדות אשר נאפה משבה ישראל שלחתיה ואתן את ספר כריתתיה אליה ולא יראה בגדה יהודה אחותה ותלך ותזן גם היא

⁹והיה מקל זנותה ותחנף את הארץ ותנאף את האבן ואת העץ

¹⁰וגם בכל זאת לא שבה אלי בגודה אחותה יהודה בכל לבה כי אם בשקר נאם יהוה פ

¹¹ויאמר יהוה אלי צדקה נפשה משבה ישראל מבגדה יהודה

¹²הלך וקראת את הדברים האלה צפונה ואמרת שובה משבה ישראל נאם יהוה לוא אפיל פני בכם כי חסיד אני נאם יהוה לא אטור לעולם

¹³אך דעי עונך כי ביהוה אלהיך פשעת ותפזרי את דרכיך לזרים תחת כל עץ רענן ובקולי לא שמעתם נאם יהוה

¹⁴שובו בנים שובבים נאם יהוה כי אנכי בעלתי בכם ולקחתי אתכם אחד מעיר ושנים ממשפחה והבאתי אתכם ציון

¹⁵ונתתי לכם רעים כלבי ורעו אתכם דעה והשכיל

¹⁶והיה כי תרבו ופריתם בארץ בימים ההמה נאם יהוה לא יאמרו עוד ארון ברית יהוה ולא יעלה על לב ולא יזכרו בו ולא יפקדו ולא יעשה עוד

¹⁷בעת ההיא יקראו לירושלם כסא יהוה ונקוו אליה כל הגוים לשם יהוה לירושלם ולא ילכו עוד אחרי שררות לבם הרע ס

¹⁸בימים ההמה ילכו בית יהודה על בית ישראל ויבאו יחדו מארץ צפון על הארץ אשר הנחלתי את אבותיכם

¹⁹ואנכי אמרתי איך אשיתך בבנים ואתן לך ארץ חמדה נחלת צבי צבאות גוים ואמר אבי [k_תקראו] [q_תקראי] לי ומאחרי לא [k_תשובו] [q_תשובי]

²⁰אכן בגדה אשה מרעה כן בגדתם בי בית ישראל נאם יהוה

²¹קול על שפיים נשמע בכי תחנוני בני ישראל כי העוו את דרכם שכחו את יהוה אלהיהם

²²שובו בנים שובבים ארפה משובתיכם הננו אתנו לך כי אתה יהוה אלהינו

²³אכן לשקר מגבעות המון הרים אכן ביהוה אלהינו תשועת ישראל

²⁴והבשת אכלה את יגיע אבותינו מנעורינו את צאנם ואת בקרם את בניהם ואת בנותיהם

²⁵נשכבה בבשתנו ותכסנו כלמתנו כי ליהוה אלהינו חטאנו אנחנו ואבותינו מנעורינו ועד היום הזה ולא שמענו בקול יהוה אלהינו ס