Read Westminster Leningrad Codex (consonants) דברים 22 Bible Online

דברים 22 - Westminster Leningrad Codex (consonants) bible

דברים 22

¹לא תראה את שור אחיך או את שיו נדחים והתעלמת מהם השב תשיבם לאחיך

²ואם לא קרוב אחיך אליך ולא ידעתו ואספתו אל תוך ביתך והיה עמך עד דרש אחיך אתו והשבתו לו

³וכן תעשה לחמרו וכן תעשה לשמלתו וכן תעשה לכל אבדת אחיך אשר תאבד ממנו ומצאתה לא תוכל להתעלם ס

⁴לא תראה את חמור אחיך או שורו נפלים בדרך והתעלמת מהם הקם תקים עמו ס

⁵לא יהיה כלי גבר על אשה ולא ילבש גבר שמלת אשה כי תועבת יהוה אלהיך כל עשה אלה פ

⁶כי יקרא קן צפור לפניך בדרך בכל עץ או על הארץ אפרחים או ביצים והאם רבצת על האפרחים או על הביצים לא תקח האם על הבנים

⁷שלח תשלח את האם ואת הבנים תקח לך למען ייטב לך והארכת ימים ס

⁸כי תבנה בית חדש ועשית מעקה לגגך ולא תשים דמים בביתך כי יפל הנפל ממנו ס

⁹לא תזרע כרמך כלאים פן תקדש המלאה הזרע אשר תזרע ותבואת הכרם ס

¹⁰לא תחרש בשור ובחמר יחדו ס

¹¹לא תלבש שעטנז צמר ופשתים יחדו ס

¹²גדלים תעשה לך על ארבע כנפות כסותך אשר תכסה בה ס

¹³כי יקח איש אשה ובא אליה ושנאה

¹⁴ושם לה עלילת דברים והוציא עליה שם רע ואמר את האשה הזאת לקחתי ואקרב אליה ולא מצאתי לה בתולים

¹⁵ולקח אבי [k_הנער] [q_הנערה] ואמה והוציאו את בתולי [k_הנער] [q_הנערה] אל זקני העיר השערה

¹⁶ואמר אבי [k_הנער] [q_הנערה] אל הזקנים את בתי נתתי לאיש הזה לאשה וישנאה

¹⁷והנה הוא שם עלילת דברים לאמר לא מצאתי לבתך בתולים ואלה בתולי בתי ופרשו השמלה לפני זקני העיר

¹⁸ולקחו זקני העיר ההוא את האיש ויסרו אתו

¹⁹וענשו אתו מאה כסף ונתנו לאבי הנערה כי הוציא שם רע על בתולת ישראל ולו תהיה לאשה לא יוכל לשלחה כל ימיו ס

²⁰ואם אמת היה הדבר הזה לא נמצאו בתולים [k_לנער] [q_לנערה]

²¹והוציאו את [k_הנער] [q_הנערה] אל פתח בית אביה וסקלוה אנשי עירה באבנים ומתה כי עשתה נבלה בישראל לזנות בית אביה ובערת הרע מקרבך ס

²²כי ימצא איש שכב עם אשה בעלת בעל ומתו גם שניהם האיש השכב עם האשה והאשה ובערת הרע מישראל ס

²³כי יהיה [k_נער] [q_נערה] בתולה מארשה לאיש ומצאה איש בעיר ושכב עמה

²⁴והוצאתם את שניהם אל שער העיר ההוא וסקלתם אתם באבנים ומתו את [k_הנער] [q_הנערה] על דבר אשר לא צעקה בעיר ואת האיש על דבר אשר ענה את אשת רעהו ובערת הרע מקרבך ס

²⁵ואם בשדה ימצא האיש את [k_הנער] [q_הנערה] המארשה והחזיק בה האיש ושכב עמה ומת האיש אשר שכב עמה לבדו

²⁶[k_ולנער] [q_ולנערה] לא תעשה דבר אין [k_לנער] [q_לנערה] חטא מות כי כאשר יקום איש על רעהו ורצחו נפש כן הדבר הזה

²⁷כי בשדה מצאה צעקה [k_הנער] [q_הנערה] המארשה ואין מושיע לה ס

²⁸כי ימצא איש [k_נער] [q_נערה] בתולה אשר לא ארשה ותפשה ושכב עמה ונמצאו

²⁹ונתן האיש השכב עמה לאבי [k_הנער] [q_הנערה] חמשים כסף ולו תהיה לאשה תחת אשר ענה לא יוכל שלחה כל ימיו ס