Read William Morgan Bible 1588 original edition Genesis 21 Bible Online

Genesis 21 - William Morgan Bible 1588 original edition bible

Genesis 21

¹2 Ganedigaeth Isaac, ai enwaediad. 9 Bwriad Agar o dy Abraham am i Ismael watwar Isaac. 17 Yr angel yn cyssuro Agar. 22 Cyngrair rhwng Abraham, ac Abimelec. A’r Arglwydd a ymwelodd a Sara fel y dywedase, a gwnaeth yr Arglwydd i Sara fel y llefarase.

²O herwydd Sara a feichiogodd, ac a ymddug i Abraham fab yn ei henaint, ar yr amser nodedic yr hwn a ddywedase Duw wrtho ef.

³Ac Abraham a alwodd henw ei fab (yr hwn a anesyd iddo, (yr hwn a ymddugase Sara iddo ef) Isaac.

⁴Ac Abraham a enwaedodd Isaac ei fâb yn wyth niwrnod oed: fel y gorchymynase Duw iddo ef.

⁵Ac Abraham [oedd] fab can mlwydd pan anwyd iddo ef Isaac ei fâb.

⁶Yna y dywedodd Sara: gwnaeth Duw i mi chwerthyn, pob vn a glywo a chwardd gyd a mi.

⁷Hi a ddywedodd hefyd, pwy a ddywedase i Abraham y rhoddase Sara sugyn i blant? canys mi a escorais fab yn ei henaint ef.

⁸A’r bachgen a gynnyddodd, ac a ddiddyfnwyd, ac Abraham a wnaeth wledd fawr ar y dydd y diddyfnwyd Isaac,

⁹A Sara a welodd fâb Agar yr Aiphtes, yr hwn a ymddugase hi i Abraham yn gwatwar

¹⁰A hi a ddywedodd wrth Abraham, gyrr ymmaith y gaeth forwyn hon ai mâb, o herwydd ni chaiff mâb y gaethes hon gyd etifeddu a’m mab mau fi Isaac.

¹¹A’r peth hyn fû ddrwg iawn gan Abraham er mwyn ei fâb.

¹²Yna Duw a ddywedodd wrth Abraham na fydded drwg yn dy olwg am y llangc, nac am dy gaeth forwyn, yr hyn oll a ddywedo Sara wrthit, gwrando ar ei llais: o herwydd yn Isaac y gelwir i ti hâd.

¹³Ac am fâb y forwyn gaeth hefyd gossodaf ef yn genhedlaeth, o herwydd dy hâd ti ydyw ef.

¹⁴Yna y cododd Abraham yn foreu, ac a gymmerodd fara, a chostreled o ddwfr, ac ai rhoddes at Agar, gan ossod ar ei hyscwydd hi [hynny] a’r bachgen hefyd, ac efe ai gollyngodd hi ymmaith, a hi a aeth, ac a grwydrodd yn anialwch Beersebah.

¹⁵Pan ddarfu y dwfr yn y gostrel, yna hi a fwriodd y bachgen tan vn o’r gwŷdd.

¹⁶A hi a aeth, ac a eisteddodd ei hunan yn bell ar gyfer, megis ergyd bŵa, canys dywedase ni allafi edrych ar y bachgen yn marw: felly hi a eisteddodd ar [ei] gyfer, ac a dderchafodd ei llef, ac a ŵylodd.

¹⁷Yna Duw a wrandawodd ar lais y llangc, ac angel Duw a alwodd ar Agar o’r nefoedd, ac a ddywedodd wrthi, beth [a ddarfu] i ti, Agar? nac ofna, o herwydd Duw a wrandawodd ar lais y llangc o’r lle y mai efe.

¹⁸Cyfot, cymmer y llangc, ac ymafel ynddo a’th law, o blegit myfi ai gossodaf ef yn genhedlaeth fawr.

¹⁹Yna Duw a agorodd ei llygaid hi, a hi a ganfu bydew dwfr, a hi aeth ac a lanwodd y gostrel [o’r] dwfr, ac a ddiododd y llangc.

²⁰Ac yr oedd Duw gyd a’r llangc, ac efe a gynnyddodd, ac a drigodd yn yr anialwch, ac oedd berchen bwa.

²¹Ac yn anialwch Paran y trigodd efe, ai fam a gymmerodd iddo wraig o wlad yr Aipht.

²²Ac yn yr amser hwnnw Abimelec a Phicol tywysog ei lu ef a ymddiddanasant ag Abraham gan ddywedyd: Duw [sydd] gyd a thi yn yr hyn oll yr ydwyt yn ei wneuthur.

²³Yn awr gan hynny, twng wrthif fi i Dduw, na fyddi anffyddlon i mi, nac i’m mâb, nac i’m hwyr, yn ol y drugaredd yr hon a wneuthum a thi, y gwnei di a minne, ac a’m gwlad yr hon yr ymdeithiaist ynddi.

²⁴Ac Abraham a ddywedodd mi a dyngaf.

²⁵Yna Abraham a geryddodd Abimelec, o achos y pydew dwfr yr hwn a ddygase gweision Abimelec trwy drais.

²⁶Ac Abimelec a ddywedodd, nis gwybum i pwy a wnaeth y peth hyn: tithe hefyd ni fynegaist i mi, a minne ni chlywais [hynny] hyd heddyw.

²⁷Yna y cymmerodd Abraham ddefaid, a gwarthec, ac ai rhoddes i Abimelec, ac a wnaethant gyngrair ill dau.

²⁸Ac Abraham a osododd saith o hespinod [o’r] praidd ar y naill du.

²⁹Yna y dywedodd Abimelec wrth Abraham, beth [a wna] y saith hespin hyn a ossodaist wrthynt eu hunain?

³⁰Ac yntef a ddywedodd, fel y cymmerech di y saith hespin o’m law, i fod yn destiolaeth mai myfi a gloddiais y pydew hwn.

³¹Am hynny efe a alwodd henw y lle hwnnw Beer-sebah: o blegit yno y tyngasant ill dau.

³²Felly y gwnaethant gyngrair yn Beer-sebah: a chyfododd Abimelec, a Phicol tywysog ei lu ef, ac a ddychwelasant i dîr y Philistiaid.

³³Ac yntef a blannodd goed yn Beer-sebah, ac a alwodd yno ar enw yr Arglwydd Dduw tragywyddol.

³⁴Ac Abraham a ymdeithiodd ddyddiau lawer yn nhir y Philistiaid.