Read William Morgan Bible 1588 original edition 2.Samuel 1 Bible Online

2.Samuel 1 - William Morgan Bible 1588 original edition bible

2.Samuel 1

¹1 Un yn dwyn newydd i Ddafyd o farwolaeth Saul. 14 Gwobr yr hwn ai dûg. 17 Galar-nad Dafydd am Saul, ac Ionathan. Ac yn ôl marwolaeth Saul pan ddychwelase Dafydd o ladd yr Amaleciaid: wedi aros o Ddafydd ddeu-ddydd yn Siclag,

²Yna y trydydd dydd wele ŵr yn dyfod o’r gwerssyll oddi wrth Saul, ai ddillad wedi eu rhwygo, a phridd ar ei benn: a phan ddaeth efe at Ddafydd, yna efe a syrthiodd i lawr, ac a ymgrymmodd.

³A Dafydd a ddywedodd wrtho ef, o ba le y daethost di? yntef a ddywedodd wrtho ef, o werssyll Israel y diengais i.

⁴Yna y dywedodd Dafydd wrtho ef, beth yw’r matter mynega attolwg i mi? yntef a ddywedodd, y bobl a ffoawdd o’r rhyfel, a llawer hefyd o’r bobl a syrthiodd, ac a fuant feirw: Saul hefyd ac Ionathan ei fab a fuant feirw.

⁵A Dafydd a ddywedodd wrth y llangc yr hwn oedd yn mynegu [hyn] iddo ef: pa fodd y gwyddost di farw Saul, ar Ionathan ei fab?

⁶Yna’r llangc yr hwn oedd yn mynegu iddo ef a ddywedodd, digwyddodd i mi ddyfod i fynydd Gilboa, ac wele Saul oedd yn pwyso ar ei waiw-ffon: wele hefyd y cerbydau a’r marchogion yn ei erlid ef.

⁷Ac efe a edrychodd oi ôl, ac am canfu i: ac a alwodd arnafi, minne a ddywedais wele fi.

⁸Dywedodd yntef wrthifi, pwy [ydwyt] ti? minne a ddywedais wrtho ef, Amaleciad [ydwyf] fi.

⁹Yna y dywedodd efe wrthifi, saf attolwg arnaf a lladd fi, cays dychryn a’m daliodd i, o herwydd [bod] fy holl enaid ynofi etto.

¹⁰Felly mi a sefais arno ef, ac ai lleddais ef, canys gwybum na bydde efe byw ar ôl ei gwymp: a chymmerais y goron yr hon [oedd] ar ei benn ef, a’r fraichled yr hon [oedd] am ei fraich ef, ac ai dugum hwynt ymma at fy arglwydd.

¹¹Yna Dafydd a ymaflodd yn ei ddillad, ac ai rhwygodd hwynt: a’r holl wŷr hefyd y rhai [oeddynt] gyd ag ef.

¹²Galarasant hefyd, ac ŵylasant, ac ymprydiasant hyd yr hwyr am Saul, ac am Ionathan ei fab, ac am bobl yr Arglwydd, ac am dŷ Israel, o herwydd iddynt syrthio trwy gleddyf.

¹³A Dafydd a ddywedodd wrth y llangc yr hwn oedd yn mynegu [hyn] iddo ef, o ba le i’th [henniw] di? yntef a ddywedodd mab i ŵr dieithr o Amaleciad ydwyfi.

¹⁴Yna y dywedodd Dafydd wrtho ef: pa fodd nad ofnaist di estyn dy law i ddifetha eneiniog yr Arglwydd?

¹⁵A Dafydd a alwodd ar vn o’r gweision, ac a ddywedodd, nessâ, rhuthra iddo ef: ac efe ai tarawodd ef, fel y bu efe farw.

¹⁶Yna y dywedodd Dafydd wrtho ef, [bydded] dy waed ti ar dy benn dy hun: canys dy enau dy hun a destiolaethodd yn dy erbyn gan ddywedyd: myfi a leddais eneiniog yr Arglwydd.

¹⁷A Dafydd a alar-nadodd yr alar-nad hon am Saul, ac am Ionathan ei fab ef.

¹⁸Dywedodd hefyd am ddyscu meibion Iuda [saethu] a bŵa: wele y mae yn scrifennedic yn llyfr yr iniawn.

¹⁹Oh ardderchawgrwydd Israel, efe a archollwyd ar dy vchelfaoedd di: pa fodd y cwympodd y cedyrn?

²⁰Nac adroddwch [hyn] yn Gath, na fynegwch yn heolydd Ascelon: rhac llawenychu merched y Philistiaid, rhac gorfoleddu o ferched y rhai dienwaededic.

²¹Oh fynyddoedd Gilboa, na [ddescyned] arnoch chwi wlith na glaw, na meusydd o offrymmau: canys yno y syrthiodd tarian y cedyrn, [sef] tarian Saul, fel pe buase heb ei eneinio ag olew.

²²Oddi wrth waed lladdedigion, oddi wrth frasder cedyrn ni phlygodd bŵa Ionathan yn ôl: a chleddyf Saul ni ddychwelodd yn wâg.

²³Saul ac Ionathan [oeddynt] gariadol ac annwyl yn eu bywyd, ac yn eu marwolaeth ni wahanwyd hwynt: cynt oeddynt na’r erŷrod, [a] chryfach oeddynt na’r llewod.

²⁴Merched Israel ŵylwch am Saul: yr hwn oedd yn eich dilladu chwi ag scarlat gyd ag hyfrydwch, yr hwn oedd yn gwisco addurnwisc aur ar eich gwisc chwi.

²⁵Pa fodd y cwympodd y cedyrn yng-hanol y rhyfel? Ionathan a laddwyd ar dy vchelfaoedd.

²⁶Gofid [sydd] arnafi am danati fy mrawd Ionathan, cû iawn fuost gennyfi: rhyfeddach oedd dy gariad tua ag attafi na chariad gwragedd.

²⁷Pa fodd y syrthiodd y cedyrn, ac y difethwyd arfau rhyfel?