Read William Morgan Bible 1588 original edition 2.Brenhinoedd 13 Bible Online

2.Brenhinoedd 13 - William Morgan Bible 1588 original edition bible

2.Brenhinoedd 13

¹Ioachas (wedi myned tann law y Syriaid) trwy weddi yn cael ymwared. 9 Ioas yn teyrnasu yn ei lê ef. 20 Marwolaeth Elisêus a Hazael. O’r drydedd flwyddyn ar hugain i Ioas fab Ahazias brenin Iuda: y teyrnasodd Ioachaz mab Iehu ar Israel yn Samaria ddwy flynedd ar bymthec.

²Ac efe a wnaeth yr hyn oedd ddrwg yngolwg yr Arglwydd: ac a rodiodd ar ôl pechodau Ieroboam mab Nabat, [drwy] y rhai y gwnaethe efe i Israel bechu, [ac] ni thrôdd oddi wrthynt hwy.

³Am hynny digllonedd yr Arglwydd a lidiodd yn erbyn Israel: ac efe ai rhoddodd hwynt yn llaw Hazael brenin Syria, ac yn llaw Ben-hadad mab Hazael yr holl ddyddiau hynny.

⁴Ac Ioachaz a erfynniodd ar yr Arglwydd: a gwrandawodd yr Arglwydd arno ef, o herwydd iddo ganfod gorthrymder Israel, canys brenin Syria ai gorthrymmase hwynt.

⁵Am hynny’r Arglwydd a roddodd achubwr i Israel, fel yr aethant oddi tann law y Syriaid: a meibion Israel a drigasant yn eu pebyll fel cynt.

⁶Etto ni throesant hwy oddi wrth bechodau tŷ Ieroboam [drwy] y rhai y gwnaethe efe i Israel bechu, [eithr] rhodiasant ynddynt hwy: a’r llwyn hefyd a safodd yn Samaria.

⁷Canys ni adawodd efe i Ioachaz [o’r] bobl onid dêc a deugain o wyr meirch, a dêc cerbyd, a deng-mil o wyr traed: o herwydd brenin Syria ai dinistriase hwynt, ac ai gosodase hwynt fel llwch iw dyrnu.

⁸A’r rhan arall o hanes Ioachaz, a’r hyn oll a’r a wnaeth efe, ai gadermd: onid ydynt hwy yn scrifennedic yn llyfr Cronicl brenhinoedd Israel?

⁹Ac Ioachaz a hunodd gyd ai dadau, a chladdasant ef yn Samaria: ac Ioas ei fab ef a deyrnasodd yn ei le ef.

¹⁰O’r ail flwyddyn ar bymthec ar hugain i Ioas frenin Iuda, y teyrnasodd Ioas mab Ioachaz ar Israel yn Samaria vn mlynedd ar bymthec.

¹¹Ac efe a wnaeth yr hyn oedd ddrwg yngolwg yr Arglwydd: ni thrôdd efe oddi wrth holl bechodau Ieroboam mab Nabat, [drwy] y rhai y gwnaethe efe i Israel bechu, [eithr] efe a rodiodd ynddynt.

¹²A’r rhan arall o hanes Ioas, a’r hyn oll a wnaeth efe ai gadernid [drwy]’r hwn yr ymladdodd efe ag Amasia brenin Iuda: onid ydynt hwy yn scrifennedic yn llyfr Cronicl brenhinoedd Israel?

¹³Ac Ioas a hunodd gyd ai dadau, ac Ieroboam a eisteddodd ar ei deyrn-gader ef: ac Ioas a gladdwyd yn Samaria gyd a brenhinoedd Israel.

¹⁴Pan glafychodd Elisêus oi glefyd yr hwn y bu efe farw ynddo: yna Ioas brenin Israel a ddaeth i wared atto ef, ac a ŵylodd ar ei wyneb ef, ac a ddywedodd, fy nhâd, fy nhâd, cerbyd Israel, ai farchogion.

¹⁵Yna Elisêus a ddywedodd wrtho ef, cymmer fŵa, a saethau: ac efe a gymmerth fŵa, a saethau.

¹⁶Ac efe a ddywedodd wrth frenin Israel, gosot dy law ar y bŵa, ac efe a osododd ei law: ac Elisêus a osododd ei ddwylaw ar ddwylo’r brenin,

¹⁷A dywedodd, agor y ffenestr tua’r dwyrain, yntef ai hagorodd: yna y dywedodd Elisêus, saetha, ac efe a saethodd, dywedodd yntef: saeth ymwared yr Arglwydd, a saeth iechydwriaeth yn erbyn y Syriaid, ti a darewi y Syriaid yn Aphec, nes eu difa hwynt.

¹⁸Hefyd efe a ddywedodd, cymmer y saethau, ac efe ai cymmerodd: dywedodd yntef wrth frenin Israel, taro’r ddaiar, ac efe a darawodd dair gwaith, ac a safodd.

¹⁹Yna gŵr Duw a ddigiodd wrtho ef, ac a ddywedodd [dylesit] daro bump neu chwech o weithiau, yna y tarawsit y Syriaid nes [eu] difa [hwynt,] yn awr gan hynny tair gwaith y tarewi y Syriaid.

²⁰Felly Elisêus a fu farw, a hwynt ai claddasant ef: a minteioedd o’r Moabiaid a ddaethant i’r wlâd y flwyddyn honno.

²¹A phan oeddynt hwy yn claddu gŵr, yna wele hwynt a ganfuant y dorf, am hynny y bwriasant y gŵr i feddrod Elisêus: pan aeth y gŵr a chyffwrdd ag escyrn Elisêus, yna efe a ddadebrodd, ac a gyfododd ar ei draed.

²²A Hazael brenin Syria a orthrymmodd Israel holl ddyddiau Ioachaz.

²³A’r Arglwydd a drugarhaodd wrthynt hwy, ac a dosturiodd wrthynt hwy, ac a drôdd attynt hwy er mwyn ei gyfammod ag Abraham, Isaac, ac Iacob: ac ni fynnodd eu dinistrio hwynt, nai bwrw hwynt ymmaith oi ŵydd ef hyd yn hyn.

²⁴Felly Hazael brenin Syria a fu farw: a Benhadad ei fab ef a deyrnasodd yn ei lê ef.

²⁵Ac Ioas mab Ioachaz a ddychwelodd ac a ennillodd y dinasoedd o law Benhadad mab Hazael, y rhai a ddugase efe o law Ioachaz ei dâd mewn rhyfel: Ioas ai tarawodo ef dair gwaith, ac a ddûg adref ddinasoedd Israel.