Read William Morgan Bible 1588 original edition 1.Cronicl 20 Bible Online

1.Cronicl 20 - William Morgan Bible 1588 original edition bible

1.Cronicl 20

¹Dinistr Rabba. 3 Cospedigaeth ar yr Ammoniaid. 4 Y Philistiaid, ai cawri yn colli yr maes. Darfu hefyd yng-hyfnod y flwyddyn, yn amser mynediad brenhinoedd allan [i ryfela,] arwein o Ioab gadernid y fyddin, ac anrhaithio gwlâd meibion Ammon, ac efe a ddaeth, ac a warchaodd Rabba: a Dafydd oedd yn aros yn Ierusalem, pan darawodd Ioab Rabba, ai dinistrio hi,

²A chymmerth Dafydd goron eu brenin hwynt oddi am ei ben ef, a chafodd hi o bwys talent aur, ac ynddi feini gwerthfawr, ac hi a fu am ben Dafydd: ac efe a ddug anrhaith fawr iawn [o’r] ddinas.

³A’r bobl y rhai [oeddynt] ynddi, a ddûg efe allan, ac ai rhygnodd hwynt a llîf, ac ag ogau heirn, ac a bwy îll: ac fel hyn y gwnaeth Dafydd i holl ddinasoedd meibion Ammon, a dychwelodd Dafydd a’r holl bobl i Ierusalem.

⁴Ac yn ôl hyn, pan gynhaliwyd rhyfel yn Gezer yn erbyn y Philistiaid: yna Sibbeechai yr Husiad a laddodd Sippai o feibion rhyw gawr, felly y darostyngwyd hwynt.

⁵A bu drachefn ryfel yn erbyn y Philistiaid, ac Elhanan mab Iair a laddodd Lahemi, brawd Goliath y Gethiad, a throed gwaiw-ffon hwnnw [oedd] fel carfan gwehyddion.

⁶Bu hefyd trachefn ryfel yn Gath: ac yr oedd gŵr hîr, ai fysedd [oeddynt] yn chwech a chwech [sef] pedwar ar hugain, yntef hefyd a anesid i’r cawr.

⁷Pan ddifenwodd efe Israel, yna Ionathan mab Simea frawd Dafydd ai lladdodd ef.

⁸Y rhai hyn a anwyd i’r cawr yn Gath, ac a laddwyd drwy law Dafydd, a thrwy law ei weision ef.