Read William Morgan Bible 1588 original edition 3.Esdras 7 Bible Online

3.Esdras 7 - William Morgan Bible 1588 original edition bible

3.Esdras 7

¹1 Sisinnes ai gyfeillion yn gwneuthur gorchymyn y brenin, ac yn cynnorthwyo yr Iddewon i adailadu y Deml. 5 Yr amser yr adailadwyd hi. 10 Hwynt hwy yn cynnal y Pasc. Yna Sisinnes llywydd Coelosyria a Phenice, a Sathrabuzanes ai cyfeilliō a vfyddhausant i orchymynnion Darius frenin,

²Ac a gynnorthwyasant yn ddyfal y gwaith sanctaidd, gan weithio gŷd a’r henuriaid, a llywodraeth-wŷr y cyssegr.

³Ac felly y gwaith sanctaidd a lwyddodd, pan ydoedd Aggeus a Zacharias y prophwydi yn prophwydo.

⁴Felly hwynt a orphennasant bob peth drwy orchymyn Arglwydd Dduw Israel, ac o gydtundeb Cyrus a Darius, ac Artaxerxes brenhinoedd Persia.

⁵Fel hyn y gorphennwyd y tŷ sanctaidd ar y trydydd dydd ar hugain o’r mîs Adar yn y chweched flwyddyn i Ddarius frenin y Persiaid.

⁶A meibion Israel, a’r offeiriaid, a’r Lefiaid, a’r rhann arall a’r a oeddynt o’r gaeth-glud mewn swydd a wnaethant yn ôl yr hyn [sydd scrifennedic] yn llyfr Moses.

⁷Ac wrth gyssegru Teml yr Arglwydd hwynt a offrymmasant gant o deirw, deu cant o hyrddod, a phedwar cant o ŵyn.

⁸[A] deuddec gafr tros bechod holl Israel, yn ôl rhifedi pennaechiaid llwythau Israel.

⁹Ar offeiriaid, a’r Lefiaid a safasant yn ôl eu llwythau (wedi ymwisco mewn gwiscoedd lleision) yng-waith Arglwydd Dduw Israel yn ôl llyfr Moses, a’r porthorion hefyd wrth bob porth.

¹⁰A meibiō Israel gyd a’r rhai a ddaethent allan o’r caethiwed a gynhaliasant y Pasc ar y pedwerydd [dydd] ar ddec o’r mîs cyntaf, wedi sancteiddio yr offeiriaid, a’r Lefiaid.

¹¹Ond ni sancteiddiasid holl feibion y gaethiwed yng-hyd, eithr y Lefiaid a gyd-sancteiddiasid oll.

¹²Felly hwynt a offrymmasant yr [oen] Pasc tros holl feibion y gaeth-glud, a thros eu brodyr yr offeiriaid, a throstynt hwy eu hunain.

¹³Yna holl feibion Israel y rhai a ddaethent o’r caethiwed a fwytawsant, [ie] y rhai oll a’r a ymnailltuasent oddi wrth ffieidd-dra pobl y wlad honno, ac a geisiasant yr Arglwydd.

¹⁴A hwynt a gadwasant ŵyl y bara croiw saith niwrnod gan lawenychu ger bron yr Arglwydd.

¹⁵O herwydd iddo ef droi cyngor brenin yr Assyriaid tu ag attynt hwy i nerthu eu dwylo hwynt at waith Arglwydd Dduw Israel.