Read William Morgan Bible 1588 original edition Exodus 25 Bible Online

Exodus 25 - William Morgan Bible 1588 original edition bible

Exodus 25

¹1 Duw yn gofyn gan ei bobl offrymmau ewyllysgar i wneuthur y babell. 10 Arch y destiolaeth. 17 Y drugareddfa. 23 Y bwrdd a’r llestri. 31 A’r canhwyllbren. A’r Arglwydd a lefarodd wrth Moses gan ddywedyd:

²Dywet wrth feibion Israel, am ddwyn o honynt i mi offrwm: gan bob gwr ewyllysgar ei galon y cymmerwch fy offrwm:

³Dymma’r offrwm yr hwn a gymmerwch ganddynt: aur, ac arian, a phrês.

⁴A Sidan glâs, a phorphor ac scarlat, a sidan gwyn a [blew] geifr.

⁵A chrwyn hyrddod yn gochion, a chrwyn daiar-foch, a choed Sittim.

⁶Olew i’r goleuni, llyseuau i olew’r ennaint, ac i’r arogl-darth llysseuoc.

⁷Y meini onix, a meini iw gossod yn yr Ephod, ac yn y ddwyfronec.

⁸A gwnant i mi gyssegr fel y gallwyf drigo yn eu mysc hwynt.

⁹Yn ol holl waith y tabernacl, a gwaith ei holl ddodrefn y rhai’r ydwyf yn eu dangos it, felly y gwnewch.

¹⁰A gwnant Arch o goed Sittim, o ddau gufydd a hanner ei hŷd, a chufydd a hanner ei llêd, a chufydd a hanner ei huchter.

¹¹A goreura hi ag aur coeth o fewn, ac oddi allan y goreuri hi: a gwna arni goron o aur o amgylch.

¹²Bwrw iddi hefyd bedair modrwy aur, a dod ar ei phedair congl: dwy fodrwy ar vn ystlys iddi, a dwy fodrwy ar yr ystlys arall iddi.

¹³A gwna drossolion o goed Sittim, a goreura hwynt ag aur.

¹⁴A gossot y trossolion trwy y modrwyau, gan ystlys yr Arch, i ddwyn yr Arch arnynt.

¹⁵Ym modrwyau’r Arch y bydd y trossolion, na symmuder hwynt oddi wrthi.

¹⁶A dod yn yr Arch, y destiolaeth yr hon a roddaf it.

¹⁷A gwna drugareddfa o aur coeth, o ddau gufydd a hanner ei hyd, a chufydd a hanner ei llêd.

¹⁸A gwna ddau Gerub o aur, o gyfan-waith morthwyl y gwnei hwynt, yn nau gwrr y drugareddfa,

¹⁹Un Cerub a wnei yn y naill gwrr, a’r Cerub arall yn y cwrr arall i’r drugareddfa, ar ei dau gwrr hi y gwnewch y Cerubiaid.

²⁰A bydded y Cerubiaid yn lledu [eu] hadenydd i fynu gan orchguddio ai hadenydd tros y drugareddfa, ai hwynebau bob vn at ei gilydd, tua’r drugareddfa y bydd wynebau y Cerubiaid.

²¹A dod ti y drugareddfa i fynu ar yr Arch, ac yn yr Arch dod y destiolaeth yr hon a roddaf i ti.

²²A mi a destiolaethaf it yno, ac a lefaraf wrthit oddiar y drugareddfa, oddi rhwng y ddau Gerub y rhai a fyddant ar Arch y destiolaeth yr holl bethau a orchymynnwyf wrthit i feibion Israel.

²³A gwna di fwrdd o goed Sittim, o ddau gufydd ei hŷd, a chufydd ei lêd, a chufydd a hanner ei vchter.

²⁴A goreura ef ag aur coeth, a gwna iddo goron o aur o amgylch.

²⁵A gwna iddo gylch [o lêd] llaw o amgylch, a gwna goron aur ar ei wregys o amgylch.

²⁶A gwna iddo bedair modrwy o aûr, a dod y modrwyau wrth y pedair congl y rhai a [fyddant] ar ei bedwar troed.

²⁷Ar gyfer y cylch y bydd y modrwyau yn lleoedd i’r trossolion i ddwyn y bwrdd.

²⁸A gwna y trossolion o goed Sittim, a goreura hwynt ag aur, fel y dyger y bwrdd arnynt.

²⁹A gwna ei ddysglau ef, ai gwppanau, ai gafnau, ai phiolau y rhai y tywelltir a hwynt: o aur coeth y gwnei hwynt.

³⁰A dod ar y bwrdd y bara gosod ger bron fy-wyneb yn oestadol.

³¹Gwna hefyd ganhwyll-bren: o aur pûr yn gyfan-waith y gwneir y canhwyll-bren: ei baladr, ei geingciau, ei bedill, ei gnappiau, ai flodau a fyddant o honaw ei hûn.

³²A [bydd] chwe chaingc yn dyfod allan oi ystlysau, tair caingc o’r canhwyll-bren o vn tu, a thair caingc o’r canhwyll-bren o’r tu arall.

³³Tair padell o waith almon, cnap a blodeun ar vn gainc, a thair padell o waith almon, cnap a blodeun ar gaingc arall: felly ar y chwe chaingc [a fyddo]’n dyfod allan o’r canhwyll-bren.

³⁴Ac yn y canhwyll-bren y bydd pedair padell ar waith almon, ai gnappiau, ai flodau.

³⁵A bydd cnap tan ddwy gaingc o honaw, a chnap tan ddwy gaingc o honaw, a chnap dan ddwy gaingc o honaw: yn ol y chwe chaingc a ddeuant o’r canhwyll-bren.

³⁶Eu cnappiau, ai ceingciau a fyddant o honaw ef: oll yn aur coeth o vn cyfan-waith morthwyl.

³⁷A thi a wnei ei saith lusern ef, ac a godi ei lusernau ef fel y goleuo efe ar gyfer ei wyneb.

³⁸A [bydded] ei efeiliau, ai gafnau o aur coeth.

³⁹O dalent o aur coeth y gwnei ef, a’r holl lestri hynn.

⁴⁰Ond gwêl wneuthur yn ôl eu portreiad hwynt yr hwn a ddangoswyd it yn y mynydd.