Read William Morgan Bible 1588 original edition Exodus 35 Bible Online

Exodus 35 - William Morgan Bible 1588 original edition bible

Exodus 35

¹1 Y Sabboth. 4 Duw yn gofyn offrwm gan ei bobl. 21 Y bobl yn offrwm yn ewyllyscar. 30 Moses yn henwi Besalel, ac Aholiab i weithio y babell. Casclodd Moses hefyd holl gynnulleidfa meibion Israel, a dywedodd wrthynt: dymma y pethau a orchymynnodd yr Arglwydd eu gwneuthur.

²Chwe diwrnod y gwneir gwaith, ar y seithfed dydd y bydd i chwi Sabboth sanctaidd [sef] gorphywysdra i’r Arglwydd: llwyr rodder i farwolaeth pwy bynnac a wnelo waith arno.

³Na chynneuwch dân yn eich holl anneddau ar y dydd Sabboth.

⁴A Moses a lefarodd wrth holl gynnulleidfa meibion Israel gan ddywedyd: dymma y peth yr hwn a orchymynnodd yr Arglwydd gan ddywedyd.

⁵Cymmerwch o’ch plith offrwm derchafel i’r Arglwydd, pob ewyllyscar ei galon dyged hyn yn offrwm derchafel i’r Arglwydd: [sef] aur ac arian, a phrês:

⁶A sidan glâs, a phorphor, ac scarlat, a sidan gwynn, a [blew] geifr.

⁷A chrwyn hyrddod wedi eu lliwio yn gochion, a chrwyn daiar-foch, a choed Sittim.

⁸Ac olew i’r goleuni: a llyssiau i olew yr ennaint, ac i’r arogl-darth llysseuoc.

⁹A meini Onix, a menni iw gosod yn yr Ephod, ac yn y ddwyfronnec.

¹⁰A phob celfydd o feddwl yn eich plith: deuant a gweithiant yr hyn oll a orchymynnodd yr Arglwydd.

¹¹Y tabernacl, ei babell-lenn, ai dô: ei dderbynniadau ai styllod, ei farrau ei golofnau ai forteisiau,

¹²Yr Arch, ai throssolion, y drugareddfa, a’r wahan-len yr hon [ai] gorchguddia,

¹³Y bwrdd, ai drossolion, ai holl lestri: a’r bara gosod.

¹⁴A chanhwyll-bren y goleuni, ai lestri, ai lusernau: ac olew y goleuni.

¹⁵Ac allor yr arogl-darth, ai throssolion, ac olew yr eneiniad, a’r arogl-darth llysseuoc, a chaead-lenn drws y tabernacl.

¹⁶Allor y poeth-offrwm a’r alch prês, yr hwn [oedd] iddi, ei throssolion ai holl lestri: y noe ai throed.

¹⁷Troelloc lenni y cynteddfa, ei golofnau ai forteisiau: caead-lenn porth y cynteddfa.

¹⁸Hoelion y taberncal, a hoelion y cynteddfa ai rhaffau hwynt.

¹⁹A gwiscoedd y wenidogaeth i weini yn y cyssegr: [a] sanctaidd wiscoedd Aaron yr offeiriad, a gwiscoedd ei feibion ef i offeiriadu [ynddynt.]

²⁰Yna holl gynnulleidfa meibion Israel a aethant allan oddi ger bron Moses.

²¹A phob vn yr hwn y dug ei galon ef: sef pob vn yr hwn y gwnaeth ei yspryd ef yn ewyllyscar, a ddaethant [ac] a ddugasant offrwm derchafel i’r Arglwydd, tu ac at waith pabell y cyfarfod, a thu ac at ei holl wasanaeth hi, a thu ac at y gwiscoedd sanctaidd.

²²A daethant yn wŷr, ac yn wragedd: pob vn ewyllyscar ei galon a ddugasant fachau, a chlust-dlysau, a modrwyau, a chadwynau eu gyd yn dlysau o aur, a phob gwr yr hwn a offrymmodd offrwm cwhwfan [a offrymmodd] aur i’r Arglwydd.

²³A phob vn yr hwn y caed gyd ag ef sidan glâs, neu borphor, neu scarlat, neu sidan gwynn, neu [flew] geifr, neu grwyn hyrddod wedi lliwio yn gochion, neu grwyn daiar-foch ai dugasant.

²⁴Pwy bynnac a offrymmodd offrwm derchafel o arian, neu brês, a ddugasant offrwm derchafel i’r Arglwydd: a phob vn; yr hwn y caed gyd ag ef goed Sittim i ddim o waith y gwasanaeth ai dugasant.

²⁵A phob gwraig gelfydd a nyddodd ai llaw ei hun: ac a ddugasant edafedd, sidan glâs, a phorphor, ac scarlat, a sidan gwynn.

²⁶A’r holl wragedd y rhai y derchafodd eu calonnau hwynt mewn cyfarwyddyd, a nyddasant [flew] geifr.

²⁷A’r pennaethiaid a ddugasant feini Onix, a meini iw gosod ar yr Ephod, ac ar y ddwyfronnec.

²⁸A llyssiau, ac olew i’r goleuni, ac i olew yr ennaint, ac i’r arogl-darth llysseuoc.

²⁹Holl blant Israel yn wŷr ac yn wragedd, y rhai a glywent ar eu calon offrymmu tu ac at yr holl waith yr hwn a orchymynnase yr Arglwydd drwy law Moses ei wneuthur, a ddugasant i’r Arglwydd offrwm ewyllyscar.

³⁰Yna y dywedodd Moses wrth feibion Israel gwelwch, galwodd * yr Arglwydd yn enwedic: Besaleel fab Uri, fab Hur o lwyth Iuda.

³¹Ac ai llanwodd ef ag yspryd Duw: mewn cyfarwyddyd mewn deall, ac mewn gwybodaeth, ac mewn pob gwaith.

³²I ddychymygu cywreinrwydd: i weithio mewn aur, ac mewn arian, ac mewn prês.

³³Ac mewn cyfarwyddyd i osod meini, ac mewn saerniaeth prenn: i weithio ym mhob gwaith cywraint.

³⁴Ac efe a roddodd yn ei galon ef ddyscu [eraill:] efe, ac Aholiab mab Achisamech o lwyth Dan.

³⁵Llawnodd hwynt a doethineb calon i wneuthur pob gwaith saer a chywreinwaith, a gwaith edef a nodwydd, mewn sidan glâs, ac mewn porphor, ac mewn scarlat, ac mewn sidan gwynn, ac i wau: gan wneuthur pob gwaith, a dychymygu cywreinrwydd.