Read William Morgan Bible 1588 original edition Exodus 40 Bible Online

Exodus 40 - William Morgan Bible 1588 original edition bible

Exodus 40

¹Codiad y tabernacl. 34 Niwl yn descyn ar y babell i arwyddocau presennoldeb Duw. Yna yr Arglwydd a lefarodd wrth Moses gan ddywedyd.

²Yn y mîs cyntaf, ar [y dydd] cyntaf o’r mîs y cyfodi y tabernacl [sef] pabell y cyfarfod.

³A gosot yno Arch y destiolaeth: a gorchguddia yr Arch a’r wahan-lenn.

⁴Dŵg i mewn hefyd y bwrdd a threfna ef yn drefnus: dwg i mewn hefyd y canhwyll-bren a goleua ei lusernau ef.

⁵Gosot hefyd allor aur yr arogl-darth ger bron Arch y destiolaeth: a gosot gaead-len drws y tabernacl.

⁶Dod hefyd allor y poeth offrwm ar gyfer drws tabernacl, [sef] pabell y cyfarfod.

⁷Dod hefyd y noe rhwng pabell y cyfarfod a’r allor, a dod ynddi ddwfr.

⁸A gosot hefyd y cynteddfa oddi amgylch, a dod gaead-lenn [ar] borth y cynteddfa.

⁹A chymmer olew yr enneiniad, ac enneinia y tabernacl, a’r hynn oll [sydd] ynddo, a chyssegra ef ai holl lestri: fel y byddo cyssegredic.

¹⁰Enneinia hefyd allor y poeth offrwm, a chyssegra yr allor ai holl lestri: a’r allor fydd sancteidd-beth cyssegredic.

¹¹Enneinia y noe ai throed, a sancteiddia hi.

¹²A phâr i Aaron ac iw feibion ddyfod i ddrws pabell y cyfarfod: a golch hwynt a dwfr.

¹³A gwisc am Aaron y gwiscoedd sanctaidd: ac enneinia ef, a sancteiddia ef i offeiriadu i mi.

¹⁴Dŵg hefyd ei feibion ef, a gwisc hwynt a pheisiau.

¹⁵Ac enneinia hwynt megis yr enneiniaist eu tad hwynt i offeiriadu i mi: fel y byddo eu henneiniad iddynt yn offeiriadaeth dragywyddol drwy eu hoesoedd.

¹⁶Felly Moses a wnaeth yn ol yr hynn oll a orchymynnodd yr Arglwydd iddo: felly y gwnaeth efe.

¹⁷Felly yn y mîs cyntaf o’r ail flwyddyn, ar [y dydd] cyntaf o’r mis y codwyd y tabernacl.

¹⁸Canys Moses a gododd y tabernacl, ac a roddodd ei forteisiau, ac a osododd ei styllod ac a roddes ei farrau: ac a gododd ei golofnau.

¹⁹Ac a ledodd y babell-lenn a’r y tabernacl ac a osododd dô y babell-lenn arni oddi arnodd fel y gorchymynnase yr Arglwydd wrth Moses.

²⁰Cymmerodd hefyd a rhoddodd y destiolaeth yn yr Arch, a gosododd y trosolion wrth yr Arch: ac a roddodd y drugareddfa i fynu ar yr Arch.

²¹Ac efe a ddûg yr Arch i’r tabernacl, ac a osododd y wahan-len orchudd, i orchguddio Arch y destiolaeth: megis y gorchymynnase yr Arglwydd wrth Moses.

²²Ac efe a roddodd y bwrdd o fewn pabell y cyfarfod ar ystlys y tabernacl, o du y gogledd: o’r tu allan i’r wahan-lenn.

²³Ac efe a drefnodd yn drefnus arno ef y bara ger bron yr Arglwydd: fel y gorchymynnase yr Arglwydd wrth Moses.

²⁴Ac efe a osododd y canhwyll-bren o fewn pabell y cyfarfod ar gyfer y bwrdd ar ystlys y tabernacl, o du yr dehau.

²⁵Ac efe a oleuodd y lusernau ger bron yr Arglwydd: fel y gorchymynnase yr Arglwydd wrth Moses.

²⁶Efe hefyd a osododd yr allor aur ym mhabell y cyfarfod: o flaen y wahan-lenn.

²⁷Ac a arogl-darthodd arni arogl-darth llyseuoc megis y gorchymynnase yr Arglwydd wrth Moses.

²⁸Ac efe a osododd y gaead-lenn [ar] ddrws y tabernacl.

²⁹Ac efe a osododd allor y poeth offrwm [wrth] ddrws y tabernacl [sef] pabell y cyfarfod: ac a offrymmodd arni boeth offrwm a bwyd offrwm, fel y gorchymynnase yr Arglwydd.

³⁰Efe a osododd y noe hefyd rhwng pabell y cyfarfod a’r allor: ac a roddodd yno ddwfr i ymolchi.

³¹A Moses ac Aaron ai feibion a olchasant yno eu dwylo, ai traed.

³²Pan ddelent i babell y cyfarfod a phan nessaent at yr allor yr ymolchent: fel y gorchymynnase yr Arglwydd wrth Moses.

³³Ac efe a gododd y cynteddfa o amgylch y tabernacl, a’r allor, ac a roddodd gaead-lenn [ar] borth y cynteddfa: felly y gorphennodd Moses y gwaith.

³⁴Yna y niwl a orchguddiodd babell y cyfarfod: a gogoniant yr Arglwydd a lawnodd y tabernacl.

³⁵Ac ni alle Moses fyned i babell y cyfarfod, am i’r niwl aros arni: ac i gogoniant yr Arglwydd lenwi y tabernacl.

³⁶A phan gyfode y niwl oddi ar y tabernacl, y cychwynne meibion Israel iw holl deithiau.

³⁷Ac oni chyfode y niwl: yna ni chychwynne meibion Israel hyd y dydd y cyfode.

³⁸Canys niwl yr Arglwydd [ydoedd] ar y tabernacl, y dydd, a thân ydoedd yno y nos: yng-olwg holl dŷ Israel yn eu holl deithiau hwynt.