Read William Morgan Bible 1588 original edition Iob 34 Bible Online

Iob 34 - William Morgan Bible 1588 original edition bible

Iob 34

¹Yn erbyn cyfiawnder Iob, y mae Elihu yn dangos cyfiawnder Duw ai allu. Ac Elihu a leforodd, ac a ddywedodd:

²[Ha wŷr] doethion gwrandewch fy ymadroddion: a [chwychwi] y rhai ydych yn gŵybod, clust-ymwrandewch.

³Canys y glust a farna ymadroddion: fel yr archwaetha y genau fwyd.

⁴Dewiswn i ni ein hunain iniondeb, fel y gŵybyddom rhyngom pa beth sydd ddâ.

⁵Canys dywedodd Iob, cyfiawn ydwyf: a Duw a symmudodd fyng-hyfiawnder.

⁶A ddywedaf i gelwydd yn erbyn fy matter fy hun? trom [ydyw] dy saeth heb gamwedd ynof.

⁷Pa ŵr [fydde] fel Iob, [yr hwn] a ŷf watworgerdd fel dyfroedd?

⁸Ac a rodiodd yng-hymydeithas gyd â gweithred-wŷr anwiredd: ac i fyned gyd â dynion annuwiol.

⁹Canys dywedodd, ni fuddia i ŵr, ewyllysio o honaw ef [rodio] gyd â Duw.

¹⁰Am hynny chwychwi wyr calonnoc, gwrandewch arnaf, pell fyddo Duw oddi wrth annuwioldeb, a’r Holl-alluoc oddi wrth anwiredd.

¹¹Canys efe a dâl i ddyn ei waith: ac efe a wnaiff i ŵr gael yn ôl ei lwybr ei hun.

¹²Diau hefyd na wna Duw yn annuwiol: ac na ŵyra’r Holl-alluoc farn.

¹³Pwy heb ei law ef sydd yn llywodraethu y ddaiar iddo ef? a phwy a osododd yr holl fyd?

¹⁴Pe gosodase [Duw] ei feddwl yn erbyn [dŷn: a phe] cascle efe atto ei hun ei yspryd, ai chwythad ef,

¹⁵[Yna] pôb cnawd a gyd-drenge: a dyn a ddychwele i’r prîdd.

¹⁶Od [oes] ddeall [ynot] gwrando hyn: clust-ymwrando a llef fy ymadroddion.

¹⁷A gaiff yr hwn sydd yn cassaû barn lywodraethu? ac a elwi di yr hwn sydd gyflawn odieth yn annuwiol?

¹⁸A ddywedir wrth frenin, ô [ŵr] drygionus: [ac] ô annuwiol, wrth dywysogion?

¹⁹Yr hwn ni dderbyn wynebau tywysogion, lle nid adwaenir y goludoc o flaen y tlawd: canys gwaith ei ddeheu-law ef ydyw pawb.

²⁰Hwy a fyddant meirw mewn moment, a hanner nos y cynhyrfa y bobl, ac yr ânt heibio: a’r cadarn a symmudir heb law.

²¹Canys ei lygaid ef [a fyddant] ar ffyrdd dŷn: ac efe a wêl ei holl gamrau ef.

²²Nid [oes] dywyllwch, ac nid [oes] gyscod angeu: lle y gall y rhai sydd yn gweithio anwiredd ymguddio.

²³Canys ni esyd [Duw] ar ddyn y chwaneg [nac a haeddo efe,] fel y gallo efe fyned i’r gyfraith â Duw.

²⁴Efe a ddryllia rai cedyrn yn anifeiriol: ac a esyd eraill yn eu lle hwynt.

²⁵Am hynny efe a gyhoedda eu gweithredoedd hwy: a phan newidio efe y nos, hwy a ddryllir.

²⁶Efe ai teru hwynt megis rhai annuwiol yn amlwg.

²⁷Am iddynt hwy gilio oddi ar eiôl ef: ac na ddeallent ei holl ffyrdd ef.

²⁸Gan ddwyn gwaedd y tlawd arnynt hwy: canys efe a wrendu waedd y trueniaid.

²⁹Canys pan esmwythâo efe, pwy a anesmwythâ? a phan guddio efe ei wyneb, pwy a edrych arno ef: sef ar genhedlaeth, neu ar ddŷn vnic.

³⁰Fel na theyrnase dŷn ffuantus, [ac]na rwyder y bobl.

³¹Ond wrth Dduw’r hwn a ddywedodd, mi a faddeuais, nid anrheithiaf, [y dylid dywedyd,]

³²Heblaw a welaf dysc di fi: o gwnenthum anwiredd, ni wnafi mwy.

³³A ydyw [hyn] o honot ti? efe a dâl hynny os diystyri di [y neb a’th rybuddio,] os dewisi di hynny, ond ni [wnawn] i: dywet yn awr yr hyn a ŵyddost.

³⁴Gwŷr call a ddywedant gyd â mi: a’r gŵr doeth yr hwn a’m clywe.

³⁵Iob a ddywedodd yn annoeth: ai eiriau nid ydynt mewn deall.

³⁶Fy nhâd profer Iob hyd y diwedd: am [roddi] attebion tros ddynion anwir.

³⁷Canys efe a chwanegodd scelerder at ei bechod, efe a gurodd ei ddwylo yn ein plith ni: ac a amlhâodd ei eiriau yn erbyn Duw.