Read William Morgan Bible 1588 original edition Psalmau 28 Bible Online

Psalmau 28 - William Morgan Bible 1588 original edition bible

Psalmau 28

¹Ad te Domine clamabo. Psalm Dafydd. Arnat ti, Arglwydd y galwaf, fyng-hadernid na fydd fyddar wrthif: rhag o thewi yna i’m cyffelybir i rai yn descyn i’r pwll.

²Erglyw lef fy ymbil, pan waeddwyf arnat, pan dderchafwyf fy nwylo tu ag at dy gafell sanctaidd.

³Na thynn fi gyd a’r annuwolion, a chyd â gweithred-wŷr anwiredd, y rhai a lefârant heddwch wrth eu cymmydogion, a drwg yn eu calon.

⁴Dyro iddynt yn ôl eu gweithred, ac yn ôl drygioni eu dychmmygion, dyro iddynt yn ôl gweithredoedd eu dwylo: tâl iddynt eu gobr.

⁵Am nad ystyriant weithredoedd yr Arglwydd, na gwaith ei ddwylo ef, y dinistria efe hwynt, ac nis adailada hwynt.

⁶Bendigêdic fyddo’r Arglwydd: canys clybu lêf fyng-weddiau.

⁷Yr Arglwydd [yw] fy nerth a’m tarian, ynddo ef yr ymddyriedodd fyng-halon, ac i’m cynnorthwywyd: o herwydd hyn y llawenychodd fyng-halon, ac [ar] fyng-hân y clodforaf ef.

⁸Yr Arglwydd [sydd] nerth i’r cyfryw rai, a chadernid iechydwriaeth ei eneiniog [yw] efe.

⁹Cadw dy bobl, a bendithia dy etifeddiaeth: portha hwynt hefyd, a dercha hwynt yn dragywydd.