Read William Morgan Bible 1588 original edition Psalmau 51 Bible Online

Psalmau 51 - William Morgan Bible 1588 original edition bible

Psalmau 51

¹Psalm Dafydd at y pen-cerdd, pan ddaeth Nathan y prophwyd atto ef, wedi iddo fyned i mewn at Bathseba. Trugarhâ wrthif ô Dduw yn ôl dy drugarogrwydd: yn ôl lliaws dy dosturiaethau delea fy anwireddau.

²Golch fi yn llwyr-ddwys oddiwrth fy anwiredd: a glanhâ fi oddi wrth fy mhechod.

³Canys adwen fyng-hamweddau: a’m pechod sydd yn wastad ger fy mron.

⁴Yn dy erbyn di dy hunan y pechais, ac y gwneuthum yr hyn oedd ddrwg yn dy olwg di: fel i’th gyfiawnhaer pan leferech, [ac] y byddit bûr pan farnech.

⁵Wele mewn anwiredd i’m llunniwyd, ac mewn pechod y beichiogodd fy mam arnaf.

⁶Wele ceraist wirionedd oddi mewn: a pheri i mi ŵybod doethineb yn ddirgel.

⁷Glanhâ fi ag Yssop, a mi a lanheuir: golch fi, a byddaf wynnach na’r eira.

⁸Pâr di i mi glywed gorfoledd, a llawenydd, [fel] y llawenycho’r escyrn a ddrylliaist di.

⁹Cuddia dy wyneb oddi wrth fy mhechodau: a delea fy holl anwireddau.

¹⁰Crea galon lân ynof ô Dduw, ac adnewydda yspryd iniawn o’m mewn.

¹¹Na fwrw fi ymmaith oddi ger dy fron: ac na chymmer dy Yspryd sanctaidd oddi wrthif.

¹²Dwg trachefn i mi orfoledd dy iechydwriaeth: ac a’th hael Yspryd cynnal fi.

¹³Dyscaf dy ffyrdd i rai anwir: a phechaduriaid a droant attat.

¹⁴Gwaret fi oddi wrth waed ô Dduw [sef] Duw fy iechydwriaeth: a’m tafod a gân o’th gyfiawnder.

¹⁵Arglwydd agor fyng-wefusau, a’m genau a fynega dy foliant.

¹⁶Canys ni chwennychi aberth, pe amgen, mi ai rhoddwn, [a] phoeth offrwm ni fynni.

¹⁷Aberthau Duw [ydynt] yspryd drylliedic: calon ddryllioc gystuddiedic ô Dduw ni ddirmygi.

¹⁸Bydd ddâ wrth Sion o herwydd dy ewyllyscarwch: adailada furau Ierusalem.

¹⁹Yna y byddi fodlon i ebyrth cyfiawnder [sef] poeth offrwm, ac aberth llosc: yna’r offrymmant fustych ar dy allor.