Read William Morgan Bible 1588 original edition Psalmau 94 Bible Online

Psalmau 94 - William Morgan Bible 1588 original edition bible

Psalmau 94

¹O Arglwydd Dduw’r dial, ô Dduw’r dial ymddiscleiria.

²Ymddercha farn-wr y byd: tâl [eu] gwobr i’r beilchion.

³Pa hŷd Arglwydd [y llawenycha] yr annuwiolion? pa hyd y gorfoledda y rhai drygionus?

⁴Yr ymfawryga holl weithred-wŷr anwiredd? y siarâdant, ac y dywedant yn galed?

⁵Dy bobl Arglwydd a faeddant: a’th etifeddiaeth a gystuddiant.

⁶Y weddw a’r dieithr a laddant, a’r ymddifad a liasant.

⁷Dywedâsant hefyd, ni wêl yr Arglwydd: ac ni ddeall Duw Iacob [hyn.]

⁸Ystyriwch chwi rhai annoeth ym mysc y bobl: ac ynfydion, pa bryd y deallwch?

⁹Oni chlyw’r hwn a blannodd y glust? oni wêl yr hwn a luniodd y llygaid?

¹⁰Oni cherydda’r hwn a gospa y cenhedloedd? [oni] ŵyr yr hwn sydd yn dyscu gwybodaeth i ddŷn.

¹¹Gŵyr yr Arglwydd feddyliau dŷn, mai gwagedd ydynt.

¹²Gwyn ei fŷd y gŵr yr hwn a gospi di ô Arglwydd, ac a ddysci yn dy gyfraith,

¹³I beri iddo lonydd oddi wrth ddyddiau dryg-fyd, hyd oni chloddier ffôs i’r annuwiol.

¹⁴Canys ni âd yr Arglwydd ei bobl, ac ni wrthid efe ei etifeddiaeth.

¹⁵Eithr barn a ddychwel at gyfiawnder, a’r holl rai iniawn o galon [a ânt] ar ei ôl ef.

¹⁶Pwy a gyfyd gyd â mi yn erbyn y rhai drygionus? pwy a saif gyd â mi yn erbyn gweithred-wŷr anwiredd?

¹⁷Oni [buase]’r Arglwydd yn gymmorth i mi, braidd na thrigâse fy enaid mewn distawrwydd.

¹⁸Pan ddywedwn, llithrodd fy nhroed, dy drugaredd di ô Arglwydd a’m cynhalie.

¹⁹Yn amlder fy meddyliau o’m mewn, dy ddiddanwch di a lawenyche fy enaid.

²⁰A fydd cydymdeithas i ti â gorseddfaingc yr anwir: yr hwn a lunia anwiredd yn lle cyfraith?

²¹Yn finteioedd y deuant yn erbyn enaid y cyfiawn: a gwaed gwirion a farnant yn euog.

²²Eithr yr Arglwydd sydd yn amddeffynfa i mi, a’m Duw [yw] craig fy ymddyried.

²³Ac efe a dâl iddynt eu hanwiredd, ac ai tyrr ymmaith yn eu drygioni: yr Arglwydd ein Duw ai tyrr hwynt ymmaith.