Read William Morgan Bible 1588 original edition Ecclesiasticus 48 Bible Online

Ecclesiasticus 48 - William Morgan Bible 1588 original edition bible

Ecclesiasticus 48

¹Clôd Elias, Elizeus, Ezechias ac Esai. Yna y cododd Elias y prophwyd fel tân, ai air ef a losce fel lusern.

²Yr hwn a ddug arnynt hwy newyn mawr a thrwy ei zêl ai gwnaeth hwy yn ychydig.

³Efe a gaeodd y nefoedd trwy air yr Arglwydd, a thair gwaith y dug efe dân: ô Elias mor ogoneddus fuost ti yn dy ryfeddodau:

⁴Pwy a ddichon ymffrostio [ei fod] fel ty di:

⁵Yr hwn a gyfodaist [y] marw o farwolaeth, a dŷn o’r bedd trwy air y Goruchaf.

⁶Yr hwn a ddygaist frenhinoedd i ddinistr, a phendefigion oi heisteddfa.

⁷Yr hwn a glywaist gerydd yr Arglwydd yn Sina, a barnedigaethau dialedd yn Horeb.

⁸Yr hwn a eneiniodd frenhinoedd i dalu y pwyth, a phrophwydi i ddilyn ar ei ôl ef.

⁹Yr hwn a godwyd i fynu mewn tro-wynt o dân, ac mewn cerbyd meirch tânlyd.

¹⁰Yr hwn a ordeiniwyd i geryddu mewn prŷd, ac i ostegu digter yr Arglwydd cyn iddo lidio, ac i droi calon y tadau at y meibion, ac i grynhoi llwythau Iacob.

¹¹Gwyn eu byd hwy a’th welsant di, ac a hunasant mewn cariad:

¹²Canys nyni a fyddwn byw.

¹³Elias a orch-guddiwyd yn y dymestl, ac Elizeus a lanwyd âi yspryt ef: ni syflodd efe er tywysogion yn ei ddyddiau, ac ni allodd neb ei feistroli ef.

¹⁴Ni orchfygodd dim ef, ac wedi ei huno ef, fe a brophwydodd ei gorph ef.

¹⁵Efe a wnaeth ryfeddod yn ei fywyd, ac yn ei ddiwedd rhyfedd oedd ei weithredoedd ef.

¹⁶Er hyn oll ni chymerodd y bobl edifeirwch, ac ni chiliasant oddi wrth eu pechodau, hyd oni chaethgludwyd hwynt oi gwlâd, ai gwascaru ym mhob gwlâd:

¹⁷A gadel ychydig bobl a thywysog yn nhy Ddafyd.

¹⁸Rhai o honynt hwy a wnaethant yr hyn a oedd yn rhyglyddu bodd, a rhai a wnaethant lawer o bechod.

¹⁹Ezecias a gadarnhaodd ei ddinas, ac a ddug ddwfr iw chanol hi: efe a gloddiodd y graig â haiarn, ac a wnaeth ffynhōnau i’r dwfr.

²⁰Yn ei ddyddiau ef y daeth Senacharib i fynu, ac a anfonodd Rabsaces o Lachis, ac a dderchafodd ei law yn erbyn Sion, ac a ymffrostiodd yn ei falchder.

²¹Yna y crynnodd eu calonnau, ai dwylo hwynt, ac yr ymofidiasant hwy fel gwragedd yn escor.

²²Ond hwy a alwasant ac yr Arglwydd trugarog, gan estyn eu dwylo atto ef.

²³A’r hwn sanctaidd ai gwrandawodd hwynt o’r nefoedd, ac ai gwaredodd hwynt trwy law Esai.

²⁴Efe a ddifethodd lu yr Assyriaid, ai angel ef ai dinistriodd hwynt.

²⁵O blegit Ezecias a wnaethe yr hyn a oedd fodlon gan yr Arglwydd, ac a ddilynodd ffyrdd Dafydd ei dad yn lew, fel y gorchymynnase y prophwyd Esai, yr hwn oedd fawr a pharchedic yn ei olwg ef.

²⁶Yn ei ddyddiau ef yr aeth yr haul yn ei ôl, ac efe a estynnodd hoedl y brenin.

²⁷Trwy yspryd godidog y gwelodd efe y pethau a fyddent yn ddiweddaf, ac y cyssurodd efe y rhai a oeddynt athrist yn Sion tros byth.

²⁸Efe a ddangosodd y pethau a ddeuent, byth, a phethau a oeddynt ddirgel cyn eu dyfod.