Read William Morgan Bible 1588 original edition Esay 58 Bible Online

Esay 58 - William Morgan Bible 1588 original edition bible

Esay 58

¹Duw yn ceryddu llwgr crefydd, a buchedd y bobl: Ac yn addo trugaredd i’r edifeiriol. Llefa a’th gêg, nac ymatal, derchafa dy lais fel vdcorn, a mynega i’m pobl eu camwedd, ai pechod i dŷ Iacob.

²Canys beunydd i’m ceisiant, ac a mynnant wybod fy ffyrdd fel cenhedlaeth yr hon a wnele gyfiawnder, ac ni wrthode farnedigaeth ei Duw: gofynnant i mi farnedigaethau cyfiawnder, ewyllysiant nessau [at] Dduw.

³Pa ham [meddwch] yr ymprydiasom, ac ni’s gwelaist? y cystuddiasom ein henaid, ac ni’s gwybuost? wele yn y dydd yr ymprydioch y cewch wynfyd: ac y mynnwch eich holl ddyledion.

⁴Wele i ymryson a chynnen yr ymprydiwch, ac i daro â dwrn anwir: nac ymprydiwch fel y dydd [hwn,] gan beri clywed eich llais yn yr vchel.

⁵Ai fel hyn y bydd yr ympryd yr hwn a ddewisaf? y dydd y cystuddio dyn ei enaid, ai trwy grymmu ei ben fel brwynen, pan dano [arno] sach-liain a lludw, ai hyn a elwi yn ympryd, ac yn ddiwrnod bodlon gan yr Arglwydd?

⁶Onid dymma yr ympryd a ddewisaf, dattod cylymmau anwiredd, tynnu ymmaith feichiau trymmion, a gollwng y rhai gorthymedic yn rhyddion, a thorri o honoch bob rhwym?

⁷Onid torri dy fara i’r newynoc, a dwyn o honot y cyrwydraid i dŷ? a phan welech noeth, ei ddilladu, ac nad ymguddiech oddi wrth dy gnawd?

⁸Yna y tyrr dy oleuni allan fel y wawr, dy iechyd a dardda yn fuan, a’th gyfiawnder aiff o’th flaen: gogoniant yr Arglwydd a’th ddilyn.

⁹Yna y gelwi, a’r Arglwydd a ettyb, y gweiddi, ac efe a ddywed wele fi: os bwri odi wrthit yr iau, estyn bŷs, a dywedyd anwiredd,

¹⁰O thosturi di wrth y newynoc, a diwallu yr enaid cystuddiedic, yna dy oleuni a gyfyd mewn tywyllwch, a’th dywyllwch [fydd] fel hanner dydd.

¹¹A’r Arglwydd a’th arwein yn wastad, ac a ddiwalla dy enaid ar sychder, ac a wna dy escyrn yn freision: a thi a fyddi fell gardd wedi ei dwfrhau, ac megis ffynnon ddwfr yr hon ni phalla ei dwfr.

¹²[Rhai] o honot ti a adailadant ddiffaethwch tragywyddol, ti a gyfodi sylfeini i lawer cenhedlaeth, a thi a elwir yn gae-wr yr adwy, yn gyweiri-wr llwybrau i gyfanneddu.

¹³O throi dy droed oddi wrth fy Sabboth [heb] wneuthur dy ewyllys ar fy nydd sanctaidd, ai alw [ef] yn hyfryd, sanctaidd ogoneddus Sabboth yr Arglwydd, ai anrhydeddu ef heb wneuthur dy ffyrdd, heb geisio dy ewyllys, na dywedyd gair [drwg,]

¹⁴Yna yr ymhyfrydi yn yr Arglwydd, ac y gwnaf it farchogaeth ar vchelfeudd y ddaiar, gwnaf hefyd it fwynhau etifeddiaeth Iacob dy dad: canys genau yr Arglwydd a lefarodd [hyn.]