Read William Morgan Bible 1588 original edition Ieremi 42 Bible Online

Ieremi 42 - William Morgan Bible 1588 original edition bible

Ieremi 42

¹Y tywysogion yn gofyn cyngor i Ieremi. 13 Yntef yn cynghori iddynt nad elent i’r Aipht. Felly holl dywysogion y llu, a Iohanan mab Careah, a Iezaniah mab Osiah, a’r holl bobl o fychan hyd fawr a nesasant,

²A hwynt a ddywedasant wrth Ieremi y prophwyd, atolwg gwrando di ein deisyfiad ni, a gweddia trosom ni ar yr Arglwydd dy Dduw [sef] tros yr holl weddill hyn, canys nyni a adawyd o lawer yn ychydig, fel y mae dy lygaid ti yn ein gweled ni:

³Fel y dangoso yr Arglwydd dy Dduw i ni y ffordd y mae i ni rodio ynddi: a’r peth a wnelom.

⁴Yna Ieremi y prophwyd a ddywedodd wrthynt, myfi a’ch clywais [chwi:] wele mi a weddiaf ar yr Arglwydd eich Duw yn ôl eich geiriau chwi: a pheth bynnac a ddywedo yr Arglwydd am danoch, myfi ai mynegaf i chwi, nid ataliafi ddim oddi wrthych.

⁵A hwy a ddywedasant wrth Ieremi, yr Arglwydd fyddo tyst gwirion a ffyddlon rhyngom ni, y gwnawn yn ôl pôb gair a’r a anfono yr Arglwydd dy Dduw [gyd â] thi attom ni.

⁶Os da neu os drwg [fydd,] ar lais yr Arglwydd ein Duw (yr hwn yr ydym ni yn dy anfon atto) y gwrandawn ni: fel y byddo da i ni pan wrandawom ar lais yr Arglwydd ein Duw.

⁷Ac ym mhen y deng-nhiwrnod y daeth gair yr Arglwydd at Ieremi.

⁸Yna efe a alwodd ar Iohanan fab Careah, ac ar holl dywysogion y llu y rhai [oeddynt] gyd ag ef, ac [ar] yr holl bobl o fychan hyd fawr,

⁹Ac efe a ddywedodd wrthynt, fel hyn y dywed Arglwydd Dduw Israel, yr hwn yr anfonasoch chwi fi atto, i roddi i lawr eich gweddiau ger ei fron ef:

¹⁰Os mynnwch chwi drigo yn y wlâd hon, myfi a’ch adailadaf chwi, ac ni’s dinistriaf, myfi a’ch plannaf chwi, ac ni’s diwreiddiaf: o blegit y mae yn edifar gennifi am y drwg yr hwn a wneuthum i chwi.

¹¹Nac ofnwch rhac brenin Babilon, yr hwn y mae arnoch chwi ei ofn, nac ofnwch ef ddim medd yr Arglwydd: canys myfi a fyddaf gyd â chwi i’ch achub chwi, ac i’ch gwaredu chwi oi law ef.

¹²Ac mi a ganiadhaf i chwi drugaredd, fel y trugarhao efe wrthych, ac y dygo efe chwi trachefn i’ch gwlad eich hun.

¹³Ond os dywedwch, ni thrigwn ni yn y wlad hon: heb wrando ar lais yr Arglwydd eich Duw,

¹⁴Gan ddywedyd nagê, o blegit i wlad yr Aipht yr awn ni, lle ni welir ryfel, ac ni chlywir sain vdcorn, ac ni bydd arnom newyn bara, ac yno y trigwn ni.

¹⁵Am hynny ô gweddill Iuda gwrandewch bellach air yr Arglwydd, fel hyn y dywed Arglwydd y lluoedd Duw Israel: os chwi gan osod a osodwch eich wynebau i fyned i’r Aipht, ac a ewch i ymdeithio yno,

¹⁶Y cleddyf yr hwn yr ydych chwi yn ei ofni a fydd yno, [ac] efe a’ch goddiwedda chwi yn nhîr yr Aipht: a’r newyn yr hwn yr ydych yn gofalu rhagddo a’ch dilyn chwi i’r Aipht, ac yno y byddwch feirw.

¹⁷A’r holl wŷr a osodasant eu hwynebau i fyned i’r Aipht i aros yno a leddir a’r cleddyf, â newyn, ac â haint, ac ni bydd vn o honynt yn weddill, neu yn ddiangol gan y dialedd yr hwn a ddygafi arnynt.

¹⁸Canys fel hyn y dywed Arglwydd y lluoedd Duw Israel, megis y tywalltwyd fy llid, a’m digofaint ar bresswyl-wŷr Ierusalem, felly y tywelltir fy nigofaint arnoch chwithau pan ddeloch i’r Aipht: a chwi a fyddwch yn felldith, yn anghyfanneddol, yn ddirmyg, ac yn warth, ac ni chewch chwi weled y lle hwn mwyach.

¹⁹O gweddill Iuda, yr Arglwydd a ddywedodd wrthych, nac ewch i’r Aipht: gwybyddwch chwi yn hyspys i mi eich rhybuddio chwi heddyw.

²⁰Diau eich bod chwi yn dwyllodrus yn eich calonnau, am fy anfon i at yr Arglwydd eich Duw gan ddywedyd: gweddia di trosom ni ar yr Arglwydd ein Duw, a mynega di i ni yn ôl yr hyn oll a ddywedo yr Arglwydd ein Duw ni, ac nyni ai gwnawn.

²¹Am hynny y mynegais i chwi heddyw, ond ni wrandawsoch ar lais yr Arglwydd eich Duw, nac ar ddim oll a’r a anfonodd efe [gyd â] mi attoch chwi.

²²Ac yn awr gwybyddwch chwi yn hyspys mai drwy’r cleddyf, [a] thrwy newyn, a thrwy haint y byddwch chwi feirw yn y lle, yr hwn yr ydych yn ewyllysio myned i ymdeithio ynddo.