Read William Morgan Bible 1588 original edition Ieremi 51 Bible Online

Ieremi 51 - William Morgan Bible 1588 original edition bible

Ieremi 51

¹Dinistr Babilon. 59 Ieremi yn rhoddi ei lyfr i Sariah. Fel hynn y dywed yr Arglwydd, wele myfi a godaf wynt dinistriol yn erbyn Babilon, ac yn erbyn [ei] thrigolion y rhai a godant [eu] calon yn fy erbyn i.

²Ac mi a anfonaf i Babilon nith-wŷr, a hwynt ai nithiant hi, ac a waghânt ei thir hi, o herwydd hwynt a fyddant yn ei herbyn hi o amgylch ar y dydd blinderoc.

³Wrth y perchen bwâu, ac wrth yr hwn a ymdderchafo mewn llurig [y dywed yr Arglwydd,] na chymmerwch drugaredd ar ei gwyr ieuaingc, difrodwch chwi ei holl lu hi.

⁴Felly y rhai lladdedig a syrthiant yng-wlad y Caldeaid, a’r rhai archolledic yn ei heolydd hi.

⁵Canys Israel nid yw weddw, nac Iuda oi Duw, [sef] o Arglwydd y lluoedd: er bod eu gwlâd hwynt yn llawn o gamwedd yn erbyn Sanct yr Israel.

⁶Ffoiwch chwi o ganol Babilon, ac achubwch bawb ei enioes ei hun, na adewch chwi eich difetha yn ei hanwiredd hi, o blegit amser dial [yw] hwn i’r Arglwydd, efe a dâl y pwyth iddi hi.

⁷Phiol aur [oedd] Babilon yn llaw yr Arglwydd, yn meddwi pôb gwlâd: yr holl genhedloedd a yfasant oi gwîn hi, am hynny y cenhedloedd a ynfydâsant.

⁸Yn ddisymmwth y syrthiodd Babilon, ac y drylliwyd hi: vdwch chwi drosti, cymmerwch driacl iw harcholl hi, i edrych a iachâ hi.

⁹Nyni a iachauasom Babilon [meddant hwy,] ond nid aeth hi yn iach [ddim,] gedwch chwi hi ymmaith, ac awn bawb iw wlâd: canys ei barn a gyrhaeddodd i’r nefoedd, ac a dderchafwyd hyd yr wybrau.

¹⁰Yr Arglwydd a ddug allan ein cyfiawnder ni: deuwch a thraethwn ni yn Sion waith yr Arglwydd ein Duw ni.

¹¹Gloiwwch y saethau, cesclwch chwi y tariannau, yr Arglwydd a gyffru yspryd brenhinoedd Media, o blegit y mae ei fryd ef yn erbyn Babilon iw dinistrio hi: canys dial yr Arglwydd yw hynn, [a] dial ei Deml ef.

¹²Derchefwch chwi faner ar furoedd Babilon, cadarnhewch y wiliadwriaeth, gosodwch i fynu y gwil-wŷr, darperwch chwi gynllwynwŷr, canys yr Arglwydd a fwriadodd, ac efe a wna hefyd yr hyn a lefarodd am drigolion Babilon.

¹³Tydi yr hon ydwyt yn aros ar ddyfroedd lawer, yn aml dy dryssorau, dy ddiwedd di a ddaeth [sef] mesur dy gybydd-dod.

¹⁴Arglwydd y lluoedd a dyngodd iddo ei hun [gan ddywedyd, diau i’th lenwir di o ddynion megis y mywion ascelloc [o nifer:] a hwynt a ganant floddest i’th erbyn.

¹⁵Yr hwn a wnaeth y ddaiar drwy ei nerth [ac] a siccrhaodd y bŷd trwy ei ddoethineb, ac a danodd y nefoedd drwy ei ddeall.

¹⁶Pan roddo efe ei lêf y terfysca y dyfroedd yn y nefoedd, ac y mae efe yn codi y niwloedd o eithaf y ddaiar, ac efe sydd yn gwneuthur y mellt yn law, ac yn dwyn y gwynt allan oi dryssorau.

¹⁷Ynfyd yw pôb dŷn o ŵybodaeth, gwradwyddwyd pôb toddydd o achos y ddelw: canys celwyddoc[yw] ei doddiad, ac nid oes chwythad ynddynt.

¹⁸Oferedd [ydynt] hwy [a] gwaith cyfeiliorni: yn amser eu hymwelediad y difethir hwynt.

¹⁹Nid fel y rhai hynn, eithr lluni-ŵr y cwbl oll yw rhan Iacob: ac [Israel yw] gwialen ei etifeddiaeth ef, Arglwydd y lluoedd [yw] ei enw.

²⁰Ti ydwyt forthwyl i mi, [ac] arfau rhyfel, â thi y drylliafi genhedloedd, ac â thi y dinistriaf deyrnasoedd,

²¹A thi hefyd y gwascaraf y march a’r march-ŵr, ac â thi y drylliaf y cerbyd ai farchog.

²²A thi y drylliafi ŵr a gwraig, ac â thi y drylliaf hên ac ieuangc, ac â thi y drylliaf y gŵr ieuangc a’r forwyn.

²³A thi hefyd y drylliafi y bugail ai braidd, ac â thi y drylliaf yr ardd-ŵr ai iau ŷchen, ac â thi y drylliaf y tywysogion a’r pennaethiaid.

²⁴Ac mi a dalaf yn eich golwg chwi i Babilon, ac i holl bresswyl-wŷr Caldea eu holl ddrygioni hwynt yr hyn a wnaethant hwy yn Sion medd yr Arglwydd.

²⁵Wele fi [yn dyfod] i’th erbyn di ô fynydd dinistriol, yr hwn [wyt] yn dinistrio yr holl dîr medd yr Arglwydd, ac myfi a estynnaf fy llaw arnat, ac a’th dreiglaf di i lawr o’r creigiau, ac a’th roddaf di yn fynydd llosc:

²⁶Fel na chymmerant o honot ti faen congl, na sylfaen: o blegit diffaethwch tragywyddol a fyddi di medd yr Arglwydd.

²⁷Derchefwch chwi faner yn y tir, lleisiwch vdcorn ym mysc y cenhedloedd, darperwch chwi y cenhedloedd yn ei herbyn hi, gelwch chwi deyrnasoedd Ararat, Minni, ac Ascanez yn ei herbyn hi: gosodwch dywysog arni, gwnewch chwi i feirch ddyfod i fynu cynn amled a’r mywion ascelloc.

²⁸Darperwch chwi y cenhedloedd yn ei herbyn hi, sef brenhinoedd Media, ai thywysogion, ai holl bennaethiaid hi, a’r holl wlâd, [yr hon sydd tann] ei lywodraeth ef.

²⁹Y ddaiar hefyd a gryna, ac a ofidia pan gyflawner amcan yr Arglwydd yn erbyn Babilon, am roddi gwlâd Babilon yn anghyfannedd heb drigiannol [ynddi.]

³⁰Cedyrn Babilon a beidiasant ag ymladd, ac y maent hwy yn aros o fewn yr amddeffynfeudd: pallodd eu cadernid hwynt, aethant yn wrageddos, ei hanneddau hi a loscwyd, ai barrau a dorrwyd.

³¹Redeg-ŵr a rêd i gyfarfod â rhedeg-ŵr, a chenned i gyfarfod â chennad, i fynegu i frenin Babilon orescyn ei ddinas ef oi chwrr,

³²Ac ennill y rhydau, a llosci y llynnoedd â than, a synnu ar y rhyfel-wŷr.

³³Canys fel hyn y dywed Arglwydd y lluoedd Duw Israel: merch Babilon [sydd] fel llawr dyrnu, amser ei dyrnu hi [a ddaeth:] ac ar fyrder y daw amser cynhaiaf iddi.

³⁴Nabuchodonosor brenin Babilon a’m hysodd fi, [ac] a’m dinistriodd, efe a’m gosododd fel llestr gwag, efe a’m llyngcodd fel draig, ac a lanwodd ei fol o’m dainteithion, [ac] a’m bwriodd fi allan.

³⁵Y cam a wnaed i mi, ac i’m cnawd [a ddelo] ar Babilon medd presswyl-ferch Sion: a’m gwaed i ar drigolion Caldea medd Ierusalem.

³⁶Am hynny fel hyn y dywed yr Arglwydd, wele myfi a ddadleuaf dy ddadle di, ac a ddialaf trosot ti: ac mi a ddiyspyddaf ei môr hi, ac a sychaf ei ffynhonnau hi.

³⁷Yna y bydd Babilon yn garneddau, yn drigfa dreigiau, yn syndra, ac yn aruthr, heb bresswylydd.

³⁸Cyd-rûant fel llewod: bloeddiant fel cenawon llewod.

³⁹Yn eu gwrês hwynt y gosodaf wledd iddynt, ac mi ai meddwaf hwynt fel y llawenychant, ac y cyscant hûn dragywyddol: ac ni ddeffroant medd yr Arglwydd.

⁴⁰Myfi ai dygaf hwynt i wared fel ŵyn iw lladd, [ac]fel hyrddod a bychod.

⁴¹Pa fodd y gorescynnwyd Sesach? ac yr ennillwyd gogoniant yr holl dîr? pa fodd yr aeth Babilon yn rhyfeddod ym mysc y cenhedloedd?

⁴²Y môr a dderchafodd tros Babilon: hi a orchguddiwyd ag amlder ei donnau ef.

⁴³Ei dinasoedd hi a aethant yn anghyfannedd, yn gras-dîr, ac yn rhôs: gwlâd ni thrîg vn gŵr ynddi, ac ni thrammwya mab dyn trwyddi.

⁴⁴Ac mi a ymwelaf â Bel yn Babilon, ac mi a dynnaf oi safn ef yr hyn a lyngcodd efe: a’r cenhedloedd ni ddilifant atto ef mwyach, a mûr Babilon a syrth.

⁴⁵Deuwch chwi allan oi chanol ô fy mhobl, ac achubwch chwi bôb vn ei enioes, rhac llid digofaint yr Arglwydd,

⁴⁶Ac rhac llwfrhau eich calonnau, ac ofni rhag y chwedl a glywir yn y wlâd: canys y flwyddyn [hon y daw] chwedl newydd, ac ar ôl hynny chwedl newydd y flwyddyn [nesaf,] a thrais yn y wlâd, a llywodraeth-ŵr ar lywodraeth-ŵr.

⁴⁷Am hynny wele y dyddiau yn dyfod pan yr ymwelwyf â delwau Babilon, ai holl wlâd hi a wradwyddir, ai holl rai lladdedig hi a syrthiant yn ei chanol.

⁴⁸Yna y nefoedd a’r ddaiar a’r hyn oll [sydd] ynddynt a gânant yn llafar o herwydd Babilon: o blegit o’r gogledd y daw yr anrheith-wŷr medd yr Arglwydd.

⁴⁹Fel y gwnaeth Babilon i’r rhai lladdedic o Israel syrthio: felly y Babiloniaid a syrthiant yn lladdedig drwy yr holl dîr.

⁵⁰Y rhai a ddiangant gan y cleddyf ewch chwi ymmaith na sefwch, cofiwch chwi yr Arglwydd o bell, a bydded Ierusalem yn eich cof chwi.

⁵¹Yr oedd cywilydd arnom pan glywsom ni y cabledd, gwarth a orchguddiodd ein hwynebau ni pan ddaeth yr estroniaid i gyssegr tŷ yr Arglwydd.

⁵²Am hynny wele y dyddiau yn dyfod medd yr Arglwydd, pan ymwelwyfi ai delwau hwynt: a thrwy ei holl wlâd hi y clwyfus a riddfan.

⁵³Er i Babilon dderchafu i’r nefoedd, ac er iddi gadarnhau ei hamddeffynfa yn vchel: [etto] anrheith-wŷr a ddeuant oddi wrthifi medd yr Arglwydd.

⁵⁴Sain gwaedd [a glywir] o Babilon: a dinistr mawr o wlâd y Caldeaid,

⁵⁵O herwydd yr Arglwydd a anrheithiodd Babilon, ac a ddinistriodd y mawr-air o honi hi: er rhuo oi tonnau fel dyfroedd lawer [a] rhoddi twrwf eu llef hwynt.

⁵⁶Canys yr anrheith-ŵr, a ddaeth yn ei herbyn hi, sef yn erbyn Babilon, ai chedyrn hi a ddaliwyd, ei bŵa hi a dorrwyd: canys Arglwydd Dduw y gobr, a obrwya yn gwbl.

⁵⁷Myfi a feddwaf ei thywysogion hi, ai doethion, ei phennaethiaid, ai swyddogion, ai chedyrn fel y cyscant hûn dragywyddol, ac na ddeffroant medd y Brenin, enw yr hwn [yw] Arglwydd y lluoedd.

⁵⁸Fel hyn y dywed Arglwydd y lluoedd, gan ddryllio y dryllir helaeth furoedd Babilon, ai huchel byrth a loscir â thân: a’r bobl a ymboenant mewn oferedd, a’r cenhedloedd mewn tân, a hwynt a ddeffygiant.

⁵⁹Y gair yr hwn a orchymynnodd Ieremi y prophwyd i Saraiah fab Neriah, fab Maasiah pan oedd efe yn myned gyd â Sedecia frenin Iuda i Babilon, y bedwaredd flwyddyn oi deyrnasiad ef: a Saraiah oedd dywysog llonydd.

⁶⁰Felly Ieremi a scrifennodd yr holl niwed a’r a oedd ar ddyfod yn erbyn Babilon mewn vn llyfr: sef yr holl bregethau y rhai a scrifennwyd yn erbyn Babilon.

⁶¹Ac Ieremi a ddywedodd wrth Saraiah, pan ddelech di i Babilon, yna edrych di a darllen y geiriau hynn,

⁶²A dywet ti: ô Arglwydd ti a leferaist yn erbyn y lle hwn, am ei ddinistrio fel na bydde ynddo bresswylydd, na dŷn nac anifail, eithr yn anghyfannedd tragywyddol.

⁶³A phan ddarfyddo i ti ddarllen y llyfr hwn, rhwym di faen wrtho, a bwrw di ef i ganol Euphrates,

⁶⁴A dywet, fel hynn y soddir Babilon, ac ni chyfyd hi gan y drwg yr hwn a ddygafi arni, oni ddeffygiant. HYD HYN [Y MAE] PREGETHAV IEREMI.